Danieli 3
3
’Ba na ’diyi pazu aci ma aliasiri
1 #
1 Opi 12:28; Zab 96:5; Isa 41:24; Hos 2:8; 1 Kor 8:4 Opi Nebukadineza ede wura melesi, oconiri wuale kali azia, walaniri wuale azia. Eri i’di eri angu senderu Dura aria, angu Babulonini ma alia. 2’Dini opi Nebukadineza pe ’ba ti opiyi okuzu, wakilia pie, ’ba angu nyapi ’diyi pie, ’ba e’yo lipi ’diyi pie, ’ba silingi agei tepi ’diyi pie, ’ba ’wara e’yo amapi ’diyi pie, ’ba azita nipi ’diyi pie, ’ba ’wara angu ndu ndu ma dri cepi ’diyi pie, yi ma emu wura opi Nebukadinezani i’dile ’dari vu, omu yini ngazu e’dozu eri inzizuria. 3#Mat 7:13; ’Yeta 19:34, 35; Rum 1:20, 23’Dini opiyi pie, wakilia pie, ’ba angu nyapi ’diyi pie, ’ba e’yo lipi ’diyi pie, ’ba silingi agei tepi ’diyi pie, azini ’ba ’wara e’yo amapi ’diyi pie, ’ba azita nipi ’diyi pie, azini ’ba ’wara angu ndu ndu ma dri cepi ’diyi be dria, yi oku yi wura opi Nebukadinezani engaleri vu, omu yini e’dozu eri inzizuria; yi oso pa wura Nebukadinezani i’dileri ma drilialeru. 4#Dan 4:1Ojio e’yo azipiri nga di oyu o’duko urusi kini, Opi azi emi tia, emi ’ba dria, suru pie, emi ’ba ti ndu ndu ’yopi ’diyi pie, 5emi ka guka pi ma awu eri, osegu pie, o’di pie, oringi pie, o’di ndararu pie, oluru pie, afa wupi awu be ndu ndu ’diyi pie dria, emi ma eco emi va wura meleru opi Nebukadinezani i’dileri inzuzu; 6#Yer 29:22; Eceza 13:15’ba ngapi ecepi ra i ecopi va eri inzipi kuri, yi nga eri ’be aci si ekandrindriruri ma alia etu ndesi coti. 7’Dini ’ba dria ka awu guka pini eri, osegu pie, o’di pie, oringi pie, o’di ndararu pie, oluru pie, afa wupi awu be ndu ndu ’diyi pie dria, ’ba dria, suru pie, ’ba ti ndu ndu ’yopi ’diyi pie dria, yi ceo yi va wura meleru Nebukadinezani i’dile ’diri inzizu. 8#Dan 6:12; Esi 3:6; Ezr 4:12-16’Dini ewu nde ’dasi ’ba Kalideyaa ’diyi ma azi emu asu suzu ’ba Yahudini ma ruaa. 9#Neh 2:3; Hos 7:3; Dan 2:4; 5:10Yi omvi e’yo opi Nebukadineza ma tia kini, Opi la, mi rua ma adri ala ewule ewule! 10Opi la, mi azi ndra azita kini ’ba alu alu ka awu guka pini eri, osegu pie, o’di pie, oringi pie, o’di ndararu pie, oluru pie, afa wupi awu be ndu ndu ’diyi pie, ’ba ma eco yi va, ma inzi wura meleruri; 11te ’ba ngapi ecepi ra yi ecopi va eri inzipi kuri, yi nga eri ’be aci si ekandrindriruri ma alia. 12#Esi 3:8; Dan 2:49’Ba Yahudini azini mini yi o’bale amboru angu Babuloniari ma drilia ’diyi: yi Sadaraka pi, Mesaka pie, Abedinego pie, opi la, agupi ’diyi egani e’yo mini aluni ku; ’yeni azi adrou mi vile ’diyi dri ku, inzini vini wura meleru mini i’dileri ku indi. 13#Mat 10:18; Mar 13:9; ’Yeta 5:25-27’Dini Nebukadineza oli i aokosi nza nza, nga azi kini ma eji Sadaraka pi, Mesaka pie, Abedinego pie. ’Dini ’ba nga agupi ’diyi eji opi vu ra. 14#Isa 46:1Nebukadineza omvi e’yo yi tia kini, Emi Sadaraka, Mesaka, Abedinego, emi ga azi ngako adrou mani dri si, azini emi ga wura meleru mani i’dileri inziko si emi drisi aka ra ya? 15#Efu 32:32; 5:2; Luk 13:9; 2 Opi 18:35Te di curu’do emi ka ovu ngonde emi ka guka awu pi eri, osegu pie, o’di pie, oringi pie, o’di ndararu pie, oluru pie, afa wupi awu be ndu ndu ’diyi pie dria, emi ka emi eco va wura mani edeleri inzizu, onyiru; te emi ka inzi ku yi nga emi o’be ad si ekandrindriruri ma alia etu ndesi coti; te adrou ngori nga emi pa ma driarisini ya? 16#Mat 10:19; ’Yeta 26:24Sadaraka pi, Mesaka pie, Abedinego pie, yi omvi e’yo opi dri kini, Nebukadineza la, funi dri ama dri e’yo omvizu mi tia e’yo ’dirisi ku. 17#1 Sam 17:37; Mik 7:7; 2 Kor 1:10Eri ka di ovu ’dini, Mungu amani, amani azi ngazu eri driri ovu okpo be ama pazu aci si ekandrindriri ma alia ra; azini opi la, eri nga ama pa mi driarisi ra. 18#Mat 10:32; Ebra 11:25Te ka ’dini ku, ti, opi la, mi ma ni ra, ama ngani azi nga adrou mini ’diyi dri aluni ku kani wura meleru mini i’dileri inzi ku indi.
