Danieli 2
2
Danielini arabi Nebukadinezani ma efi ecezuri
1 #
E’do 41:8; Esi 6:1 Eli Nebukadinezani opi nyazu iriri ma alia orobi obi Nebukadinezani; asiniri e’yo osu ’dani, koni ani o’du ku. 2#Efu 7:11Opi nga di azi kini ma omve ojou, ’ba e’yo ondripi ’diyi pie, ’ba andri ndripi ’diyi pie, ’ba Kalideyaa ’diyi be, emuzu opi tia orobi ma eti nzezu. Yi eca ra, yi fi pa oso opi ma drilia. 3Opi ’yo yi tia kini, Orobi obi mani, ma asini e’yo osuni tu lezu efini nizu. 4’Ba Kalideyani ’diyi ’yo opi tia Suria tisi kini, Opi la, mi rua ma adri ala eli vusi eli vusi! Mi olu di orobi ati’ba mi vile ’diyi ma tia, ama di nga etini ece mi dri ani. 5Opi omvi e’yo ’ba Kalideyaru ’diyi ma tia kini, E’yoniri avi ma dri ’bo; te emi ka orobi ma obipiri ma eti olu ma dri efini be ku, yi nga emi oli nyingiriki, azini jo emini yi nga ofu pari wara ’bazuriru. 6Te emi ka orobi ma obipiri ma eti olu efini be ra, emi nga orodri afa feza be a’i ma vu kakau, inzita amboru be tu. E’yo’disi emi ma ece ma dri orobi, efiniri be. 7Yi omvi e’yo pale iririsi kini, Opi mi ma olu orobi ati’ba mini ma tia, ama di nga efini olu ra ani. 8Opi omvi e’yo kini, Ma ni ra adaru, emi geri nda etu isuzu, a’disiku emi ndre e’yoni efu ma vusi ’bo. 9#Esi 4:11Te emi ka ma dri orobi olu efini be ku, azita alu a’dule nga i ’ye emi ruaani; a’disiku emi ede emi asi inzo lizu e’yo onzikanyaru ’diyi e’dazu ma drilia, kpere mani ngaria o’duni ojazuria. E’yo ’disi emi olu orobi ma obipiri ma dri, ma ma ni ani kini emi eco orobi ma efi oluzaru ra beni. 10’Ba Kalideyani omvi e’yo opi tia kini, ’Ba wudrikuru dria aluni yo ecopi e’yo opini ’dori ecepiri; a’disiku opi aluni yo, kani amboni, kani ’ba ’ba dri cepiri, kani opi were e’yo awa’dinile ’di zipiri, kani ojou pi ma tia, kani ’ba e’yo ondripiri pie, kani ’ba Kalideyaruri be ti. 11#Efu 8:10; Dan 5:11; Mat 19:26E’yo opini lele ’diri ndazuni eri ewaru, ’ba aluni yo ecopi e’yo ’di ecepi opi driri, do ’dini adrou adripi ’ba rua ari be ’diyi be tualu ku ’dini ’diyi eceni ka yani.
12 #
Zab 76:10; 94:20; O’be 16:14; 19:12; 20:2; 28:15; Mat 2:16 E’yo ’disi opi nga ovu aokosi tu, oli i nza nza, fe azita kini ’ba ma ofu ’ba ondua be Babulonia ’diyi dria ra. 13Oji di azita ’diri kini ma ofu ’ba ondua be ’diyi ra; yi ri vini Danieli p iyi ndruzu ofuzu i agyi be. 14Etu ’dasi Danieli omvi e’yo onduasi e’yo vazasi indi, Arioki ambo asikari opi ma agei tepi ’diyi ma driliari ma tia, eri’i opini tini pele ’ba onduaru Babulonia ’diyi ofuzuri; 15omvi e’yo ’yo Arioki opi vile ambori ma tia kini, Afa fepi azita engapi opi vurini engazu rugbu ’doniri a’dini ya? Arioki nga di e’yo ’di ece Danieli dri. 16Danieli nga fi matu ’bazu opi vu, ’dini opi ma azi i dri o’duniri, a’disiku i nga orobi ’di ma efi olu opi dri ra. 17’Dini Danieli nga mu i vile loa, nga e’yo nderi olu i ma agyi tia, yi Hanania pi, Misaeli pie, Azaria pie, 18yi ma a’i yiki Mungu ’buari dri eri ma ko yi aza ani e’yo zizaru ’disi, Danieli pi agyi erini be kazu dri jazu ’ba onduaru Babulonia azini ’diyi pie tualu ku. 19#Kal 12:6; Yob 33:15, 16E’yo Zizaru ’diri nga di i ece Danieli dri afa ndreza ini berisi. Danieli nga di awa’difo fe tu Mungu ’buari dri lani. 20#Zab 113:2; 147:5; Yob 12:13; Yer 32:19; Mat 6:13Danieli omvi e’yo kini:
Ru Munguni ma ovu inzizaru ewu vusi ’dani ’dani, a’disiku ondua pi okpo be afa erini.
