Azita Amvizu 1

Musani aziza Yehovani amvizu Israeli tia Horebuari

1 # Kal 32:6, 20, 29; Yos 9:1; 22:4, 7 E’yo Musani ’yole Israeli dria ma tia, Yoridani ma tia ’aa’dasi angu roko driaria, Araba Sufi vualeruria, Parani pi ma eselia Tofeli pie, Labani pie, Hazeroti pie, Dizahabu pie ’diyi yi ’di. 2#Kal 13:26; Azi 9:23Engazu Horebua acizu geri oni Seiriarisi cazu Kadesibarineaa eri aci ’du o’du mudri drini alu. 3#Kal 33:38Eri eca ’dini eli kali suri ma mba mudri drini aluri ma o’du alurisi, Musa ’yo anzi Israelini ’diyi ma tia ekile e’yo dria Yehovani fele eri dri azitaru yi dririle, 4#Kal 21:21-35; Neh 9:22; Zab 135:11; 139:19erini Sihoni opi ’ba Amorini ’diyini ovopi Hesiboniari pi ofuzu Ogi opi Basania ovupi Asitaroti Edreiariari be ’boria. 5Musa e’do ndra azita ’diri ma efi ecezu, angu Moabu Yoridani ma tia ’aa’dasiria, ’yozu kini, 6#Efu 3:11; 9:1; Kal 10:11Yehova Mungu amaniri ’yo ndra ama tia Horebua kini, Emi ovu oni ’dori ma dria o’du fudri ’bo; 7emi oja emi, emi bi aci dri kozu, emi mu angu oniru ’ba Amorini ’diyiniri pia, angu dria ovupi ageinia ’diyi be Araba pi ma alia, angu oniruri pie, angu eleri pie, angu uruleruri pie, angu miri tiari pie, angu ’ba Kanania ’diyiniri pie, Lebanoni pie, cazu kpere yi ara amboria, eri yi ara Ufirate’i. 8#E’do 12:7; 15:18; 28:13Mi ne, ma ’ba angu nde emi drilia ’bo; emi fi angu Yehovani azile ndra emi a’bipi Iburahimu pi ma tia, Isaka pie, Yakobo pie, fezu yi dri azini ori yini yi ma vutia ’diyi driri ma alia, eri ’duzu eminiru.

’Ba e’yo lipi ’diyi opezuri

9 # Efu 18:18; Kal 11:14 Ewu nderisi ma ’yo ndra emi tia kini, Ma econi emi ’du ji ma’i a’dulesi ku; 10#E’do 15:5; 22:17; 28:14; Efu 32:13; Azi 10:22; 28:62; 1 Sur 27:23Yehova Mungu eminiri fe emi ezu ’bo, te mi ne, o’du andru ’dorisi emi ovu karakarau ekile ’bi’bio ’bua ’diyile. 11#E’do 22:17; 26:4; Efu 32:13Yehova Mungu emi a’bipiniri ma fe emi ezuzu dika dika pale alifu aga emini ovuzu curu’dori ra, ma ’ba vini asi ndriza emi ma dria ekile erini azile emi tia ’borile fo! 12#1 Opi 3:8; 2 Kor 11:28Ma eco e’yo nziza emini pi ’duzu jizu, e’yo emini teriruri pie, agata gaza emini pie ma’i a’dulesi ngoni ngoni ya? 13Emi ma ope emi dri ’ba onduaru, ’ba e’yo vapi tu, ’bani nile ra ’diyi, suruti emini vusi, te ma nga yi o’ba emi drilia ovuzu ’ba emi dri cepi ’diyiru. 14Te emi omvi ndra ma tia kini, E’yo mini ’yoleri ovu onyiru ama dri; ’yezu ra. 15’Dini ma o’du ’ba ovupi suruti emini ma drilia, ’ba onduaru ’bani nile tu ’diyi, ma o’ba yi ani emi drilia, ’ba alifu alifu ma drilia, ’ba turu turu ma drilia, ’ba kali towi kali towi ma drilia, ’ba mudri mudri ma drilia, azini ’ba ambo ’diyi, suruti emini vusi. 16#Efu 23:2-8; Yoh 7:24; Lev 24:22Ewu ndra ’darisi ma azi ’ba e’yo, emini lipi ’diyi tia kini, Emi ma eri e’yo adripi emini ma eselia ’diyi, emi ma li e’yo kililiru ’ba pini i adri be, ani’bo ovupi eri beri be indio 17#1 Sam 16:7; O’be 24:23; Yak 2:1; O’be 28:21; 29:4, 25; 2 Sur 19:6; Efu 18:22, 26Emini e’yo liria, emi ma ope ’ba tope ope ku; emi ma eri ’ba were azini ’ba amboru trotro; emi ma ovu urisi ’ba ma miletisi ku, a’disiku e’yo lizani Yehovani; e’yo azini ka emi ma ondua nde ra, emi ma eji eri ma vu, ma nga eri eri ra. 18Te ma azi ndra emi tia ewu ndra ’darisi e’yo dria onyiru emi dri ’yezu ’diyi.

