'Ba Levini 8

Aroni pi ’bazu ndu alatararu anzipi beri

1Yehova ’yo Musa tia kini, 2#Efu 29:1; 30:24, 25Mi ’du Aroni pi anzipi be, bongo pie, odu osule osuri pie, tiago edeta e’yo onzi edezuriniri pie, kabiloago iri ’diyi pie, afazu mikate akufi kokoruri be alia treri pie; 3mi oku ’ba ongulumuru ’diyi dria hema ti ecizaniri ma tilia. 4Musa nga ’ye ani ekile Yehovani azile eri tiarile; ’ba ongulumuru nga di yi oku dria hema ti ecizaniri ma tilia. 5Musa nga di ’yo ’ba ongulumuru ’diyi ma tia kini, E’yo Yehovani azile ma ’yeri eri ’di. 6#Efu 30:19; Zab 26:6; Isa 52:11; Eze 36:25; 1 Kor 6:11; Efe 5:26; Ebra 9:9-14; Eceza 1:5, 6Musa nga di Aroni pi eji anzipi be, nga yi oji yisi. 7#Efu 28:4Eri osu Aronini kotisi, a’di enyiriko opilenia, osu vini eri kanzusi, ’ba koti alinaruri eri ruaa, a’di eri baka onduouni cale koti alinaruri vilerisi, anzu eri eri ma ruaa baka nderisi. 8#Kal 27:21; Azi 33:8; 1 Sam 28:6; Ezr 2:63; Neh 7:65Eri ’ba vini bongo agatiari eri ruaa, te bongo agatiari ma alia eri ’ba Urimu pi Tumimu be. 9#Efu 29:6; Zek 3:5; 6:11Eri ’ba vini bongo dri ombezuri drinia, azini bongo dri ombezuri ma ruaa andretialeru eri eci mele alaru kparakalaru, oku alatararu nderi, ekile Yehovani azile Musa tiarile.

10 # Efu 30:26-29 Musa nga di odu osule osuri ’du, nga hema pi ma rua tri ani, afa alenia ’diyi be dria, yi ’bazu alatararu. 11Eri nga odu nde oya pari edeta edezuri ma dria paleko aziri, nga ani pari edeta edezu nderi pi tri afa erini ’diyi be dria, awala rua ojizuri pie pani pie dria, yi ’bazu ndu alatararu. 12#Lev 21:10, 12; Efu 29:7; 30:30; Zab 133:2; Isa 61:1Eri nga di odu osule osuri ma esele osu Aroni ma dria, eri efizu ani, eri pezu ndu alatararu. 13#Efu 29:8, 9; 40:14, 15; Zab 132:9; Isa 61:10Musa nga vini Aroni anzipi eji, nga koti osu yi ruaa, nga enyiriko a’di yi opilea, nga bongo dri ombezu ’diyi ombe yi ma dria, ekile Yehovani azile Musa ma tiarile.