21 #
1 Sur 29:30; Esi 1:13; Dan 7:25; 4:17; Yob 12:18; Zab 75:6, 7; Yer 27:5; Yak 1:5 Te eri adri ewu oja etu beni;
eri opi onzeni, eri opi o’bani;
eri ondua awa ’ba ondua be ’diyi drini, azini nita ’ba e’yo vapi ’diyi drini;
22 #
Yob 12:22; Ebra 4:13; Zab 25:14; 139:11, 12; Dan 5:11 eri adri afa aliru zizaru ’diyi ma e’yo ece;
afa ovupi ini aliari eri ni ra, etuni adri ovu eri be.
23 #
Amo 3:7
Mi Mungu ma a’bipini, ma awa’difo ’yo mi vu tu, ma mi inzi tu, mi ondua fepi ma dri okpo beri, azini e’yo amani zile mi tiari e’dapi ma dri ’bori;
a’disiku mi ece ama dri e’yo nde opiniri ’bo.
24E’yo ’disi Danieli nga fi Arioki vu, eri agu ndra opini azile ’ba ondua be Babulonia ’diyi ofuzuri’i; eri mu eri vu, ’yo eri tia kini, Mi ofu ’ba ondua be Babulonia ’diyi ku; mi ofi ma opi ma drilia, te ma nga e’yo efi nderi ece opi dri ra. 25Arioki nga di nga mbeleru Danielini ofizu opi ma milia, ’yo tinia kini, Ma isu mva alu anzi Yudani ati’baru ’diyi ma eseliari, eri nga opi dri e’yo efi oluni. 26Opi omvi ’yo Danieli, eri ma ru azini Belitesaza ma tia kini, Mi eco ma dri orobi mani ndreleri ecezaru efini be ra ya? 27Danieli omvi e’yo opi ma tia kini, E’yo zizaru opini ozile okposi ’diri, ’ba onduaru ’diyi econi e’yo ’diri ecezaru opi dri ku, kani ’ba e’yo ondripi ’diyi ti, ka adri ojouni ti, kani ’ba andri ndripi ’diyi ti; 28#E’do 40:8; Zab 115:2, 3; Amo 4:13te Mungu ’buari indi e’yo zizaru ecepiri, azini eri ece opi Nebukadineza dri e’yo ngapi yi ’yepi etu asizuriari. Orobi mini azini afa ndreza yi ecepi mi dri gbolo mini dria ’diyi, yi ’di: 29Opi la, asisile egapi mi asia gbolo mini ma dria ’diyi ece e’yo ngapi yi ’yepi ndori; eri’i e’yo zizaru ecepiri ece mi dri e’yo ngapi ecapi vile ’diyi ’bo. 30#E’do 41:16; ’Yeta 3:12Te ma’i,: e’yo ziza ’di ovuni ecezaru ma dri ondua manini ’ba idriru ’diyi ma ondua agale rarisi ku, te opi ma ni efini ani beni, azini mi ma va asisile mi asiari indi.
