'Ba E'yo Lipi 'Diyini 11
11
1 #
Lip 6:12
Te Yefita ’ba Gileadiari ovu ’ba okporu asi teza beri, te eri oku awuouru ma mvi, Gileadi ti Yefita ’ndeni, 2Azini oku Gileadini ti agianzi eri dri; oku erini ma anzipi ’diyi ka zo ’bo, yi dro Yefitani ra, ’yo tinia, Mi ngani awuruso a’i ama ati ma ori’ba ma eselia ku, mini ovule oku andini ma mvarisi. 3#Lip 9:4; 1 Sam 22:2; 30:22-24; Yob 30:1-10; ’Yeta 17:5Yefita nga di apa i adripi vurisi ra, mu ovu angu Tobua; ’ba toko toko ’diyi oku yi Yefita vu, yi fu muzu eri be. 4Te eri nga di eca e’yo ’diri ma vutia were ’dini, anzi Amonini ’di! a’di ’ba Israelini be. 5Te eri ovu ndra ’dini, Amoni anzipi ka a’di ’di ’ba Israelini be, ’ba ’wara Gileadia ’diyi mu Yefitani ejizu engazu angu, Tobua ra; 6yi ’yo Yefita ma tia; Mi emu ovuzu opi amaniru, ama ma ’di a’di anzi Amonini be ani beni. 7#E’do 26:27Te Yefita nga di ’yo ’ba ’wara Gileadia ’diyi ma tia, Emi nguni ndra ma, ma drozu ma ati ma joarisi ku ya? Emi curu’do emu ma vu, emini ovule candi aliarisi a’disi ya? 8#Luk 17:4; Lip 10:18; E’do 31:50; Yer 29:23; 42:5; Mik 1:2’Dini ’ba ’wara Gileadia ’diyi ’yo di Yefita ma tia, Ama oja di ama mi vu dika curu’do ’bo, ’dini mi ma mu ama be a’di ’dizu Amoni anzipi be ani; mi nga ovu amani opiru ’ba ovupi Gileadia ’diyi ma drilia dria. 9Yefita nga di ’yo ani ’ba ’wara Gileadia ’diyi ma tia, Emi ka ma eji akua dika, a’di ’dizu anzi Amonini be, azini Yehova ka yi fe ma dria ra, ma nga ovu emi drilia ra ya? 10#Rum 1:9; 1 Tes 2:5’Ba ’wara Gileadia ’diyi nga di ’yo Yefita ma tia, Yehova nderi nga ovu ’ba e’yo ndrepiriru ama eselia; ama nga ’ye e’yo mini ’yolerile ada ada. 11#Lip 10:17; 20:1; 1 Sam 10:17; 11:15; O’be 16:3Yefita nga di mu ’ba ’wara Gileadia ’diyi be, ’ba nde nga eri ’ba yi ma dri cezu azini opiru yi ma drilia; azini Yefita ’yo e’yo ini dria Yehova ma milia Mizipaa.
12Yefita pe ojio ti opi Amoni anzipi driliari vu kini, E’yo ama eselia mi be, mini emuzu ani a’di ’dizu ma be ma vile anguari ngoni ya? 13#Kal 21:24; E’do 32:22’Dini opi Amoni anzipiniri omvi e’yo ojio Yefitani ti pele ’diyi ma tia kini, A’disiku Israeli, erini efuria angu Misiriniasi, pa ndra ma angu ra engazu Arinonia kpere Yabokia, cazu kpere Yoridania; curu’do e’yo ’disi mi omvi angu ’diyi dika asi anzurusi. 14Te Yefita nga ojio ti pe dika opi Amoni anzipiniri vu, 15#Kal 22:13-15; Azi 2:9, 19; 2 Sur 20:10eri ’yo tinia, Yefita ’yo ’dini: Israeli pani angu Moabuniri kani angu Amoni anzipiniri ku, 16#Kal 14:25; Azi 1:40; Yos 5:6; Kal 13:26; 20:1; Azi 1:46te yini efuria Misiriasi, Israeli aci angu roko driari ma eselia ecazu Miri Ekaruria, yi emu Kadesia indi. 17#Kal 20:1, 14-21Israeli nga di ojio ti pe opi Edomuari vu kini, Ma zi mi tia, mi fe ma ma aga angu nde ma aliasi; te opi Edomuari erini ku. Azini ’dinile indi eri pe ojio ti opi Moabuari vu, te eri leni ndra erizu ku. ’Ba Israelini adri ovu ani Kadesia. 18#Kal 21:4; Azi 2:1-8; Kal 21:11Yi nga di aci angu roko driari ma eseliasi, angu Edomuni pi nazu kalasi kalasi angu Moabuni be, yi nga emu angu Moabuni ma kala etuni efuzuriarisi, nga hema aso woke Arinoni ’aa’dasiria, te yi efini kalati Moabuni ma alia ku, Arinonini ovule kalati Moabunirisi. 19#Kal 21:21-24; Azi 2:26; 3:1-17; Yos 13:8-12Israeli nga vini ojio ti pe Sihoni opi ’ba Amorini, opi Hesiboniari vu; Israeli ’yo tinia, Mi ku ama ma zo, ama zi mi tia, angu mi vileri ma aliasi kpere ma vile angua ani. 20Te Sihoni a’ini Israelini agazu i ma kalasi ku; te Sihoni oku ’ba erini dria tualu, aso hema yini Yahazia, ’di a’di Israeli be. 21#Kal 21:24; Azi 2:33, 34Te Yehova Mungu Israeliniri fe Sihoni pi ’ba erini ’diyi be dria Israeli ma dria, yi ofu yi ra; ’dini ’ba Israelini bi di angu ’ba Amorini, ovupi angu ndea ’diyini. 