'Ba Levini 15

’Ba ala virurini razu ruania ’diyi

1Yehova ’yo Musa pi ma tia Aroni be kini, 2#Lev 22:4; Kal 5:2; 2 Sam 3:29; Mat 9:20; Mar 5:25; Luk 8:43Emi ’yo anzi Israelini ma tia kini, Afa ka ra ’ba azini ma ruaasi viru, ’ba nde ovu alatara kokoru afa viruni ralerisi. 3Alatara akoni vini ralerisiri eri ’dini: eri alatara akoni afa ka ra ruaniasi ’dani, kani ka ti ku razu ruaniasi ’bo ti. 4Afa ka ra ’ba ma ruaasi, gbolo dria erini lazu drinia ’diyi ovu ani alatara kokoru; afa dria erini rizu drinia ’diyi ovu vini alatara kokoru indio 5#Lev 11:25; 17:15; Ebra 9:10’Ba dria alu alu gboloni felopiri ma oji bongo ini, ma oji i rua yisi, ma ovu alatara kokoru cazu kpere ondresi. 6’Ba dria alu alu ripi afa ’ba afa viruni razu ruaniarini rizu drinia ’diyi ma driari ma oji bongo ini, ma oji i rua yisi, ma ovu alatara kokoru cazu kpere ondresi. 7’Ba dria alu alu ’ba afa viruni razu ruaniari ma rua elopiri ma oji bongo ini, ma oji i rua yisi, ma ovu alatara kokoru cazu kpere ondresi. 8#Kal 12:8; Yob 30:10; 2 Kor 7:1’Ba afa viruni razu ruaniari ka cucu wu ’ba alaru ma ruaa, ’ba nderi ma oji bongo ini, ma oji i rua yisi, ma ovu alatara kokoru cazu kpere ondresi. 9Enyi ’bale anyapa ngukua rizu driniari ’ba afa viruni razu ruaniarini rizu drinia ’diyi dria alu alu ovu ani alatara kokoru. 10’Ba dria alu alu afa te erini rizu driniari elopiri ma ovu alatara kokoru cazu kpere ondresi; azini ’ba afa ’dinile ’diyi ’dupi jipiri ma oji bongo ini, ma oji i rua yisi, ma ovu alatara kokoru cazu kpere ondresi. 11#1 Kor 15:33’Ba dria alu alu ’ba afa viruni razu ruaniarini elole de nga ojini i dri yisi kuri, ma oji bongo ini, ma oji i rua yisi, ma ovu alatara kokoru cazu kpere ondresi, 12#Lev 6:28; 11:32, 33Ma ofu imvu sile odrisi ’ba afa viruni razu ruaniarini eloleri ra; te ma oji afazu edele patisi ’diyi dria yisi.

13 # Lev 14:8; Kal 12:14; 19:11 Te ’ba afa viruni razu ruaniari ka eca alaru afa viruni rapi i ruaarisi ’bo, ma pe i dri o’du aziri i ’bazu alaru, ma oji bongo ini; eri ma oji i rua yi ara ma alia, ma ovu ani alaru beni. 14#Lev 14:22, 23; Kal 6:10; Ebra 10:10-14O’du arorisi eri ma o’du i dri a’balau angarakaro iri, kani a’balau o’buru ma anzi iri, ma emu Yehova drilia, hema ti ecizaniri ma tilia, ma fe yi kuhani dri; 15#Lev 14:30, 31; 14:19, 21; Ebra 9:14; 10:1te kuhani ma fe yi edetaru, aluri edeta e’yo onzi edezuriru, aziniri edeta vezaruriru; kuhanini nga di e’yo onzi erini ede Yehova ma drilia, afa viruni rale ruaniarisi. 16#Lev 22:4; 23:10’Ba azini ka agupi yi da i ruaa, eri ma oji i rua yisi pi, ma ovu alatara kokoru cazu kpere ondresi. 17Bongo dria, kani enyi dria, agupi yini rale ruania ’diyi, ma oji yi yisi, yi ma ovu alatara kokoru cazu kpere ondresi. 18#1 Sam 21:4Te oku agupini lazu erisiri, yi iri tro ma oji yi rua yisi, ma ovu alatara kokoru cazu kpere ondresi.

