Esiteri 4
4
Esiterini a’izu opini zizu suru inisiri
1 #
2 Sam 1:11; Yob 1:20; ’Yeta 14:14; Yos 7:6; Eze 27:30; E’do 27:34 Moridekai ka e’yo dria yini ’yele ’diyi ni ra, Moridekai asi bongo ini ra, eri su koliba i ma ruaa, omvu of uta i ma dria, eri fu amve aku amboru ma aliarisi ra, eri wu o’duko amborusi candisi tu; 2eri mu kpere pari ’bani fizu opi vile kalitilia, a’disiku ’ba koliba supi i ruaari econi fizu opi vile kalitilia ku. 3Angu awaza alu alu dria azita opiniri pini cazu alenia e’yo ekuza ’di be ’diyi ma alia, candi amboru tu bi ’ba Yahudini, yi ku nyaka nyazu ja, yi wu ’dani candisi lulu gaza be; ’ba kakau yi la va koliba be yi ruaa ofuta ma alia ani.
4Ezoanzi Esiterini azini ati’ba eri ma joa ’diyi yini emuria e’yo ’diri oluria eri tia, oku opini ovu candisi asi otiza be tu; eri pe bongo suza ma ti Moridekai dri, ’dini eri ma tru koliba eri ruaari, te eri ga bongo si. 5Esiteri nga di Hatakini omve, eri ati’bo alu opini, opini pele oku dri eri aza kozuri’i, pe tini muzu e’yo ’diri ma efi ngoni yari zizu Moridekai ma tia, kani enga geri ngosi ya. 6’Dini Hataki fu amve, isu Moridekaini iriia aku ambori ma alia, opi ma kalitile ma drilia, 7#Esi 3:9te Moridekai nga di e’yo dria yi ’yepi eri vu ’diyi olu eri tia, azini nga ece kalafe dahabuni Hamanini azile fezaru ’bazu pari opini lonyi ta mbazuria, yini ’ba Yahudini ma dri jalerisiri. 8#Esi 3:14, 15; Yob 9:15; O’be 15:1; ’Yeta 12:20Eri fe vini eri dri waraga sile azitaru efupi aku Susaniasi yi dri jazuri ma siza aziniri, eri ma ece eri Esiteri dri ani, e’yoni ma eti nzezu tinia, eri azizu kini eri ma fi opi vu, matu ’bazu eri vu azini wuzu eri vu suru ini ma e’yosi. 9Te Hataki eri emu, eri olu Esiteri ma tia e’yo Moridekaini ’yole ’diyi. 10Esiteri nga di e’yo ’yo Hataki tia, nga azi ’yozu Moridekai ma tia kini, 11#Esi 5:1, 2; 8:4; Dan 2:9Ati’ba opini ’diyi dria, ’ba azini angu awaza opini ma alia ’diyi dria yi ni e’yo ’diri ra, kini, ’ba alu, ka ovu agupini kani okuni ti, fipi opi vu jo opini alialeruria ka eri omve ku, azita ovu alu a’dule ’ba nde dri, kini ma fu eri ra, pe lu ’ba opini kali meleruri ejule vunia eri ma ovu idriru aniri’i a’dule. Te ma’i, yi omveni ma fizu opi vu o’du kali na ’dipi ’diyi ma alia ku. 12Te yi e’yo Esiterini ’yole ’diyi olu Moridekai ma tia. 13#O’be 29:25Moridekai azi ’ba ’diyi tia e’yo omvizu Esiteri tia kini, Mi ma ega kini, mini ovule jo opiniarisi, mi nga mi pa a’dule ’ba dria Yahudini ma eselia, ’dini ku. 14#Lev 26:42; Kal 23:22-24; Yer 30:10; Amo 9:8; Zab 75:5, 6; Ekl 3:1; Isa 14:27; 54:17; Yer 30:10, 24; Dan 4:17, 35Te mi ka ovu ciri o’du ’diyi ma alia, ka’dini aza koza pi pata ’ba Yahudini yi pazuri be, yi nga enga pari azinia, te di mi’i, mi ati ma ori’ba be, emi nga dri ja ra. A’di nini, kani mi fi opi nyaza ma alia ewu ’dorileri ma e’yosi yani? 15Esiteri nga di azi e’yo omvizu Moridekai tia kini, 16#Yoe 1:44; Yon 3:4; Zab 34:22; O’be 29:25Mi mu, mi oku ’ba Yahudini dria ovupi aku Susani ma alia ’diyi, emi ma ’da nyaka e’yo manisi, emi ma nya ku emi ma mvu ku indi, kpere o’du na etusi ini be rra. Ma’i vini indi, ezoanzi mani be, ama nga nyaka ’da ’dinile. Vilerisi ma nga fi opi vu, azita ka a’i ’yezu ’dini ku ti; ka dri jazani ti, ma dri a ra. 17Moridekai nga di mu geri erinia, eri ’ye e’yo dria ekile Esiterini azilerile.
Bible in Lugbara © United Bible Societies, 1966.