22Yi bi angu ’ba Amorini ’diyini yiniru engazu Arinonia kpere Yabokia, azini engazu angu roko driaria kpere Yoridania indio 23’Dini curu’do Yehova Mungu Israeliniri ofu ’ba Amorini angu yiniasi ’ba Israelini ma milia ’bo; te mi ma bi yi miniru ya? 24#Kal 21:29; 1 Opi 11:7; Yer 48:7; Efu 23:28, 31; 34:11; Kal 33:50, 54; Azi 7:16, 24; Yos 3:10; 2 Sur 7:20; Zab 44:2, 3; ’Yeta 13:19Mi ngani angu nde Kemosi adrou mi vilerini fele mi driri bi’i ku ya? ’Dinile ’ba Yehova Mungu amanini Ofule angu yiniasi ama milia ’diyi, ka tro adri ’ba ngoni ti, ama nga yi ma angu bi’i. 25#Kal 22:1-6; Azi 23:3, 4; Yos 24:9; Mik 6:5Te curu’do mi afa onyiru Balaki Zipori mvi opi Moabuari agapi rari’i ya? Yi fu ndra yi Israeli be ra ya? ’Ba ndra omba a’di i ’dizu yi be ra ya? 26#Azi 2:36Israelini ndra ovuria Hesiboni pi ma alia aku erini be, Aroeri pie aku erini be, aku ambo ambo dria ovupi Arinoni ma kalaa ’diyi pie, eli turu na, emi obini ndra yi dika etu ’dasi ku a’disi ya? 27#E’do 18:25; Yob 9:15; Yoh 5:22, 23Ka’dini ma ezani mi vu ku, te mi ’ye ma onzi mi’i, a’di ’dizu ma be; Yehova ’Ba ma e’yo Lipiri ma li e’yo o’du ’disi anzi Israelini piyi ma eselia anzi Amonini beni. 28Te opi Amoni anzipiniri erini e’yo ndra Yefitani ti pele ’diyi aluni ku. 29#Lip 3:10Orindi Yehovani nga di eca ’Yefita ma dria, eri zo Gileadi piasi Manase be, zo vini Mizipa Gileadiariasi, engazu Mizipa Gileadiariasi eri zo anzi Amonini vu. 30#E’do 28:20; Kal 30:2; 1 Sam 1:11; Ekl 5:1, 2Te Yefita so oyo Yehova vu ra kini, Mi ka nga anzi Amonini ’diyi fe ma dria adaru ra, 31#Lev 27:2; 1 Sam 1:11eri nga di ovu ’dini, afa dria efupi ma vile jotilea dri fuzu ma be, mani emviria asi anzuru be engazu Amoni anzipi vuri, eri nga ovu Yehovani, ma nga eri ede edeta vezauriru ra, 32’Dinile Yefita nga di zo mu anzi Amonini vu, a’di ’dizu yi be; te Yehova fe yi eri ma dria. 33#Eze 27:17Eri nga yi ofu engazu Aroeria kpere mini ecaria Minitia, ofu aku ambo ambo kali iri ’diyi kpere Abeli-keramimua futa amborusi. ’Dinile anzi Amonini ovu di ndezaru anzi Israelini ma drilia ra.
34 #
Lip 10:17; Efu 15:20; 1 Sam 18:6; Zab 68:25; Yer 31:4 Te Yefita nga emu Mizipaa i vile joa; te mi lu, eri ma zi efu dri fuzu eri be ari were aiyoro be ruaari eri ma dria, emu ongo tusi; isu de eri ovu zamva erini alu kodikodi; eri be agupiamva kani zamva azini aluni yo. 35#Kal 30:2; E’do 37:29; 42:36-38; 2 Sam 13:30, 31; 18:33; Yob 1:20; Ekl 5:2-5; Zab 15:4Eri nga eca ’dini, eri ka eri ndre ra eri osi bongo ini ra, eri ’yo, Eyowaye, ma zi la! mi omvi ma va tu, mi ’ba ma ecandipi ’diyi ma azi; mani ma tile zile Yehova dri ’borisi, te ma econi oja vile ku. 36#Kal 30:2; 2 Sam 18:19Eri ’yo tinia, Ma ati, mi zi mi tile Yehova dri ’bo; mi ’ye ma be ekile efupi mi tilia ’borile, a’disiku Yehova ofe mi dri aroti ari’ba mini ma ruaa, ada anzi Amonini ma ruaa. 37#E’do 30:23; Luk 1:25Eri ’yo i ati ma tia, Mi ku afa ’di ma ’ye i ma vu ani; mi ku ma ma ovu nga mba iri, ’dini ma ma mu sizu va oni eselea, e’yo mani ovuzu aliriaruri wuzu, ma’i ma agyi be. 38’Dini eri ’yo ra, Mi mu. Eri pe tini ovuzu nga mba iri; eri mu ra, eri’i agyi erini pie, mu wuzu aliria erinisi oni dria. 39#1 Sam 1:22Eri nga eca mba iririni i deria eri emvi i ati vu, eri ’ye eri be ekile oyo erini solerile ra. Te eri nini nga de agupi ku. E’yo nde ndra azitaru Israeli ma alia, kini, 40ezoanzi Israelini mu eli vusi eli vusi avico ’bazu Yefita ’ba Gileadini ma zi ma e’yosi o’du su eli alu alu ma alia.
Currently Selected:
'Ba E'yo Lipi 'Diyini 11: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
