Esiteri 3
3
Lokiri Hamanini lezu ’ba Yahudini drijazuri
1 #
Kal 24:7; 1 Sam 15:8 E’yo ’diyi ma vutia opi Ahasueru nga fe Hamani Hamedata mvi, suruti Agaginiri dri ovuzu amboru, eri enga eri, ’ba oguna erini ’ba ambo ovupi eri be ’diyi dria ma drilia. 2#Esi 2:19; E’do 41:42; Azi 25:19; Fil 2:10; Efu 1:17; Zab 15:4Te ati’ba opini dria ovupi opi vile kalitilia ’diyi, yi osi kumuti Hamani drilia eri inzizu, a’disiku opi azi eri ma e’yo ’dini. Te Moridekai osini ini kumuti ku, inzini eri ku indi. 3Ati’ba opini ovupi opi vile kalitilea ’diyi yi ’yo Moridekai tia kini, Mi eza azita opini a’disi ya? 4Eri nga eca ’dini, yini e’yo ’yoria tinia ’dinile o’du vusi dria, te eri erini yi ku, yi nga olu Hamani tia, ndrezu kani e’yo Moridekaini nga pa so ’dani yani; a’disiku eri olu yi ma tia ’bo kini i ’ba Yahudini. 5#Esi 5:9; 1:12; Yob 5:2; O’be 12:16; Dan 3:19Te Hamani ka ndre Moridekai osini kumuti ku, inzini ku indi, adra ga tre Hamani ma asia. 6#Zab 83:4Te eri ma milia Moridekaini bizu a’duleri ovu toko; a’disiku yini eri dri Moridekai ma suru ma e’yo olule rarisi. E’yo ’disi Hamani ndru geri ’ba Yahudini o zupi suru dria opi Ahasueruniri ma alia ’diyi dria ma dri jazu, adam suru Moridekaini.
7 #
Esi 9:24; Mat 27:35; ’Yeta 1:26 Mba okori ma alia, ’diri mba Nisani, eli mudri drini iri opi Ahasueruni opi nyazurisi, yi ’be Puri (’di odrisini) Hamani ma milia o’du vusi o’du vusi, dika mba vusi mba vusi ecazu kpere mba mudri drini iri vu, ’diri mba Adari’i. 8#Ezr 4:13; ’Yeta 16:20Hamani nga di ’yo opi Ahasueru ma tia kini, Suru alu indi ovupi erezaru suru azini ma eselia angu opi minia ’diyia dria; azita yini ndu ekile suru azini dria ’diyini a’ilerile ku, yi mbani azita opini ma ta ku indi, e’yo ’disi eri ovuni onyiru opi dri ku yi kuzu ovuzu’dini. 9Opi ka e’yo ’di ndre onyiru, ma si azita kini ma ja yi dri ra, te ma’i ma nga onzi dahaburu alifu mudri ’diyi fe ’ba ’ba azi opini ngapi ’diyi ma drilia ’diyi dri, yi ma ’ba dahabu nde pari opini lonyi ma ta mbazuria. 10#E’do 41:42; Esi 8:2, 8E’yo ’disi opi eri tru driadriamva ini i ma driari, fe Hamani Hamedata mvi, ’ba Agagini, ari’bo ’ba Yahudiniri ma dria. 11Opi eri ’yo Hamani tia, Yi fe dahabu pi mi dri ’bo, ’ba pie, mi ma ’ye yi vu ekile ovupi mi milia onyirurile.
12 #
Esi 8:8-10; 1:22; 1 Opi 21:8; Dan 6:8 Yi omve ’ba waraga sipi opini ’diyi, mba okori ma o’du mudri drini nasi, yi si ani e’yo dria Hamanini azi le ’diyi, tini pezu ’ba opiru angu nyapi suru opinia ’diyi pie dri, ambo angu awaza dria ’diyi ma drilia ’diyi pie, ’ba amboru ’ba dria eselia, ’diyi pie, angu alu alu vu e’yo siza yini vusi, ’ba dria vu ti ’yoza yini vusi; waraga ’diyi ovu sizaru opi Ahasueru ma rusi, yi ’ba eceta ruania oni opi; ma driadriamvaarisi. 13#Esi 8:10-12; Rum 3:15; Isa 10:6Yi fe waraga ’diyi ojio ma dria, yi ma ji yi angu awaza opinia ’dria, kini, o’du alu ma alia, ’di mba mudri drini iri omvele mba Adari ma o’du mudri drini nari’i, yi ma fu ’ba Yahudini dria dria, karile pie, ’ba mbaza pie, anzi nyiri pie, oku pie dria, kini ma o’di yi kai kai, ma ja yi ma dri ra, ’ba ma opa afa yini dria indi. 14#Esi 8:13, 14’Ba ere waraga ’diri ma siza aziniri azitaru angu awaza alu alu vusi dria, azizu ’ba dria dri, ’dini yi ma ovu ngonde o’du ndesi beni. 15#E’do 37:24, 25; Zab 14:4; O’be 30:20-22; Hos 7:3; Amo 6:6; Mat 14:6; Esi 8:15; O’be 29:2Ojio enga mu mbele azita opini ’disi, azita nde efu Susani aku opiniria. Opi pi Hamani be yi nga yini ri va afa mvuza mvuzu; te ’ba aku Susania ’diyi ovu taisi tu.
Bible in Lugbara © United Bible Societies, 1966.