19 # Lev 12:2; Eze 36:17 Afa ka era oku azini ma ruaa, afa raza nde ka ovu a’bini, eri ma ovu ndu alatara kokoru o’du aziri, azini ’ba dria alu alu eri rua elopiri ma ovu alatara kokoru cazu kpere ondresi. 20Afa dria erini lazu drinia ewu erini ovuzu ndurisi ’diyi ma ovu alatara kokoru; afa dria erini rizu drinia ’diyi ma ovu vini alatara kokoru indio 21’Ba gbolo erini elopiri alu alu dria ma oji bongo ini, ma oji i rua yisi, ma ovu alatara kokoru cazu kpere ondresi. 22#2 Kor 7:1; Ebra 10:22’Ba afa ngoni ngori ti erini rizu driniari elopiri dria alu alu ma oji bongo ini, ma oji i rua yisi, ma ovu alatara kokoru cazu kpere ondresi; 23ka ovu gboloni, kani afa azini erini rizu driniari, ’ba ka eri elo ra, eri ma ovu ’ani alatara kokoru cazu kpere ondresi. 24#Lev 20:18Te agupi azini ka la eri be, alatara ako erini ovuzu nduri ka i ebi agu nde ma ruaa, eri ma ovu alatara kokoru o’du aziri; azini vini gbolo dria erini lazu drinia ’diyi nga ovu ani alatara kokoru indio 25#Mat 9:20; Mar 5:25; Luk 8:43Te oku azini ma ruaa ari ka ra o’du kakau, ka ovu ewu erini adrizu ovuzu ndu alatara kokoru a’bi suzurisiri’i ku, kani ka ra eri ruaa o’du izu aga ewu erini adrizu ovuzu ndu alatara kokoru a’bi suzurisiri ra, ka’dini o’du arini razu eri ma ruaasi ’diyisi dria eri ma ovu ndu alatara kokoru; ekile ewu erini adrizu ovuzu ndu alatara kokoru a’bi suzu ’diyisirile, eri ovu alatara kokoru. 26Gbolo erini lazu drinia o’du dria arini razu eri ma ruaasi ’diyisiri dria alu alu ma ovu eri dri ekile gbolo erini lazu drinia ewu erini ovuzu alatara kokoru a’bi suzurisirile; azini vini afa dria erini rizu drinia ’diyi ma ovu ndu alatara kokoru, ekile alatara ako ewu erini adrizu a’bi suzurisirile. 27Te ’ba dria alu alu afa ’dinile ’diyi elopiri ma ovu ani alatara kokoru, ma oji i ma bongo, ma oji i ma rua yisi, ma ovu alatara kokoru cazu kpere ondresi. 28Te eri ka eca alaru ari rapi i ma ruaarisi ’bo, ka’dini ma pe i dri o’du aziri, te ’di ma vutia eri ma ovu alaru. 29O’du arorisi eri ma o’du a’balau angarakaru ’diyi iri, kani a’balau o’bururi ma anzi ’diyi iri, ma eji yi kuhani dri, hema ti ecizaniri ma tilia. 30#Rum 3:25; 2 Kor 5:18, 19; Efe 1:7; 2:12-22; Kol 1:19-22; Ebra 2:17; 9:14; 10:1; 1 Yoh 1:2, 7; 2:1Te kuhani ma fe aluri edeta e’yo onzi edezuriru, aziniri edeta vezaruriru; kuhanini nga di e’yo onzi erini ede Yehova ma drilia, arini rale alatara kokoru eri ma ruaasirisi. 31#Lev 11:47; Azi 24:8; Eze 22:26; 44:23; Kal 5:3; 19:13, 20; Eze 5:11; 23:38; 1 Kor 3:17’Dini emi nga anzi Israelini ’diyi ma esele co alatara ako yini be ra, yi kazu drazu alatara ako yini ma alia ku, yini hema mani ovupi yi ma eseliari ezalerisi. 32’Diri azita ’ba afa viruni razu ruaniari pini ’ba agupi yini efuzu eri ma ruaasi erini ovuzu ani alatara kokoruri pie; 33oku ovupi azoru alatara kokoru a’bi suzasiri pie; adaru ’ba dria kani agupiru kani okuru, afani razu yi ma ruaasi ’diyi pi dri, ’ba lapi oku alatara kokoruri beri be.

Currently Selected:

'Ba Levini 15: LB66

Highlight

Copy

Compare