Azita Amvizu 22

1 # Efu 23:4-5; Rum 12:10; 2 Pet 1:7; 1 Yoh 3:15; 4:21; O’be 27:10; Zek 7:9 Mi ka mi adri ma ti pi ndre kabilo be, de avi avi, mi ma zi mi ekile mi ndre yi kule ku; mi ma ece yi drozu mi adri vu ku. 2Te mi adri ka ovu mi be ogogo ku, kani mi nini eri ku, mi ji di eri emi vile, mi vile joa, eri ma ovu mi be ’daa kpere mi adrini eri ndaria; mi nga di eri omvi eri dri. 3Mi ma ’ye vini ’dini akanya erinisi; mi ma ’ye ’dini bongo erinisi; mi ma ’ye ’dini afa avipi mi adripi dri erini avile, mini isule ’diyisi dria; mi ma zi mi ekile mi ndre yi kule ku. 4Mi ka mi adri ma akanya ne kani ti erini, de e’de va geri tia, mi ma zi mi ekile mi ndre yi kule ku; mi ma ece ku eri ma aza kozu yi engazu dika. 5#1 Kor 14:40Oku ma su afa suza agupiniri i ruaa ku, agupi ma su vini bongo suza okuniri i ruaa ku indi; a’disiku ’ba e’yo ’dinile ’diyi ’yepiri ovu afa Yehova Mungu minirini ngule onziri’i.

6 # Lev 22:28; Neh 9:6; Zab 36:6; 145:9; O’be 12:10; Mat 10:29; Luk 12:6 Mi ka aria jorovu isu mi drilia geria, patisia kani nyakua, anzi be kani gbe be alenia, azini andri avu anzi dria kani gbe ma dria, mi ma omvu andri pi tualu anzi be ku; 7#Azi 4:20mi ma ku andrini mu ra, te mi eco anzini wuzaru mini ra; ’dini e’yo mini ma ovu onyiru, azini ewu mini ovuzu idriruri ma ovu izuru. 8Mi ka jo o’diru si, mi ma bi abi jo dri mini ma kalaasi, ’ba kazu e’dezu driniasi, ari omvizu jo mini ma dria ’dini ku. 9#Lev 19:19; Mat 6:24; 9:16; 2 Kor 6:14-16; 11:3Mi ma ri ori suruti iri amvu zabibuni miniri ma alia ku, ’ba kazu afa kapi ’diyi opazu dria ku, ori mini rileri pi efi kaza zabibuni be iri tro. 10#2 Kor 6:14-16Mi ma fe ti pi akanya be ma se e’bu amvu ’yazu tualu ku. 11#Lev 19:19Mi ma su bongo cale osazaru kabilo ’biko pisi pamba beri ku. 12#Kal 15:37-41; Mat 23:5Mi ede bongo mini mi rua a’buzuri ma kalati su ’diyi ma ti ma ovu yaliyaliru.

Azita acita kililiruri ma e’yosi ’diyi

13 # E’do 29:21; Lip 15:1; Efe 5:28, 29 ’Ba azini ka oku je, ka fi eri vu, te vutinia ka eri ngu onzi, 14ka e’yo drinzaru ’yo eri ruaa, ajini dizu onzi, ’yozu kini, Ma ’du oku ’dori ra, te mani firia vunia ma isuni e’yo ecepi eri isuni nga yi agupi azini be ku, ’diniri ku. 15Aliria ma ati pi andri be ma o’du afa ecepi aliria ’diri pi isuni nga yi agupi azini be kuri, ma ofu yi ji ’ba ’wara aku ndea ’diyi vu kalitilea. 16Aliria ma atini nga ’yo ’ba ’wara ’diyi ma tia kini, Ma fe ndra ma zini agupi ’dori dri okuru, te ngu eri onzi; 17te mi ne, eri ’yo e’yo drinzaru eri ruaa, ’yozu kini, Ma isuni mi zi ma ruaa e’yo ecepi eri isuni nga yi agupi azini be kuri ku. Te di, afa ecepi ma zi isuni nga yi agupi azini be kuri yi ’di. Yi nga di bongo nderi aja ’ba ’wara aku ndea ’diyi ma milia. 18#Efu 18:21; Azi 1:9-18; Rum 13:4Te ’ba ’wara aku ndea ’diyi ma ’du agu ’diri eri imbazu kalisi; 19ma li eri ma dria sekeli dahaburu turu alu, fezu aliria ma ati dri, erini aliria Israeliniri ma aji dilerisi; eri ma ovu oku eriniru ’dani; eri econi eri drozaru ku kpere erini draria. 20#Azi 17:4Te e’yo nderi ka ovu adaru, ka e’yo ecepi eri isuni nga yi agupi azini be kuri isu aliria ma ruaa ku ada, 21#E’do 34:7; Lev 21:9; Lip 20:6, 10; 2 Sam 13:12, 13; Azi 13:5; 17:7; 19:19ka’dini ma ofu di aliria nderi i ati ma jotilea, azini agupi aku erinia ’diyi ma o’be eri onisi kai, a’disiku erini e’yo azazaru ’yele Israeli eselia, erini ofule awuouru i ati ma joarisi; mi ma nze e’yo onzi mi eseliarisi ’dini.

22 # Lev 20:10; O’be 6:22; Mal 3:5; Mat 5:27, 28; Yoh 8:5; 1 Kor 6:9; Ebra 13:4 Yi ka agu isu erini laria oku ’ba azininisi, ma odra iri tro ra, agu lapi oku nderisiri pi oku nde be; mi ma nze e’yo onzi Israeli eseliasi ’dini. 23#Mat 1:18, 19’Ba ka zamva aliriaru aguni e’dole jele ’bori isu aku amboru alia, ka la erisi, 24#Azi 21:14; Mat 1:20, 24ka’dini emi ma eji yi iri tro aku nde ma kalitilea, emi ma o’be yi onisi kai ra, aliria nderi de vini eri aku amboru ma alia ti, erini lulu gale kurisi, azini agupi nderi erini drinza fele i agyi ma oku dririsi; mi ma nze e’yo onzi emi eseliarisi ’dini. 25Te ’ba ka aliria aguni e’dole jele ’bori isu asea, eri ka eri bi okposi, ka la erisi, ka’dini ma fu kiri agu nde lapi erisiri’i. 26Te mi ma ’ye aliria nderi aluni ku; te aliria nderi ma ruaa e’yo onzi erini drazuni yo, te e’yo ’diri si ekile aguni engazu i agyi ruaa eri ’dizu kairile; 27a’disiku eri isu eri asea, aliria ’bani e’dole jeleri oga lulu ti, ’ba eri papini yo. 28#Efu 22:16-17Agu azini ka zamva nga i isupi agupi be ku, ’bani e’dole nga jele kuri isu, ka eri bi ra, ka la erisi, ’ba azini ka yi isu ra, 29ka’dini agu lapi erisiri ma fe sekeli dahaburu kali towi zamva nderi ma ati dri, eri nga ovu oku eriniru, erini drinza fele eri dri rarisi; eri econi eri drozaru ku kpere erini draria.