Matayo 25
25
E’yo o’bele ezoanzi mudri ’diyisiri
1 #
Luk 12:35; Eceza 19:7 Suru ’buari eri ovu di ekile ezoanzi mudrile, yi ’du tala yini, fu mu dri fu izio be. 2Yi ma eselia, towi ’diyi ondua kokoru, towi ’diyi ondua be. 3Te ondua koko ’diyi ’du tala yini, te ’duni odu yi be ku; 4te ondua be ’diyi ’du odu cupa alia ci tala yini be. 5Te izioni i dri iciria ’dale, o’du e’do yi ’be kaukau, yi nga di o’du ko ndo. 6Te iniayii, ’ba oyu uru, Mi ndre, izio eca ’bo! Emi fu mu dri fu eri be. 7Ezoanzi ’dayi nga di enga dria urulesi, nga tala yini ede. 8Te ’ba ondua kokoru ’diyi nga ’yo ’ba onduaru ma tia kini, Emi fe ama dri odu emini ma azi; tala amani inyu yi ra. 9Te ’ba ondua be ’diyi nga e’yo omvi kini, Econi ku, ngani dri lu ama dri emi be aluni ku; emi mu di ’ba ozipi ’diyi vu, emi je emi ngulupi dri. 10’Ba ’diyini muria jeria, izio eca ra, ezoanzi te ovupi edezaru ’diyi fi eri be omu oku bizaniria; yi nga jotile opi ci. 11#Luk 13:25Vilerisi ezoanzi ecepi ’diyi eca indi, yi ’yo ra, Opi, opi, mi zi jotile ama dri fo! 12#Mat 7:23Te eri e’yo omvi, ’yo ra, Ma ’yo emi tia ndi, ma nini emi ku. 13#Mat 24:42’Dini emi ma ovu mile be, emini o’du nile etu be kurisi.
E’yo o’bele ’ba talanto be ’diyisiri
14 #
Luk 19:11-27
#
Mat 21:33
Te eri ovu ekile ’ba mupi angu andiniarile, eri omve ati’ba ini, eri nga afa ini fe ku yi dri; 15#Rum 12:6eri fe talanto towi ’ba aluri dri, aziniri dri iri, aziniri dri alu; ekile yi alu ma okponi ovulerile. Eri mu di angu andinia. 16’Ba talanto towi ’dupiri nga mu coti, azi ngazu yi be, nga azini isu drinia towi. 17’Dinile ’ba talanto iri ’dupiri isu azini drinia iri. 18Te ’ba talanto alu ’dupiri nga mu ’bile ga, nga opi ini ma silingi zi nyakua. 19O’du kakau ma vutia opi ati’ba ’dayini nga eca ra, nga afa yini ma kalafe la yi be. 20’Ba talanto towi ’dupiri nga talanto towi azini eji, kini, Opi, mi ku ndra ma dri talanto towi; mi lu, ma isu azini towi ’di’i. 21#Mat 25:23; Mat 24:45-47; Luk 16:10Opi erini ’yo eri tia, Onyiru, mi ati’bo onyiru asi ada be; mi ovu ndra asi ada be afa weresi, ma nga mi ’ba afa kakau ma drilia; mi fi ayiko opi minini ma alia. 22’Ba talanto iri ’dupiri nga emu indi, nga ’yo ra, Opi, mi ku ndra ma dri talanto iri; mi lu, ma isu azini iri ’di’i. 23#Mat 25:21Opi erini ’yo eri tia, Onyiru, mi ati’bo onyiru asi ada be; mi ovu ndra asi ada be afa weresi, ma nga mi ’ba afa kakau ma drilia; mi fi ayiko opi minini ma alia. 24’Ba talanto alu ’dupiri nga emu indi, nga ’yo ra, Opi, ma ni mi drio mi agu okporuni, mi lo pari mini ’yale kuria, mi oku pari mini rile kuria indi; 25mani rulerisi, ma mu talanto mini zi nyakua ani. Mi lu, afa mini ’do ’i. 26Te opi erini nga e’yo omvi, ’yo eri tia, Mi ati’bo onzi ovu be! Mini Ira ma lo pari mani ’yale kuria, azini,ma oku pari mani rile kuria indi? 27Ka’dini eri ndra onyiru mi ka Indra silingi mani fe ’ba afa agei tepi ’diyi dri, mani emviria ma nga ndra afa mani isu ereni be. 28Emi’du talanto eri driarisi, emi fe eri ’ba ovupi talanto mudri beri dri. 29#Mat 13:12; Mar 4:25; Luk 8:18Te ’ba dria ovupi afa beri dri yi nga afa azini fe drinia, afa yini nga aga tu; te ’ba afa kokoruri, ’ba nga lafa erini ovuzu eri beri pa drinia ra. 30#Mat 8:12; 22:13; Luk 13:28Emi ’be ati’bo aza koza kokoruri angu iniciciria amve; ’daa awu pi nga ovu si ciza beni.
