Azita Amvizu 21

Agu ’dile ’bani ’baniri nile kuri ma e’yo edezuri

1 # Zab 9:12; O’be 28:17 Angu Yehova Mungu minirini fele mi dri ovuzu miniruri ma alia, yi ka ’ba fule kairi ma avu isu lazu asea, te nini ’ba eri ’dipiri a’di’i yari ku, 2ka’dini ’ba ’wara mini piyi ma efu ’ba e’yo lipi ’diyi be, yi ma ’be aku ovupi avu ma ageia ’diyi pi ma esele avu beri; 3eri nga eca ’dini, aku ovupi ’ba fule kai nderi ma avu vu inyia tu turi, ’ba ’wara aku ndea ’diyi ma ’du tikari anyapa o’biru ma eselia ’bani azi ngale erisi nga ku, afa esepi kulumbusi nga kuri. 4’Ba ’wara aku ndea ’diyi ma ese tikari nderi andraleru a’bu ovupi yi raza beri ma alia, pari ’yale nga ku azini ori rizu nga kuria, yi ma pi tikari nde ma ombe a’bua ’daa. 5#1 Sur 23:13; Azi 17:8, 9’Ba Levini kuhaniru ’diyi ma esi ogogo, a’disiku Yehova Mungu miniri ope yi azi ngazu i dri, azini asi ndriza fezu Yehova ma rusi; ma li agata gaza pi ma e’yo dria, acoa dria be, e’yo yini ’yoleri vusi. 6#Yob 9:30; Zab 19:12; 73:13; Yer 2:22; Mat 27:24; Ebra 9:10Te ’ba dria aku ovupi ’ba fule kairi ma avu vu inyia tu turia ’diyi ma oji yi dri tikari yini te ombe pile a’buari ma dria; 7#2 Sam 3:28yi ma omvi e’yo kini, Dri amani adani ari ’dirini ku, ama ndreni vini eri ama milesi ku. 8#Yer 26:15; Eze 22:3; Yon 1:14; 1 Tes 2:15, 16Yehova la, mi wu ’ba mini Israelini mini onzele ’bo ’diyi ma e’yo onzi fo, mi ku ’ba e’yo kokoruri ma ari ma ri ovu Israeli ma eselia ’dani ku. Te ari nderi nga ovu wuzaru ani yi dri. 9#Azi 19:13Mi ma nze ’ba e’yo kokoruri ma ari mi ma eseliasi ’dini, mi ka e’yo ovupi onyiru Yehova ma miliari ’ye ra.

Azita ndu ndu ’diyi

10 # 2 Sur 32:8; Yos 21:44 Mi ka fu mu a’di ’dizu ari’ba mini be, Yehova Mungu miniri ka nga yi fe mi dria, mi ka nga yi o’i ji ati’baru, 11mi ka oku ndrizaru tu ndre ati’ba ’diyi ma eselia, avani ka mi va eri ’duzu oku miniru ra, 12ka’dini mi ma ji eri emi vile, mi vile joa; eri ma fa i dribi ra, ma oli i onyofi indi. 13#Zab 45:10Eri ma tru bongo ati’boni eri ruaari ra, ma wu i ati pi ma imvosi andri be mba alu pi; ’di ma vutia mi eco fizaru eri vu, ovuzu agupi erini, eri ma ovu oku miniru. 14#E’do 34:2; Lip 19:24Eri nga ovu ’dini, ka mi dri ayiko fe ku, mi ku eri ma mu ini lelerile; te mi ma fe eri je silingisi aluni ku, mi ma ’ye eri vu ekile ati’bole ku, mini drinza fele eri dririsi. 15#E’do 29:33’Ba azini ka ovu oku be iri, aluri erini leleri’i, aziniri erini nguleri’i, te leleri azini nguleri iri tro oti anzi eri dri ra; te mva osipi oko ka ovu ngule rarini, 16#2 Sur 11:19; 21:3; Rum 8:29eri nga ovu ’dini, o’du erini afa ini awazu awurusoru anzipi dririsi, eri econi oku erini leleri ma mva ’ba karimvaru oku erini nguleri ma mva osipi okori ma paria ’dini ku, 17#E’do 25:5, 6, 31; 1 Sur 5:1; E’do 49:3te eri ma a’i mva osipi oko, oku erini nguleri ma mvini ra, afa erini ovuzu yi be ’diyi dria ma esele fezu eri dri pale iri, erini ovule ati ma okponi e’dozuri’irisi; kari mva osipi okoriniri erini. 18#Efu 20:12; 21:15, 17; Lev 19:3; 21:9; O’be 1:8; 15:5; Efe 6:1’Ba azini ma mva ka ovu ambo be edematararu, lepi ata pi ma ti eripi andri be kuri, yini eri coria imbatasi ti, erini yi ku, 19ka’dini ati pi andri be ma bi eri jizu ’ba ’wara aku erinia ’diyi vu, aku erini ma kalitilea, 20yi ma ’yo ’ba ’wara aku erinia ’diyi ma tia, Mva amani ’dori eri ambo be edematararu, erini ama ti ku; eri ali o’ba saaru, eri ati ewasi tu. 21#Azi 19:19; 13:11Agupi aku nde ma alia ’diyi dria ma o’be eri onisi kai; mi ma nze e’yo onzi mi eseliasi ’dini; Israeli dria ma eri, ma ovu ani urisi. 22#Azi 22:26; 1 Sam 26:16; Mat 26:66; ’Yeta 23:29’Ba azini ka e’yo onzi ’bani drazu rari ’ye, ka eri fu ra, mi ka eri ’i pati sia, 23#Gal 3:13; Yos 8:29; Yoh 19:31; Lev 18:25; Kal 35:34avuni ma ovu pati sia ini rra ku, te mi ma ece eri sazu o’du nderisi coti ku, a’disiku ’ba yini ’ileri ovu trizaru Mungu dri; ’dini mi kazu angu Yehova Mungu minirini fele mi dri ovuzu miniruri ezazu ku.

Currently Selected:

Azita Amvizu 21: LB66

Highlight

Copy

Compare