Efuza 10

Dra maturu ombisiri

1 # Efu 7:4, 14; Azi 2:20; Yoh 12:40; Rum 9:18 Te Yehova ’yo Musa tia, Mi, fi Farau vu; te ma ’ba asi erini mbazaru ’bo, ati’ba erini ma asi be, ’dini ma eco eceta mani ’diyi ecezu yi ma eselia beni, 2#Azi 4:9; Zab 44:1; 71:18; Yoe 1:3’dini vini indi mi eco e’yo mani ’yele angu Misirini ’vu ’diyi, eceta mani ’yele yi ma eselia ’diyi be, ecezaru mva mini bilia, azini mva mini ma mva ma bilia indi; ’dini emi ma ni ani ma Yehova ’i beni.

3 # 1 Opi 21:29; 2 Sur 34:27; Yak 4:10; 1 Pet 5:6 Te Musa pi Aroni be yi nga fi Farau vu, yi nga ’yo eri tia kini, Yehova Mungu ’ba Ebranianiri ’yo ’dini, Mi nga ga mi ’ba kokoru ele ma drilia kpere o’du ngopi ya? Mi fe ’ba mani ma mu, ’dini yi ma nga,azi ma dri ani. 4#O’be 30:27; Eceza 9:3Te mi ka ga i geriko feko yi dri si, mi ne, dru ma i nga ombi eji angu mini eselia kpere kalatia, 5#Yoe 2:25te yi nga nyaku ma mile a’bu teke teke, ’ba ngani eco nyaku ma dri nezu ani ku; te yi nga afa jolokoru odrapi anga ku sini kule ’diyi mbe, yi nga pati dria ovupi emi vile angua ’diyi mbe ra, 6#Efu 8:3, 21yi nga ga jo mini ’diyi ma alia tre, ati’ba! mini dria ma jo ma alia tre tre indi, azini jo ’ba dria Misiria ’diyini ma alia tre indi; ekile mi atapini nelei a’bi mini be andra oku engazu ewu yinisi ecazu kpere andru nga kurile. Eri oja i, fu Farau vurisi ra.

7 # Efu 23:33; Yos 23:13; 1 Sam 18:21; Ekl 7:26; 1 Kor 7:35 Ati’ba Farauni ’diyi ’yo eri tia, Agu ’diri nga ovu ama dri embaru kpere o’du ngopi ya? Mi fe ’ba nde ’diyi ma mu, ma nga azi Yehova Mungu yini dri fo! Mi nini nga angu Misirini ja dri ’bori ku ya? 8Te yi nga di Musa pi eji dika Aroni be Farau vu; eci ’yo yi tia, Emi mu di azi nga Yehova Mungu eminiri dri; te a’dipi nga mu munini ya? 9#O’be 3:9; Efu 5:1Musa ’yo ra, Ama nga mu anzi nyiri amani be azini ’ba ’wara amani be; agianzi amani pi ezoanzi amani be, kabilo amani o’biru ’diyi pi ti amani o’biru be indi; a’disiku onyiruni ama ma ’ba omu amboru Yehova dri. 10Eri ’yo yi be, Yehova ma ovu emi be indi ka, ma nga emi ku muzu anzi nyiri emini be ndo. Emi ne, emi ovu e’yo onzi be emi asia. 11’Dini yo! Emi agupi ’wararu ’diyi emi mu azi Yehovani ngazu, te e’yo emini leleri ’di’i. Dro yi Farau driliarisi ra.

12 # Efu 7:19 Te Yehova ’yo Musa tia, Mi eju mi dri angu Misirini dria ombi omvezu, yi ma eca angu Misirini dria, afa engaza dria acepi angu alia sini kuleri mbezu. 13’Dini Musa nga kali ini su angu Misirini dria, te Yehova nga oli engapi etuni efuriari ma ti pe angu nderia etu zu, inisi rra; angu ka ati ’bo oli engapi etuni efuria nderi nga ombi eji. 14#Eceza 9:2-3; Azi 28:38; Zab 78:46; 105:34; Yoe 2:2Te ombi yi ere yi angu Misirini ma dria dria, yi ’de angu nde ma alesi dria, yi ocokoru tu; ndra drio ti, ombi ’dinileni yo, yi ma vutia ti, ngani eca ’dini ku indi. 15#Efu 10:5; Zab 105:35Te yi a’bu nyaku ma dri ci, ’dini angu oja i iniru, te yi mbe afa engaza nyakuari dria patiefi be dria sini kuleri; ibibi aceni aluni ku, kani patini, kani afa engaza amvuari angu Misirini ma alia dria. 16#Efu 9:27Farau nga Musa pi omve Aroni be mbele, nga ’yo ra, Ma ’ye onzi Yehova Mungu eminiri vu, emi vu indio 17#Efu 9:28; 1 Opi 13:6; Yob 34:31E’yo ’disi curu’do ma matu ’ba emi vu emi ku onzi mani kiri pale alu ’dorisi, emi zi Yehova Mungu emini tia matusi, ’dini eri ma ’du dra ’dori kiri ma vusi ra fo. 18#Efu 8:30Te Musa nga fu Farau vurisi ra, nga matu ’ba Yehova vu. 19#Yoe 2:20Te Yehova nga oli okporu tu engapi etuni ’deriari oja ra, eri nga ombi ’du dria, nga yi dro da Miri Ekaruri alia; ombi ngani ace aluani ku angu Misirini ma eselia dria. 20#Efu 4:21; 11:10; Yos 11:20; Rum 2:4, 5; 9:17-22; Yak 1:13-17Te Yehova ’ba asi Farauni mbazaru, eri kuni anzi Israelini ’diyi dri geri muzu ku.

Dra maturu angu bizasiri

21 # Efu 9:22 Yehova nga ’yo Musa tia, Mi eju mi dri uru ’bua, ’dini angu Misirini ma ovu bizaru ini ’bani ecole amale yi ma ruaa rarisi. 22#Zab 105:28; Eceza 16:10Te Musa nga i dri eju uru ’bua, ini inicici iduru nderi nga angu Misirini bi dria o’du pale na; 23#Efu 8:22yi econi yi nezaru yi eselia ku, ’ba aluni econi muzaru pari azinia ku o’du pale na ’diyisi; te anzi Israelini ’diyi ma jo alia dria angu mve ini mve mve. 24#Efu 10:10Te Farau omve Musani kini, Emi mu azi nga Yehova emini dri; te anyapa nyiri ti emini be dria ma ovu ’doa; anzi emini yi nga mu emi beni. 25Te Musa ’yo ra, Mi ma fe ama dri anyapa edeta edezu azini vezu Mungu dri ’diyi, ’dini ama ma ede edeta Yehova Mungu amani dri beni. 26Ti amani dria nga mu ama be; ama ngani ti onyofi aluni ku vileni ku, a’disiku ama ma ’du yi ma eselia azini azi ngazu Yehova Mungu amani dri, te ama nini nga ku kani ama nga azi nga Yehova Mungu amani dri a’di afasi ya, de nga ama cani ’dale ku. 27#Efu 10:20; 4:21; 14:4, 8Te Yehova ’ba asi Farauni mbazaru, kuni yi dri geri muzu ku. 28Te Farau ’yo Musa tia, Mi da mi ma miliarisi ra; mi ne onyiru mi ma ne ma mile dika ku; a’disiku o’du mini ma mile nezurisi mi nga dra ra. 29#Ebra 11:27Musa ’yo ra, Mi ’yo ’yeke! Ma ngani mi nile ndre dika ku.

Currently Selected:

Efuza 10: LB66

Highlight

Copy

Compare