’Ba drilebaru piyi ’ba otrizaru ’diyi be
31 #
Mat 16:27; 19:28; Zek 14:5; Eceza 20:11-13 Te Mvi ’bani ka eca diza erini be, malaika pie dria, eri nga di ri oguna erini dizaruri ma dria. 32#Rum 14:10Suru dria yi nga yi oku eri milia,eri nga yi ma esele co ekile ’ba kabilo ocepirini kabilo pi ma esele cole ndri berile; 33#Eze 34:17eri nga kabilo ’ba eri ma dri ndiria, te eri nga ndri ’ba dri ejia. 34Etu ’dasi Meleki nga di ’yo ’ba ovupi dri ndiria ’diyi ma tia, Emi emu, emi ’ba ma Atini asi ndriza fele yi dri ’diyi, emi ma nya suru ovupi edezaru ngonde emi dri engazu nyaku eti ’bazurisiri emi ma afaru; 35#Isa 58:7te ma ovu ndra abirisi, emi fe ndra nyaka ma dri ra; ma ovu ndra yi avijosi, emi fe ndra ma dri yi mvu ra; ma ovu ndra ani’boru, te emi fe ma dri jo lazu ra; 36ma ovu ndra pililiru, te emi fe ndra afa suza ma dri ra; ma ovu ndra azoru, te emi emu ma ndrezu ra; ma ovu ndra arujoa, te emi emu ndra ma vu ra. 37#Mat 6:3’Ba kililiru ’diyi nga di e’yo omvi eri tia kini, Opi, ama ndre mi ovu abirisi, ama fe mi dri nyaka a’dungare ya? azini yi avijosi, te ama fe mi dri afa mvuza a’dungare ya? 38Ama ndre mi ovu ani’boru, ama fe pari mi dri lazu a’dungare ya? kani mi ovu pililiru, ama fe afa suza mi dri a’dungare ya? 39Ama ndre mi ovu azoru, kani arujoa, te ama emu mi ndrezu a’dungare ya? 40#O’be 19:17; Ebra 2:11Meleki nga e’yo omvi, nga ’yo yi tia, Ma ’yo emi tia ndi, emini eri ’yele adripi mani nyiria ’diyi ma azi alu dririsi, emi ’ye ndra eri ma dri. 41#Mat 7:23; Eceza 20:10, 15Vilerisi eri nga di ’yo ’ba ovupi eri dri ejia ’diyi ma tia indi, Emi nga ma ageiarisi ra, emi dria ovupi otrizaru ’diyi, emi ma fi aci ’dani ’dani ovupi edezaru ngonde ’ba ’ba obepiri pi dri malaika erini beria. 42A’disiku ma ovu ndra abirisi, te emi feni nyaka ma dri ku; ma ovu ndra yi avijosi, te emi feni afa mvuza ma dri ku; 43ma ovu ndra ani ’boru, te emi feni jo lazu ma dri ku; ma ovu ndra pililiru, te emi feni afa suza ma dri ku; ma ndra azoru azini arujoa, te emi emuni ma ndrezu ku. 44’Ba ’diyi nga di e’yo omvi, nga ’yo eri tia, Opi, ama ndre mi ovuzu abirisi, kani yi avijosi, kani ani’boru, kani pililiru, kani azoru, kani arujoa, azini ama koni mi aza azi ngazasi ku o’du ngosi ya? 45Eri nga di e’yo omvi yi tia kini,Ma’yo emi tia ada,ekile ndra emini eri ’yele ’ba nyiria ’diyi ma azi alu dri kurile emi ’yeni eri ma dri ku indi. 46#Dan 12:2; Yoh 5:29’Ba ’diyi naa mu fi panga onzi ’dani ’daniria, te ’ba kililiru ’diyi nga mu fi idri ’dani ’daniria.
Currently Selected:
Matayo 25: LB66
Highlight
Share
Copy
Want to have your highlights saved across all your devices? Sign up or sign in
Bible in Lugbara © United Bible Societies, 1966.