Ba angu ma orile gapi ’diyi ma ti pezu Kadesi-barineasiri

19 # Kal 10:12; Azi 8:15; Yer 2:6; Kal 13:26 Ama ko ndra dri Horebuasi muzu angu rokoru amboru uriuriruri ma alesi dria, angu nde emini ndrele ndra emini muria geria angu oniru ’ba Amorini ’diyiniriari, ekile Yehova Mungu amanirini ama azilerile; ama nga di eca Kadesi-barineaa. 20Ma ’yo ndra emi tia kini, Emi eca di angu oniru ’ba Amorini ’diyiniria ’bo, angu Yehova Mungu amanirini fele ama driri’i. 21#Kal 13:30; 14:8, 9; Yos 1:9; Zab 27:1-3; 46:1, 7, 11; Isa 41:10; 43:1, 2; Luk 12:32; Ebra 13:6Mi ne, Yehova Mungu miniri ’ba angu nderi mi drilia; mi tu, mi ’du eri miniru, ekile.Yehova Mungu mi a’bipinirini ’yole mi tia ’borile; mi ru ku, mi asi ma oti vini ku. 22Emi dria alu alu nga ndra esi ma vu ogogo, ’yozu kini, Mi ku ama ma pe ’ba ti ama drilia angu ma orile gazu ama dri, e’yo omvizu ama vu dika geri amani ngazu tuzuri pi ma e’yosi, aku ambo ambo amani ngazu fizu yi ma alia ’diyi be 23#Kal 13:3E’yo nderi fe ndra ayiko ma dri i tu, ma ’du ani ’ba emini mudri drini iri, ’ba alu alu suruti emini vusi ’diyi; 24yi nga yi oja tuzu angu oniruria, nga ca a’bu Esikoliniria angu nderi i ma orile gazu. 25Yi oti patiefi kapi angu ndeari ma azi yi dria, esizu yi be va ama vu, yi omvi e’yo ama tia kini, Angu Yehova Mungu amanirini fele ama driri eri angu onyiru. 26#Azi 9:23; Ebra 3:16; Kal 14:1-4; Zab 106:24Te ti, emi a’ini ndra tuzu ku, emi ga ndra azita Yehova Mungu eminirinisi, emi mbu ndra amve; 27#Azi 9:28emi ri ndra one hema emini ma alia kini, Yehovani ama ngule onzirisi, eri ofu ama angu Misiriasi ra, ama fezu ’ba Amorini ’diyi ma dria, lama dri jazu. 28#Kal 13:28-33; Azi 9:1, 2Ama tu mu ngole ya? Adripi amani fe ama asini cazu, kini, ’Ba nde ’diyi ovu amboru azini izuru aga ama ra aku ambo ambo ’diyi ovu amboru kali okporu izutili cazu kpere ’bua ’diyi be; azini vini ama ndre ’ba Anakini ma anzipi ’dale indio 29Etu ’dasi ma nga ’yo emi tia, Emi ma ovu urisi ku, emi ma ru yi ku. 30#Efu 14:14; Neh 4:20Yehova Mungu emini mupi emi driliari nga a’di ’di emi drini, ekile e’yo dria erini ’yele emi idri emi milia Misiriarile, 31#’Yeta 13:18; Efu 19:4; Azi 32:11; Isa 46:3, 4; 63:9; Hos 11:3azini ekile erini ’yele angu rokoru ma dria, pari mini Yehova Mungu mini ndrezu erini mi ’duzu jizu ekile ’bani adrile i ma mva ’duzu jizurile, pari dri dria emini muzuria kpere emini ecazu pari ’dori ma aliariarile. 32#Ebra 3:19; Zab 106:24; Yud 1:5Te ti, e’yo ’diri ma alia emi a’ini ndra Yehova Mungu eminiri ku, 33#Efu 13:21; Zab 78:14; Kal 10:33; Eze 20:6eri’i dri cepi emi drilia geria, pari emini ngazu hema emini asozuri ndazu, geri emini ngazu muzuri ecezu emi dri, ini be acisi, etu be iritisiri’i.

