Azita Amvizu 19

Aku ’bani apazu yi ta mbazu alenia ’diyi

1 # Yos 20:1-9 Yehova Mungu miniri ka nga suru Yehova Mungu minirini ngazu angu yini fezu mi dri ’diyi ma dri ja ’bo, mi ka nga ovu yi ma paria, ovuzu aku yini ma alia azini jo yini ma alia, 2#Yos 20:2mi ma ope mi dri aku na ovuzu ndu, angu Yehova Mungu minirini fele mi dri ovuzu miniruri ma alia. 3Mi ma ofa geri mi dri, ma awa angu Yehova Mungu minirini fele mi dri ovuzu miniruri ma esele na, ’dini ’ba ’ba ’dipi ’diyi dria ma eco ani apazaru yi ma alia beni. 4’Ba ’ba ’dipi, ecopi apapi alenia i pazuri ma e’yo ’Ba agyini fupi aka, eri ngupi onzi okoni kuri- 5ekile ’ba ka mu ocea i agyi be eja gazu ogara be dria, erini pati garia ogarasi ogara tu i abe siarisi ra, ’de agyi ma ruaa, dra ani ra-eri ma apa aku ’diyi ma azi alua i pazu; 6’ba avu ofepiri, de eri ma asini draria adrasi, kazu agu te ’ba fupi ’diri ma vuti drozu eri isuzu, gerini ovule izururisi, kazu eri fuzu kai ku, de te e’yo erini drazuni yo, emi eri ngule onzi i asia okoni kurisi. 7E’yo ’disi ma azi mi dri kini, Mi ma ope mi dri aku na ’diyi ovuzu ndu. 8#E’do 15:18Te Yehova Mungu miniri ka nga angu mini ere walaru, ekile ndra erini oyoni sole mi a’bipi ma tiarile, eri ka nga angu dria erini ndra azile fezu mi a’bipi driri fe mi dri- 9#Yos 20:7mi ka azita mani azile mi dri o’du andrusi ’dori ma ta mba dria eri ’yezu, Yehova Mungu miniri lezu avasi, acizu ’dani geri erini ’diyi ma alia-ka’dini mi ma o’ba aku azini na aku teka na ’diyi be, 10yi kazu ’ba e’yo kokoru ’diyi ma ari adazu angu mini Yehova Mungu minirini fele mi dri awurusoruri ma alia ku, ari kazu mvizu ani mi dria ku. 11#Efu 21:12; Kal 35:16; O’be 28:17; 29:10; 1 Yoh 3:15Te ’ba azini ka i agyini ngu onzi, eri mbazu ndindiru, ka enga drinia eri cozu, erini drazu kai, ’ba nderi ka apa aku ’diyi ma azi alua, 12ka’dini ’ba ’wara aku erinia ’diyi ma pe ’ba ti eri ejizu engazu ’daarisi ra, ma fe eri ’ba avu ofepiri dri, eri ma dra ra. 13#1 Opi 2:31Mi ’ba mile ba eri vu ku, mi ma nze ’ba e’yo kokoru ’diyi ma ari Israeli ma eseliasi, e’yo ma ovu ani mi be onyiru. 14#Azi 27:17; Yob 24:2; O’be 22:28; Hos 5:10Awuruso mini ngale isule angu Yehova Mungu minirini fele mi dri ovuzu miniru ma aliaria, mi ma nze ’ba mi aku ejeleari ma alo angu awazu ’ba oku ’diyini dileri aluni ku.

Azita ’ba e’yo eli nzepi ’diyi ma e’yosiri

15 # Kal 35:30; Azi 17:6; Mat 18:16; Yoh 8:17; 19:31; 2 Kor 13:1; 1 Tim 5:19; Ebra 10:28 E’yo eti nzeza ’ba alunini nzeleri econi ’ba azini ndezaru ku ezata erini ma alia, kani e’yo onzi erini ma alia ku, e’yo onzi erini ’yeleri ka ovu ngoni ti; e’yo ma so pa ’ba iri kani ’ba na ’diyini e’yo eti nzelerisi. 16#Zab 27:12; 1 Opi 21:13’Ba e’yo eti nzepi inzosiri ka enga asu suzu ’ba azini ma ruaa e’yo onzi ma e’yosi, 17ka’dini ’ba e’yo be yi eselia ’diyi ma so pa iri tro Yehova ma drilia, kuhani pi ma milia ’ba e’yo lipi ewu nderisi ’diyi be; 18’ba e’yo lipi ’diyi ma nda e’yoni asi driasi, te mi ndre, ’ba e’yo eti nzepiri ka ovu ’ba e’yo eti nzepi inzosiri, ka e’yo eti nze inzoru i adri ma ruaa, 19#O’be 19:5; Dan 6:24ka’dini emi ma ’ye eri ekile te erini egale ’yele i adri vurile; mi ma nze e’yo onzi mi eseliasi ’dini. 20#Azi 17:13; 21:21’Dini ’ba acepi ’diyi nga eri ra, nga ovu urisi, ma ’ye e’yo onzi ’dinile ’diri mi eselia dika ku beni. 21#Efu 21:23-25; Lev 24:19-20; Mat 5:38Mi ma ’ba mile ba vunia ku; idri pi ma obi dri idri be, mile pi mile be, si pi si be, dri pi dri be, pa pi pa be.

Currently Selected:

Azita Amvizu 19: LB66

Highlight

Copy

Compare