'Ba E'yo Lipi 'Diyini 12
12
1 #
Lip 8:1
Anzi Efiraimuni oku yi tualu, yi zo muzu angu andraleruria; yi ’yo Yefita ma tia, Mi zo ndra mu a’di ’dizu anzi Amonini be ra, mi omveni ndra ama muzu mi be ku a’disi ya? Ama mi vile jo eve mi dria ’dia acisi. 2Yefita ’yo yi ma tia, Ma’i ’ba ma vile ’diyi be, ama ’di a’di ambo anzi Amonini be; te mani emi omveria emi pani ndra ma yi ma dria ku. 3#1 Sam 19:5; 28:21; Yob 13:14; Zab 119:109; Rum 16:4; Eceza 12:11Te ma ka ndre emi pani ma ku, ma ji di ma adi dra dri, ma zo mu a’di ’dizu Amoni anzipi be, azini Yehova fe yi ma dria ra; emi di emu ma vu o’du ’disi a’di ’dizu ma be a’disi ya? 4#1 Sam 25:10; Zab 78:9Yefita nga di ’ba Gileadia ’diyi oku dria tualu, yi nga a’di ’di ’ba Efiraimuni be; ’ba Gileadia ’diyi ofu ’ba Efiraimuni, a’disiku yi ’yo, Emi ’ba Gileadini, emi ’ba Efiraimuni apapi ra, ovupi Efiraimu pi ma eselia agadua Manase be ’diyi. 5#Yos 22:11; Lip 3:28; 7:24’Ba Gileadia ’diyi yi pa kiji yi Yoridanini zozu ’diyi Efiraimu vualeru. Te eri ovu ’dini, ’ba Efiraimuni apapi ’diyi ma azi ka ’yo, Mi fe ma zo ’aa’dasi fo! ’ba Gileadia ’diyi nga di ’yo tinia, Mi ’ba Efiraimuni ya? Eri ka ’yo, Yo; 6yi nga di ’yo eri tia, Mi ’yo curu’do Sihiboleti; te eri ’yo Siboleti, erini ndra ecole eri omvele kilili kurisi; ka’dini yi nga eri bi ci, fu eri kiji Yoridani zozuria ani. ’Dini ’ba Efiraimuni o’de etu ’dasi alifu kali su drini iri.
7Yefita nga e’yo ’ba Israelini li eli azia. Yefita ’ba Gileadiari dra di ra, sa eri aku amboru Gileadia ’diyi ma azi ma alia.
Ibizani pini ’ba Israelini ma e’yo lizu, Eloni pie, Abidoni pieri
8Eri ma vutia lbizani ’ba Betelehemuari li e’yo ’ba Israelinini. 9Eri ovu ndra agupianzi be kali na; ope ezoanzi erini kali na ma ti muzu angu andinia, te eji ezoanzi kali na engazu angu andinia agianzi erini dri. Eri li e’yo Israelini eli aziri. 10Ibizani dra ra, sa eri Betelehemua. 11Eri ma vutia Eloni ’ba Zebulunini li e’yo Israelinini; li e’yo Israelini eli mudri. 12Te Eloni ’ba Zebulunini dra ra, sa eri Aiyalonia angu Zebuluniniria. 13Eri ma vutia Abidoni Hileli ’ba Piratonini ma mvi li e’yo Israelinini. 14#Lip 5:10; 10:4Eri ovu agupianzi be kali su, azini anzi ma anzi be kali na, nzupi akanya kariaru kali azirisi ’diyi; eri li e’yo Israelini eli aro, 15#E’do 14:7; Efu 17:8; Lip 3:13; 5:14Te Abidoni Hileli ’ba Piratonini mvi dra di ra, sa eri Piratoni angu Efiraimuniaria, angu oniru ’ba Amalekiniria.
Currently Selected:
'Ba E'yo Lipi 'Diyini 12: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