19Nebukadineza oli i adrasi nza nza, mileni oja di i ndu Sadaraka pi vu Mesaka pie, Abedinego pie. E’yo ’disi azi azini kini, ma dro aci ma ka ma aga te erini adrile kaleri ra paleko aziri. 20Eri azi ’ba okpo be tu asikari ini ma eselia azini ’diyi ma ombe Sadaraka pi, Mesaka pie, Abedinego pie, yi o’bezu aci si ekandrindri ’diri ma alia. 21Oti agupi ’diyi ani ocingiriki ra, isu de yi su yi ma ruaa bongo paari pie, bongo yini dri ombezuri pie, koti yini pie, bongo azini ’diyi be, yi o’be yi aci si ekandrindriruri ma alia. 22Opini yi azile okporurisi, azini aci nde ma sini kale turisi, aci ma adradrile ove ’ba te Sadaraka pi o’bepi ada, Mesaka pie, Abedinego pie ’diyi kaikai ra. 23#Zab 33:18; 43:19; Isa 43:2; 2 Kor 1:8-10; 1 Pet 4:12Agupi na ’diyi, Sadaraka, Mesaka, Abedinego pie, nga di 0’de va otizaru ad si ekandrindriruri ma alia ra. 24Etu ’dasi Nebukadineza osu i asia tu, enga mbele mbele ’yozu ’ba ’wara i vile ’diyi ma tia kini, Ama o’beni te ’ba otizaru ada na ku ya? Yi omvi e’yo opi tia kini, E, adaru, opi la. 25#Isa 43:2; Yob 1:6; Zab 34:7; Yoh 19:7; Ebra 1:14Eri omvi e’yo kini, Emi ndre, ma ndre ’ba su otruzaru, yini aciria ad ma alia, te ad eloni yi ma ruaa aluni ku; azini agu suri ma wura si i ekile adrou ma mvale. 26Nebukadineza nga di esi pari ad si ekandrindri drozuri ma tilia ogogo, nga ’yo kini, Sadaraka, Mesaka, Abedinego la emi ati’ba Mungu ovupi Uru Turini, emi efu amve, emi emu ’doa! Sadaraka pi Mesaka pie, Abedinego pie nga di efu aci aliarisi ra. 27#Mar 16:18; Ebra 11:34Opiyi pi, wakilia pie, ’ba angu nyapi ’diyi pie, ’ba ’wara opi vile e’yo amapi ’diyi pie, oku yi ra ondre agupi ’diyi ma rua ra, ndre aci ma okpo yo yi ma rua elozu; awuni yi ma dri’bi efi aluni ku indi, yi ma bongo paari ofuni ndu ’dini aluni ku, aci ma aji nguni yi ma ruaa ku indi. 28#1 Sur 5:20; Zab 34:7, 8; Efe 1:12, 13; 1 Pet 1:21Nebukadineza nga ’yo kini, Mungu Sadaraka pini, Mesaka pie, Abedinego pieri ma ru ma vu inzizaru, erini malaika erini ti pele ati’ba erini asi yini ’bapi eri ma dria a’itasi ’diyi opazurisi, yi oja e’yo opini ’yoleri ra, yi fe yi rua pi, yi kazu azi ngazu adrou dri, kani eri inzizu aluni ku, pe alu Mungu yiniri inzizu’i. 29#Azi 32:31; Zab 3:8; Dan 6:27E’yo ’disi ma azi azita ra: ’Ba dria alu alu, suru dria pie, ’ba ti ndu ndu ’yopi ’diyi pie, e’yo onzi ’yopi Mungu Sadaraka pi vile Mesaka pie, Abedinego pieri ma ruaa ’diyi yi nga eri ilisi nyiri nyiri, yi nga jo yini oja pari wara ’bazuriru; a’disiku adrou azini ecopi ’ba papi awa’dinini yo. 30’Di ma vutia opi nga Sadaraka pi, Mesaka pie Abedinego pie idri drile inzitasi angu Babulonini ma alia.
Bible in Lugbara © United Bible Societies, 1966.