'Ba E'yo Lipi 'Diyini 1
1
Yuda pini Simeoni be Adoni-bezekini pazuri
1 #
Efu 28:30; Kal 27:21; Lip 20:18; 1 Sam 23:9 Eri nga eca drata Yosuani ma vutia ’dini, anzi Israelini zi Yehovani kini, A’dini nga tu amani ’ba Kananini ’diyi vu oko, a’di ’dizu yi beni ya ? 2#E’do 49:8Yehova nga ’yo kini, Yudani nga tuni; mi lu, ma fe angu nderi eri ma dria ’bo. 3#Ekl 4:9; Mar 6:7; 1 Kor 12:26; Gal 6:2Yuda nga di ’yo i adripi Simeoni ma tia, Mi etu ma be fi awuruso ma vileria, ’dini ama ma mu a’di ’dizu ’ba Kananini be; ’dinile indi ama nga mu mi be awuruso mi vileria ndo. ’Dinile Simeoni mu di eri be ra. 4#Azi 9:1; Zab 44:2; 78:55Yuda tu di ra, Yehova fe ’ba Kananini ’diyi ’ba Perizini pie yi ma dria; yi ofu ’ba yi ma eselia alifu mudri Bezekia. 5Yi isu Adonibezeki Bezekia, yi ’di a’di eri be, yi ofu ’ba Kananini piyi ’ba Perizini pie. 6Te Adoni-bezeki apa ra; yi dro vutini, bi eri ra, oli eri ma driago pi, paago pie ra. 7#Lev 24:19; Zab 109:16; O’be 1:31; Mar 4:24; Yak 2:13Adoni-bezeki nga di ’yo ra, opi kali aziri ’bani driago yini olile paago pie ’bo ’diyi adri ndra nyaka yini oku mesa mani ma etia; ekile mani ’yelerile, ’dini Mungu ofe arotini masi ’do.
Yudani Yerusalemu pi agazu Hebironi beri
8 #
Yos 15:63
Anzi Yudani nga a’di ’di Yerusalemu be, bi eri ra, fu eri sei ma sisi ra, ’ba aku nde ma ti acisi ra. 9#Yos 10:12, 36; 11:21Vutinia anzi Yudani si mu a’di I’dizu ’ba Kananini ovupi oni ruaa ’diyi pi be, angu Uruleruria ’diyi pie angu eleria ’diyi pie. 10#Yos 14:15Azini Yuda mu a’di ’dizu ’ba Kananini ovupi Hebironia ’diyi be (de isu okorisi Hebironi ma ru Kiriatiariba’i); yi ofu Sesai pi, Ahimani pie, Talimai pie ra.
Otinielini Debiri agazu azini Akisani ’duzu i ma okururi
11 #
Yos 15:15
Engazu ’daarisi eri mu ’ba ovupi angu Debiria ’diyi vu a’di ’dizu (Debiri ma ru ndra okorisi Kiriati-seferi’i). 12Te Kalebu nga ’yo ra, ’Ba ngapi aku Kiriati-seferini ndepi ombasi eri bipi rari, ma nga ma zi Akisani fe eri dri okuru. 13#Lip 3:9Te Otinieli, Kalebu ma adripi eri vutia Kenazi’iri ma mvi bi eri ra; eri nga di i zi Akisani fe eri dri okuru ani. 14#Yos 15:18Nga eca’dini, zamva ’dirini caria agupi vile ’bo, eri omi eri amvu a’izu ati dri; ’dinile Akisani esiria va akanya driarisi, Kalebu nga zi tinia, Mi le a’dini ya ? 15#E’do 33:11; 1 Sam 25:27; Ebra 6:7Eri nga ’yo tinia, Mi ma fe ma dri afa feza asi ndrizaniri; mini ma ’bale angu Uruleru ma alia ’borisi, mi fe ma dri yi a’di indi fo! Kalebu nga ani eri dri yi a’di ururi pi fe andrari be iri tro.
