Yosua 18

Angu fele suru acepi ’diyi driri

1 # Yos 19:51; 21:2; Lip 21:19; 1 Sam 14:3; Zab 78:58-60; Lip 18:31; 1 Sam 1:3, 24; 4:3, 4 ’Ba ongulumuru dria Israeli anzipiruri nga yi oku tualu Siloa, yi nga hema ti ecizaniri aso ’daa; te angu nderi ovu ndezaru yi ma drilia ’bo. 2Te Israeli anzipi vile suru ace aziri, angu esele yini isupi nga ku ’diyi. 3#Lip 18:9; O’be 2:2-6; Zef 3:16; Mat 20:6; Yoh 6:27; Fil 3:13, 14Yosua nga bani ’yo anzi Israelini ma tia, kini, Emi drini aka ovusi ’dini cazu ewu ngopi, emini tezu fikokoru angu Yehova Mungu emi atapini ndra fele emi dri ’diri nyazu kuru beni ya? 4Emi ma pe di ’ba na na suru vusi, ma nga yi ti pe, yi ma nga, ma aci angu nde ma alesi, yi ma si angu nde ma e’yo ani awuruso yini vusi, yi ma nga di emvi ma vu ndo. 5#Yos 15:1; 16:1-4Yi ma awa eri esele be aziri, ’ba Yudani ma adri esele yini be ’dani kala urulerua, suru Yusufuni indi ma adri esele yini be kala andralerua. 6#Yos 14:2Emi ka nga de angu ma e’yo osizu ’bo, ma efu esele anguni aziri, emi ma eji di ma dri osiza nde ’diyi ’doa; mani bani ngazu di odrisi ’bezu emi dri Yehova Mungu emini ma milia dia. 7#Yos 13:33; Kal 18:20; Azi 10:9; 18:1; Eze 44:28; Yos 13:8’Ba Levini ngani esele anguni isu emi eselia ku, azi edeta edezu Yehova dririni ovule awuruso yinirisi; azini indi ’ba Gadini piyi, ’ba Rubenini pie, suru Manase vileri ma ali be, yi bi awuruso yini Yoridani tia ’aa’dasi kala etuni efuzurialeru ’bo, Musa ati’bo Yehovanini fele yi driri. 8’Ba ’diyi nga di dri ko mu ani: te Yosua azi ’ba mupi angu osipi ’diyi ma tia kini, Emi ma mu, emi ma aci angu ’ diri ma alesi, emi ma osi di e’yoni yi ci, vilerisi emi ma emvi ma vu ndo; te ma’i ma nga di odrisi ’be emi dri Yehova ma milia Siloa ’doa. 9’Ba ’dayi nga di mu ra, yi nga aga angu nde ma alesi, yi nga eri ma e’yo osi buku alia aku vusi aku vusi, eri ma efu angu esele aziri beni; yi nga di mvi pari ’bani hema asozuria Yosua vu Siloa ndo. 10#O’be 16:33Yosua nga di odrisi ’be yi dri Yehova ma milia Siloa; Yosua awa di angu anzi sraelini dri esele yini vusi ’dale ra. 11Odrisi nga ’de Benyamini anzipi ma dria enyati yini vusi, angu odrisi ndeni fele yi driri ma esele e’do fu anzi Yudani pi ma eselia Yusufu anzipi be ’disi. 12#Yos 16:1Lokiri yini andraleruri e’do yi ara Yoridania; lokiri nde nga tu Yeriko ma tia kala andralerurisi, idri i tuzu angu oni eseliaria etuni ’derialeru; efuza asizaniri roko Beti-aveni vileria. 13#E’do 28:19; Lip 1:23; Yos 16:3Engazu ’darisi lokiri nde idri i cazu Luzia, Luzi tia dri fezu uruleru (Luzini bani Beteli’i); angu ma lokiri si vini Ataroti-adaria, oni ovupi Betihoroni eleri ma kala uruleruri ma tia. 14#Yos 9:17; 1 Sur 13:6Vilerisi lokiri idri vini i ti cozu kala etu ’devuleru luzu uruleru engazu oni ovupi Beti-horoni ma drilia kala uruleruriasi, efuza asizaniri ovu Kiriati-baalia (aku nde bani Kiriati-yearimu’i) ovupi aku Yuda anzipiniri. ’Diri bani kalati woko etuni’derialeruri’i. 15#Yos 15:9Kalati woko urulerini e’do Kiriati-yearimu ma kalati asizuria; lokiri nde enga ’dalerisi fu kala etuni ’derialeru, fu cazu yi a’di Nefitoaniria; 16#Yos 15:8; 2 Opi 23:10; 2 Sur 28:3; 33:6; Isa 30:33; Yer 19:2; 32:35engazu’darisi lokiri si va cazu oni ovupi a’bu Hinomu mvini driliari ma kalati asizuria, oni nde eri a’bu Refaimunia andraleru; si vini a’bu Hinomu vusi angu ’ba Yebusini ma tiasi uruleru, idri vini i sizu Eni-rogelia; 17#Yos 15:6idri i ti cozu andraleru fuzu Eni-semesia, efuzu cazu vini kpere Geliloti i otipi angu tuza Adumimuni beria; vilerisi si kata Bohani Rubeni mviniria; 18engazu ’darisi idri i agazu kala andraleru Araba vuleruriasi, vilerisi elu vini i Arabaa ’dia; 19Lokiri ma vu aga vini kpere Beti-hogila tiasi kala andraleruria; fuza asizaniri ca oji andraleru Miri A’iruniria Yoridani ma asiza drile fepi uruleruria: ’diri bani lokiri uruleruri 20Te Yoridanini eri ma lokiri woko etuni efurialeruri’i. ’Diri ndra angu Benyamini ma anzipini yini isule awurusoru enyati yini vusi, lokiri ageini ecizuri vusiri.

21 # Yos 2:1; 6:26; 1 Opi 16:34; Luk 10:30; 19:1; Yos 15:6 Aku ambo ambo suru Benyamini anzipini isule awurusoru enyati yini vusi ’diyi yi ’di: Yeriko pi, Beti-hogila pi, Emeki-kezizi pi, 22Beti-araba pi, Zemaraimu pi, Beteli pi; 23Avimu pi, Para pi, Ofira pi, 24#Yos 21:17; Lip 19:12-16; 1 Sam 15:34; Ezr 2:26; Isa 10:29Kefari-amoni pi, Ofini pi, Geba pie; yi bani aku ambo ambo mudri drini iri, aku nyiri nyiri yini ’diyi be: 25Gibeoni pi, Rama pi, Beeroti pi, 26Misipe pi, Kefira pi, Moza pi, 27Rekemu pi, Iripeeli pi, Tarala pi, 28#2 Sam 21:14; E’do 46:21; 1 Sur 7:6; 8:1; ’Yeta 17:26Zela pi, Elefu pi, Yebusi (bani Yerusalemu’i) pi, Gibeati pi, Kiriati pie; yi bani aku ambo ambo mudri drini su, aku nyiri nyiri yini ’diyi be. ’Diri angu Benyamini anzipini isule awurusoru enyati yini vusiri.

Currently Selected:

Yosua 18: LB66

Highlight

Copy

Compare