14 # Efu 29:10; Zab 51:19; 66:15; Eze 43:19; Ebra 9:13, 14; Lev 4:4 ’Di ma vutia eri nga tiago edeta e’yo onzi edezuriniri eji ra; te Aroni pi anzipi be yi nga yi ma dri oti tiago edeta e’yo onzi edezuriniri ma dri olu’bua. 15#Efu 29:12, 36; Lev 4:7; Eze 43:20, 26; Ebra 9:22Musa nga di eri li ra, nga arini ebe, nga o’ba drilejusi pari edeta edezuri ma o’yu ma dria ageiniasi kuru, nga ani pari edeta edezuri ’ba alatararu, nga ari nde osu pari edeta edezuri ma ndua eri ’bazu ndu alatararu, e’yo onzi erini edezu. 16#Efu 29:13; Lev 4:8Eri ’du oso dria otile fi ruaari pie, aridria’bure ogui ruaari pie, orofi iri ’diyi pie, osoni pie, Musa nga di yi eve pari edeta edezuri ma dria. 17#Lev 4:11, 12; Efu 29:14Te eri eve tiago nde ma ada acisi, enyirikoni pie, zani pie, warani pie dria pari ’bani hema asozuri ma tia amve, ekile Yehovani azile Musa tiarile. 18#Efu 29:15Vutinia eri fe kabiloago edeta vezaruriniri; Aroni pi anzipi be nga yi ma dri oti kabiloago nderi ma dri olu’bua. 19Musa nga eri li ra, nga arini oya pari edeta edezuri ma dria ageiniasi kuru. 20Ka eri opi ’bo, Musa nga drini pi eve acisi esele nde ’diyi pie, osoni pie. 21#Efu 29:18Ka fini pi oji pa be yisi ’bo, Musa nga kabiloago nderi eve dria pari edeta edezuri ma dria; eri ovu edeta vezaru, aji arikariruri, edeta edele acisi Yehova vuri’i, ekile Yehovani azile Musa ma tiarile. 22#Efu 29:19, 31; Lev 7:37; Eceza 1:5, 6Vutinia eri nga kabiloago aziniri fe, kabiloago ’ba opezu ndu alatararuri’i; te Aroni pi anzipi be nga yi ma dri oti kabiloago nderi ma dri olu’bua. 23#Efu 29:20; Lev 8:23; Rum 12:1; 1 Kor 6:20Musa nga eri li ra, nga arini ebe, nga eri ’ba Aroni ma bidrile dri ndiari ma dria, azini vini eri ma driago dri ndiari ma dria, azini eri ma paago dri ndiari ma dria indio 24#Ebra 9:18-24Musa nga Aroni ma anzipi eri, nga arini o’ba yi ma bidrile dri ndia ’diyi pi ma dria, yi ma driago dri ndia ’diyi pie, yi ma paago dri ndia ’diyi be; eri oya arini pari edeta edezuri ma dria ageiniasi kuru. 25#Efu 29:22Eri nga di osoni pi ’du, sobi osoruri pie, oso dria otile fi ruaari pie, aridria’bure ogu ruaari pie, orofi iri ’diyi pie, osoni pie, o’du dri ndiari pie dria; 26#Efu 29:23azini afazu mikate akufi kokoru be tre ovupi Yehova ma driliari ma aliasi eri e’du mikate akufi kokoru olemiruri alu, mikate oliza osale odusiri alu, mikate pekepekeri alu, o’ba yi oso pi ma dria ’dri ndia be; 27#Efu 29:24eri fe afa ’diyi dria Aroni pi ma dria anzipi be, nga yi oya Yehova ma milia edeta oyale oyariru. 28#Efu 29:25; E’do 8:21; Efe 5:2Musa nga di afa ’diyi o’du yi ma driasi, nga yi eve edeta vezaru pari edeta edezuri ma driari ma dria; yi ovu edeta ’ba ’bazu ndu alatararu, aji arikariruri, eri edeta edele acisi Yehova vuri’i. 29#Efu 29:26Musa nga di agatini ’du ra, nga eri oya Yehova ma milia edeta oyale oyariru; ’di ovu kabiloago ’ba ’bazu ndu alatararuri ma esele Musaniruri, ekile Yehovani azile Musa ma tiarile. 30#Efu 29:21; 30:30; Kal 3:3; 1 Pet 1:2Musa nga di odu osule osuri ma azi ’du, ari pari edeta edezuri ma driari be, nga eri oya Aroni pi ma dria bongo erini be, anzipi ma dria bongo yini be dria; ’dini eri o’ba Aroni pi ndu alatararu bongo erini be, o’ba vini anzipi ndu alatararu bongo yini be indi. 31#Efu 29:31; Eze 46:20Musa nga di ’yo Aroni pi ma tia anzipi be kini, Emi a’di zani hema ti ecizaniri ma tilia, emi nya eri ’dale mikate ovupi afazu ’ba pezu ndu alatararuri ma aliari be, ekile mani azile kini, Aroni pi ma nya eri anzipi beni-rile; 32#Efu 29:34emi ma eve za acepiri pi mikate acepiri be acisi. 33#Efu 29:30, 35; Lev 14:8; Kal 19:12; Eze 43:25, 26Emi ma fu hema ti ecizaniri ma tiliasi amve o’du aziri ku, cazu o’du emi opezu ndu alatararu ’diyini yi dezuria, a’disiku o’du erini emi opezu ndu alatararu ’diyi nga ovu o’du aziri. 34#Ebra 7:16Ekile e’yoni yi ’yele o’du andre ’dorisirile, Yehova azi e’yo ’yezu ’dini, e’yo onzi emini edezu. 35#Kal 3:7; 9:19; Azi 11:1; 1 Opi 2:3; Eze 48:11; 1 Tim 1:18; 5:21Emi ma te hema ti ecizaniri ma tilia o’du aziri, etusi inisi dria, e’yo Yehovani azileri ’yezu, emi kazu odrazu ku; a’disiku azi ma tia ’dinile. 36Aroni pi anzipi be, yi nga e’yo dria Yehovani azile geri Musa vusiri ’ye ra.

Currently Selected:

'Ba Levini 8: LB66

Highlight

Copy

Compare