'Ba Levini 21
21
Kuhani pini ovuzu alatararuri
1 #
Lev 5:2; Eze 44:25 Yehova ’yo Musa tia kini, Mi ma ’yo Aroni anzipi kuhaniru ’diyi ma tia, ’yozu kini yi ma alu ma eza i ’ba drapi ’bo ’ba ini ma eselia ’diyi ma e’yosi ku; 2ma eza i kiri lu ori’ba ini ogogori ma e’yosi, i andri pisi, ati pie, mvi pie, zi pie, adri pie, 3amvipi aliriaru ovupi eri vu ogogori pie, a’disiku muni nga agupia ku; eri ma e’yosi eri eco i ezazaru. 4Eri ma eza i ku, ka tro eri ambo ori’ba ini ma eselia ti, eri ma eza i alatara kokoru ku. 5#Lev 19:27-28; Azi 14:1; Eze 44:20Yi ma fa yi ma dribi kuzu tuaru ku, ma fa vini yi ma tibi ma kala ku, ma oli vini yi rua aluni ku. 6#Efu 20:7; Lev 18:21; 19:12; Azi 5:11; Zab 15:4; Mat 5:33-37; Yak 5:12; Lev 3:11Yi ma ovu alatara Mungu yiniri dri, ma eza Mungu yini ma ru ku; a’disiku yi edeta edele acisi ’diyi ede, adani Mungu yiniri ma enya; e’yo ’disi yi ma ovu alatararu. 7#Eze 44:22; Azi 24:1, 2Yi ma ’du oku awuoururi, kani alatara kokoruri ku; ma ’du vini oku agupini drole rari ku indi; kuhanini ovule alatararu Mungu ini dririsi. 8#Lev 20:7, 8; Isa 43:15E’yo ’disi mi ma pe eri ndu alatararu ani, a’disiku eri enya fe Mungu minirinini; eri ma ovu alatararu mi dri; a’disiku ma Yehova mi ’bapi alatararuri, ma alatararu. 9#E’do 38:24Te kuhani ma azi ma zamva ka i eza alisi, eri eza i ati alatara kokoruni; ma eve eri acisi. 10#Efu 29:29; Kal 35:25; Efu 28:2; Lev 10:6Kuhani ambo agapi ra adripi ini ma eselia, ’bani odu efizari osule eri ma dria, yini ’bale ndu alaru bongo suza nde ’diyi suzuri, ma ku dribi ini guraru ku, ma osi bongo ini ku indi; 11#Kal 19:14eri ma fi avu vu aluni ku, ma eza i ku, ka ovu i ati’i kani andri’i ti; 12#Lev 10:7; Efu 28:36; Lev 8:9, 12, 30eri ma fu vini pari alatararuriasi ku, ma eza vini Mungu erini ma pari alatararuri ku; a’etisiku ’baza ndu alaru Mungu erini ma odu osule osuriniri ovu eri ma dria ci: ma Yehova’i. 13#Eze 44:22Eri ma je zamva agupi nipi nga kuri okuru. 14Te awuziou pi, oku agupini drole rari pie, oku alatara kokoruri pie, oku awuoururi pie, ’dini ’diyi ma je ku; te eri ma je zamva suru ini ma eselia agupi nipi nga kuri i ma okuru’i, 15#Rum 12:1; 1 Kor 3:16, 17; Efe 5:17; 1 Tes 4:1-8eri ma eza i ma ori ori’ba ini ’diyi ma eselia ku; a’disiku ma Yehova eri ’bapi alatararuri’i. 16Yehova ’yo Musa ma tia kini, 17#Kal 16:5; Zab 64:4Mi ’yo Aroni ma tia ’dini, Ori i mini ma eselia a’bianzi yini vusi dria, ’ba ovupi nyebileko be i ruaari aluni ma esi ogogo Mungu ini ma enya fezuni ku. 18#Lev 22:23A’disiku ’ba nyebileko be i ruaari aluni ma esi ogogo ku: ’ba mile kokoruri, kani ’ba acozaruri, kani ’ba omvu be akpafuari, kani ’ba afani efuzu eri ma ruaa ereniruri, 19kani ’ba pa be nyozaruri, kani dri be nyozaruri, 20#Azi 23:1kani ’ba ngukua ongurua beri, kani ’ba zopi ku atrupi atruri, kani ’ba mile be fularuri, kani ’ba ayiribeni nyaleri, kani ’ba bileofa be ruaari, kani ’ba otufinini drale rari; 21kuhani Aroni ma ori’ba ma eselia ’ba nyebileko be i ruaari aluni ma esi ogogo edeta Yehovani ’bani edele acisi ’diyi edezu ku; eri ovu nyebileko be i ruaa, eri ma esi ogogo Mungu ini ma enya fezuni ku. 22#Lev 2:3, 10; 22:10; Kal 18:19Te nyazaruni eri nga Mungu ini ma enya nya ra, ada afa alatatararu agapi rari pi alatararuri be iri tro, 23te eri ngani fi bongo jo ale alizuri vualeru ku, kani ma esi vini pari edeta edezuri vu ogogo ku, erini ovule nyebileko be i ma ruaarisi, eri ma eza ani pari alatararu mani ’diyi ku; a’disiku ma Yehova yi ’bapi alatararuri’i. 24Musa ’yo ’dini Aroni pi ma tia, anzipi be, anzi Israelini ’diyi pie dria.
Currently Selected:
'Ba Levini 21: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