Munguni panga onzi fezu Israeli driri

34 # Ebra 3:18; Azi 2:14 Te Yehova eri ndra e’yo emini ’yole ’diyi ma o’duko ra, ovu ani aokosi, nga ndra oyo so kini, 35#Kal 14:22; Zab 95:11Adada ’ba aluni a’bianzi onzi ’diyi ma eseliari ngani angu onyiru ndra mani oyoni sozu fezu emi a’bipi driri ndre ’de ku, 36pe kiri Kalebu Yefune mvini nga eri ndreni; ma nga angu erini tule i ma pasiri fe eri dri, anzipi be, a’disiku erini Yehovama vuti bile asi alusirisi! 37#Kal 27:14; Azi 3:26; 4:21; 34:4; Zab 106:32Yehova ovu vini aokosi ma be emi ma e’yosi, ’yozu kini, Mi indi, mi ngani fi ’dale ku; 38#Efu 24:13; 33:11; 1 Sam 16:22; Azi 31:7, 23Yosua Nuni mvi, pa sopi mi miliari nga fini; ma omi eri ma asi, a’disiku eri nga fe Israelini angu nde nyazu awurusoruni. 39#Isa 7:15, 16; Eze 18:20Anzi nyiri emini, emini ’yole kini yi nga ofu afa opale ombaarile ’diyi, anzi emini e’yo onyiru nipi o’du andru ’dorisi e’yo onzi be ku ’diyi, yi nga fi ’daleni, ma nga angu nde fe yi dri, yi nga ani eri nya yi ma afaru. 40Te emi’iruni, emi oja emi aci bizu imuzu angu rokoru ma dria, geri Miri Ekaru vualeruria.

furuni ’ba Israelini drozu Horimaari

41Etu nde ’darisi emi omvi ndra ma tia kini, Ama eza ezata Yehova vu ’bo; ama nga tu omba ’ba ra, ekile e’yo dria ndra Yehova Mungu amanirini ama azilerile. Emi agupi dria alu alu osu ndra afa ombani emi ruaa, emi ega ndra tuzu oni driari ma ewa yo. 42Te Yehova nga ’yo ndra ma tia, Mi ’yo yi tia kini, Emi tu ku, emi ’di vini a’di ku, a’disiku mani ovule emi eselia kurisi; ari’ba emini kazu emi dri jazu ku. 43#Kal 14:44, 45’Dini ma ’yo emi tia, te emi erini ku; emi mbu azita Yehovani ma ruaasi amve, emi ’ye ambosi tuzu oni dria. 44#Azi 28:25; 32:30; Zab 118:12; Isa 7:18’Ba Amorini ovupi oni ’dati ma dria ’diyi efu emi vu a’di ’dizu, odro emi ra ekile anyuefini ’ba odrolerile, obi emi va Seiria cazu kpere Horimaa. 45#Yob 27:9; Zab 66:18; O’be 1:24; Isa 1:15; Yer 11:7-14; Zek 7:11; Yoh 9:31Emi emvi ndra awu wuzu Yehova ma drilia; te Yehova erini emi ma o’duko ku, coni vini bile emi vu ku indio 46#Kal 13:25; 20:1, 22; Lip 11:17’Dini emi awi ndra ku Kadesia o’du kakau, o’du emini ndra ovuzu ’dale ’diyi vusi.

Currently Selected:

Azita Amvizu 1: LB66

Highlight

Copy

Compare