Angu Yuda pini opale ombasi Benyamini be ’diyi
16 #
Kal 10:29-32; 24:21, 22; Lip 4:11; 1 Sam 15:6; 1 Sur 2:55; Yer 35:2; Azi 34:3; 2 Sur 28:15; Kal 21:1; 10:32 e ’ba Kenini, Musa oti ma anzipi, efu etu uru engazu aku amboru ovupi itu pati beria, anzi Yudani pie, fi angu didi Yudani ovupi Aradi ma kala uruleruria; yi mu ra, ovu ’ba nde ma eselia. 17#Kal 21:3; Yos 19:4Te Yuda pi nga di mu i adripi Simeoni be, yi ofu ’ba Kananini ovupi Zefatia ’diyi, ja eri ma dri teketeke ra. ’Da aku amboru nderi ma ru Horima’i. 18#Yos 11:22; 13:3; 15:47; Lip 16:1; 1 Sam 6:17Yuda bi vini Gaza pi kalatini be, Asikeloni pie kalatini be, Ekironi pie kalatini be dria. 19#E’do 39:21; Yos 1:5, 9; 14:12; 2 Sam 5:10; 2 Opi 18:7; Rum 8:31; Yos 17:16Te Yehova ovu ndra Yuda be, eri dro ’ba ovupi oni ruaa ’diyi ra, te eri econi ndra ’ba e’bu alia ’diyi drozaru ku, yini ovule gari ombani edele ayasi ’diyi berisi. 20#Yos 15:13-14; Kal 14:24; Azi 1:36; Yos 14:9, 13Yi fe Hebironini Kalebu dri, ekile Musani ndra ’yolerile; eri dro anzi Anakini na ’diyi engazu ’diarisi ra. 21#Yos 15:63; 18:28; 2 Sam 5:6; 1 Sur 11:4Te anzi Benyaminini awini ’ba Yebusini ovupi Yerusalemua ’diyi dro ku; te ’ba Yebusini ovu anzi Benyaminini be tualu Yerusalemua kpere o’du ’disi. Yusufuni Betelini pazu ombasiri 22Te ori’ba Yusufuni ’diyi tu mu a’di ’dizu Beteli be indi; Yehova ovu yi be. 23#Yos 2:1; 7:2; Lip 18:2; E’do 28:19Ori’ba Yusufuni ’diyi pe ’ba ti Beteli ma orile gazu. (Isu de aku nde ma ru ndra okorisi Luzi’i.) 24#Yos 2:12; 1 Sam 30:15’Ba angu ma orile gapi ’diyi ndre ’ba alu efu aku ndeasi, yi ’yo eri ma tia, Mi ece amani geri fizu aku amboru ’diriari fo, ama zi mi tia, ama nga mi ’ye asi ndrizasi ani. 25Eri ece yi dri geri fizu aku ndeari ra; yi fu aku nderi sei ma sisi ra, te yi ku ba nderi fuzu ori’ba erini be dria. 26Agu nde mu ’ba Hitini vile angua, eri si aku ’daa, ’da runi Luzi’i; eri aku nde ma ru kpere o’du ’disi andru.
Angu Manase pini opale ombasi Efiraimu be ’diyi
27 #
Yos 17:11-13; 21:25 Te Manase droni ndra ’ba ovupi Bete-seania aku ambo ambo erini be ’diyi pi ku, ’ba ovupi Taanakia aku ambo ambo erini be ’diyi pie, ’ba ovupi Doria aku ambo ambo erini be ’diyi pie, ’ba ovupi Ibileamua aku ambo ambo erini be ’diyi pie, ’ba ovupi Megidoa aku ambo ambo erini be ’diyi pie dria; te ba Kananini yi le ndra ovuzu angu nderi ma aliani. 28Te eri nga eca ’dini, ’ba Israelini ka eca okporu ’bo, yi ’ba ’ba Kanania ’diyini azi ngazu ati’baru, te yi awini yi dro dria teketeke ku. 29#Yos 16:10; 1 Opi 9:16Efiraimu droni vini ’ba Kananini ovupi Gezeria ’diyi ku; te ’ba Kananini ovu yi ma eselia Gezeria ’dani.
Angu suru acepi ’diyini opale ombais ’diyi
30 #
Yos 19:15
Zebuluni droni ndra ’ba ovupi Kitronia ’diyi ku, droni vini ’ba ovupi Nahalolia ’diyi ku indi; te ’ba Kananini adri yi ma eselia, oja yi ’ba musoro ’bepiriru yi dri. 31#Yos 19:24-30Aseri droni ndra ’ba ovupi Akoa ’diyi pi, ’ba ovupi Sidonia ’diyi pie, Alabua ’diyi pie, Akizibua ’diyi pie, Helibaa ’diyi pie, Afikia ’diyi pie, Rehobua ’diyi pie dria ku; 32#Zab 106:34, 35te ’ba Aserini ovo ’ba Kananini ’diyi ma eselia, yi ’ba ovupi angu ndea ’diyi; yini ndra yi drole kurisi. 33#Yos 19:38Nafutali droni ndra ’ba ovupi Beti-semesia ’diyi ku, droni vini ’ba ovupi Beti-anatia’diyi ku, te eri adri ’ba Kananini ’diyi ma eselia, yi ’ba ovupi angu nderia ’diyi; te ti, ’ba ovupi angu Beti-semesia azini Betianatia ’diyi oja yi ’ba musoro ’bepi diyiru yi dri. 34Te ’ba Amorini ’diyi omi ’ba Danini ’diyi, dro yi angu oni ruaari ma alia, yini ndra a’ile yini esizu va e’bua kurisi; 35#Yos 10:12; 19:42; Lip 12:12te ’ba Amorini ’diyi le ndra ovuzu oni Heresi ma ruaa, Aiyaloni pia, Saalibimu pie, te kiri Yusufu vile ori’ba ma dri agani, ’dini yi oja yi ’ba musoro ’bepiriru. 36#Kal 34:4; Yos 15:3Kalati ’ba Amoriniri ndra kpere engazu angu tuza Akirabimuaria, engazu kata nde vu kpere uru.
Currently Selected:
'Ba E'yo Lipi 'Diyini 1: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