31Mi’i, opi la, mi ne ndra, te mi ndre, wura amboru. Wura ’diri, ovupi okporu, dizani ovuzu turi, so pa mi milia; e’dazaniri ndrezaru uriuriru. 32Wura ’diri, driniri ovu mele onyi beri, agatiniri wuniri be yi dahabuni, azini aleniri pi o’duniri molaru, 33pa ojuni ayaru, pa nguku pi pa agele be, esele azini ayani, esele azini odrini, 34Mi lu ’dani cazu oni ’ba ma drini galeni kurini wura ’di ma pa edele ayasi azini odrisiri gbazu yi onyozu nyingirikiria; 35#Isa 2:2, 3; Mik 4:1, 2; Zab 22:27; 67:1, 2; Isa 11:9; Zek 14:8, 9; Eceza 11:15aya pi, odri pie mola pie, dahabu pie, mele pie yi dria tualu nga di yi onyo nyingiriki, yi nga ofu anya drileko akuma dria elisirile; oli ’du yi ji ziri, ’dini ’ba ngani pari yini isu dika ku. Te oni wura nde gbapiri ofu oni amboru, ga ani angu wudrikurua tre. 36Orobi nderi ’di; te ama nga efini e’da opi ma tia. 37#Ezr 7:12; 1:2; Isa 47:5Mi’i, opi la, mi opi opini, Mungu ’buari fe suru mi dri ’bo, ecozani pie, okponi pie, dizani pie dria; 38#Dan 4:21; Yer 27:6te pari ’ba ada ma anzini ovuzuria dria, eri fe anyapa asea azini aria ’bua ’diyi mi dri, eri fe mini ovuzu yi dria ma drilia opiru-mi’i, mi ovu dri nde meleru’i. 39#Dan 5:28Te mi ma vutia suru azini nga enga, te inzitani ngani ovu minirile ku; suru azini na molaruri nga enga vini indi, eri nga angu wudrikuruni nya dria. 40#Dan 7:7, 23; Yoh 11:48Suru suri nga ovu okpo be ekile ayale, ayani afa onyole azini afa ndele dria driarisi; azini ekile aya afa dria nzipirile, eri nga afa ’diyi onyo nyingiriki yi nzizu kai. 41Te ekile mini pa agele pi pa anzi be ’diyi ndrele ovu edezaru esele azini odri imvu sizurisi, esele azini ayasirile, ’dinile suru nde ma eseleni nga yi awa awa; te di suru nde ma esele aziniri nga ovu okpo be ayale, mini aya pi ndrele osazaru odri oritaru berile. 42Ekile pa anzini ovule edezaru esele aluri ayasi, esele aziniri vini odri imvu sizurinirisirile, ’dinile indi suru nderi ma esele aluri nga ovu afa okporurile, esele aziniri afa i afupi mbelerurile. 43Mini aya pi ndrele erini ovule osazaru odri oritaru berile, yi nga yi osa anzi ’bani ma eselia, te yi ngani yi eci tualu ku, ekile aya pini ecole yi ecizaru odri be kurile. 44#E’do 49:10; Zab 2:6, 9; Dan 4:3, 34; Mik 4:7; Luk 1:32; Isa 60:12; 1 Kor 15:24, 25Te ewu opi ’dayinirisi, Mungu ’buari nga suru ngapi dri japi ewu vusi ewu vusi kuri ’ba ra, yi ngani vini suru nde ma opi nyaza ku suru azini dri ku. Te suru nde nga suru awa’dini ’diyi onyo dria nyingiriki, yi dri jazu dria ra, te suru nderi nga pa so ’dani; 45#Isa 28:16mini oni ’ba ma drini nzele oni driasini kuri ndrele erini aya pi onyoria mola pie, odri imvu sizuri pie, dahabu pie, mele pie teketekerile. Mungu ambori ece opi dri e’yo ngapi i ’yepi ndori. Te eri ovu orobi e’yo adaniri ecepiri, azini e’yo efiniri ma alia inzo yo. 46#’Yeta 10:25; 14:13; Eceza 19:10; Ezr 6:10Etu ’dasi Nebukadineza nga i eco va Danielini inzizu, eri azi ’ba ma ede edeta, ma ve obiese eri dri. 47Opi omvi e’yo Danieli tia kini, Adada, Mungu eminiri eri Mungu Mungu dria ma driliari’i, eri Opi opiri, azini Mungu e’yo zizari ecepiri, a’disiku mini ecole e’yo zizaru ’diri ma efi ecelerisi. 48#E’do 41:40; Dan 4:9Opi linga di Danielini ofu ’ba amboru, fe eri dri afa awa’diforu karakarau afa ’wara ’dini ’diyi, fe eri nya opi angu Babulonini dria ma dria, azini ’ba eri opi amboru ’ba ondua be Babulonia ’diyi ma drilia dria. 49#O’be 28:12; Dan 1:17; Esi 2:19; Yer 39:3; Amo 5:15Danieli nga e’yoni zi opi ma tia, eri nga ani Sadaraka pi o’ba opiru Mesaka pie, Abedinego pie, angu ’Babuloniari ma drilia; te Danieli nga ini ovu Nebukadineza ma jotilea.
Bible in Lugbara © United Bible Societies, 1966.