Efuza 21

’Ba ati’baru ’diyi ma e’yo

1 # Efu 24:3; Azi 4:14; 6:1 E’yo liza mini ngale ’bale yi ma drilia ’diyi yi ’di. 2#Lev 25:39-46; Azi 15:12; Yer 34:14Mi ka Ebraniou je ati’boru, eri ma nga azi eli azia, te eli aziririsi ma tru eri pirini, ma onze afasi ku. 3Eri ka ndra fi a’dule, ma fu a’dule; ka ndra ovu oku be ka, oku erini ma fu eri be tualu. 4#Lev 25:44Agu eri jepiri ka eri dri oku feni, eri ka agupianzi ti eri dri kani ezoanzi be, oku nderi anzi yini be yi ovu afa agu eri jepirini, i ati’bo nderi ma fu a’dule. 5#Azi 15:16Te ati’bo nderi ka ’yo mgba kini, Ma le ’ba ma jepiri, oku mani pie, anzi mani be; ma leni ma tru ma ku, 6#Efu 12:12; 22:8; Azi 16:18; Zab 82:1; 40:6ka ’dini ’ba eri jepiri ma ji eri Mungu drilia, ejizu jotilea kani jotile kalaa; te ’ba eri jepiri nga bi erini lu aya si ndririsi; eri nga azi nga eri dri ’dani ’dani.

7 # Neh 5:5 ’Ba azini ka zamva ini fe ozi ati’boru, eri ma fu ati’ba agupiru ’diyini fulerile ku. 8Eri ka ayiko fe ’ba eri jepiri dri ku, ndra ’yepi eri ’dupi oku eriniruri’i, ma onze eri onze onze; okpo erini eri fezu jezu ’ba jururu dri yo, a’disiku ’ye eri lokirisi ’bo. 9Ka eri azi mva ini dri okuru, eri ma ’ye eri vu ekile ’bani adrile ’yele ezopi vurile. 10#1 Kor 7:5Te eri ka oku azini bi ti, eri ma fe nyaka erini pi, bongo erini pie, adriza erini oku bizaniri be dria ma anu ku. 11Te eri ka e’yo na ’diyi ’ye eri dri ku, oku nderi nga fu truzaru pirini onzekokoru.

Azita e’yo ’yezu eganasiri ma e’yosi ’diyi

12 # Lev 24:17; E’do 9:6; Kal 35:30; Mat 26:52 ’Ba ka ’ba azini co kai, yi ma fu eri ecekokoru. 13#Kal 35:10-34; Azi 19:1-13; Yos 20:1-9; 1 Sam 24:4, 10, 18Te ’ba ka ’ba azini mba fu aka ku, te Mungu fe eri eri ma driani, ka’dini ma nga pari erini apazuri azi. 14#Kal 15:30; Azi 19:11; Ebra 10:26; 1 Opi 2:28-34; 2 Opi 11:15Te agu ka mu pirimasi ’ba eri jo ejeliari vu eri fuzu lokirisi, mi nga eri nze pari ma dri edeta edezuriarisi ra, ma dra ra.

15’Ba i atini kani i andrini copiri, ma fu eri ecekokoru.

16 # Azi 24:7; E’do 37:28; Efu 22:4 ’Ba azini ka i agyini ogu jezu, te ka eri isu eri ma dria, ma fu eri ecekokoru.

17 # Lev 20:9; Mat 15:4; Mar 7:10; O’be 20:20 ’Ba i atini kani i andrini o’dapiri, ma fu eri ecekokoru.

18Te ’ba ka yi fu yi eselia, ’ba alu ka agyini di onisi, kani drisi, te eri ka dra ku, eri la pari dria va, 19#2 Sam 3:29eri ka enga dika, eri ka ad kali erinisi amve, ’ba eri copiri ngani ovu e’yo liza be ku; te eri ma ofe eri o’du erini ovuzu azoru ’diyi vusi, eri ma omve eri cazu ruani atizu teketekeria.

20 # Lev 25:43; Efe 6:9 Agu ka ati’bo agupiru kani ati’bo okuru erini co kalisi, ka dra eri ma dri agelea, eri nga e’yo onzi isu i dria ecekokoru. 21#Lev 25:45Te ati’bo nde ka la etu alu kani iri, eri ngani e’yo onzi isu i dria ku; a’disiku ati’bo nderi ovu afa erini.

22 # Azi 22:18, 19 Te ’ba ka yi fu yi eselia, ka oku oporovuru ’ye onzi, mva erini ka e’be ani ra, te vutinia dra azini ka e’da ku, adaru eri ngani ece ku ofezu ekile oku nderi ma agupini lile eri ma driarile; te eri nga ofe ekile ’ba e’yo lipirini lilerile. 23Te dra azini ka e’da vutinia ani, ka ’dini mi ma ofe idri ma aroti idrisi, 24#Lev 24:19-20; Azi 19:21; Mat 5:38; 7:2mile ma aroti milesi, si ma aroti sisi, dri ma aroti drisi, pa ma aroti pasi, 25veza ma aroti vezasi, nyibileko ma aroti nyibilekosi, coza ma aroti cozasi.

Azita ’ba afa e’iru ’diyi driri

26 # Kol 4:1 Agu ka ati’bo erini ma mile kani ati’bo okuru erini ma mile co, eri ka dra ra, ma tru eri pirini mile erini ma e’yosi. 27Te eri ka ati’bo agupiru eriniri ma si kani ati’bo okuru eriniri ma si gba, ka ’de ra, ma tru eri pirini si erini ma e’yosi.

28 # E’do 9:5 Ti ka agupi kani oku fu o’yusi, ka dra ra, ma o’be ti nderi onisi, ma nya zani ku; te ti e’i ngani ovu e’yo liza be i dria ku. 29Te ti nde ka ndra adri ovu ombaru oku drio ra, ece e’yo nderi e’i dri ra, te ti, ’ini eri ku, eri fu agupi kani oku ani, ma o’be ti nderi onisi, ma fu ti e’ini indio 30#Kal 35:31Te ’ba ka avuta li eri ma dria, eri ma ofe yini lile eri ma driarile idri ini onzezu. 31Ti nderi ka mvi erini fu kani zi erini fu ra, ma ’ye eri e’yo liza ’diri vusi. 32#Zek 11:12, 13; Mat 26:15; Fil 2:7Ti ka ati’bo agupiru kani ati’bo okuru fu o’yusi, ti e’i ma fe ’ba yi jepiri dri seke i kali na dahabuni, azini ma o’be ti nderi onisi.

33Agu ka ’bile ma ti zi, kani ka ’bile ga te ka tileni ase ku, ti kani akanya ka ’de alenia ani, 34’bile e’ini nga ofeni; eri nga silingi fe anyapa e’i dri, te anyapa avu nderi nga ovu erini.

35’Ba azini ma ti ka ti ’ba azinini fu, ka dra ani, yi nga ti idriruri fe ozi, yi nga ajeni awa yi eselia; yi nga avururi awa indio 36Te yi ka ni ti nderi adri ’ba ofu o’yusi drio ra, te di e’i ’ini eri ku, adaru eri nga ti nderi ma aroti ofe tisi, te ti avuni nga ovu erini.

Currently Selected:

Efuza 21: LB66

Highlight

Copy

Compare