2 Opi 6

Ogarani engazu yi driari

1 # 1 Sam 10:12; 2 Opi 2:3; 4:1, 38; 9:1 Nabianzi nga ’yo Elisa tia kini, Pari amani ovuzu mi vuri ovu were, econi amani ku. 2Ama zi mi i tia, mi fe ama ma mu Yoridania, ama dria alu alu ma isu pati, ama ma si pari amani ovuzuri ’daa. Eri omvi e’yo kini, Emi mu. 3Te ’ba ’alu ’yo kini, Kirikiri mi mu ama ati’ba miniru ’diyi be. Eri omvi e’yo kini, Ma mu ra, 4’Dini eri mu yi be. Yi ka ca Yoridania ’bo, yi ga pati ra. 5’Ba alu erini pati garia, ogara erini tu i, ’de yi alia; eri nga wu, Ma ye, epi mani la! Ma a’i te eri ’ba azini dri fo! 6#Efu 15:25; 2 Opi 2:21; 4:41’Ba Munguniri nga di ’yo, Eri ’de ngoa ya? Te eri nga parini ece eri dri. Elisa nga kali ega, nga eri ’be pari nderia, eri fe aya nde aci yi alia. 7Eri nga ’yo, Mi e’du eri, ’Dini eri eju dri erini, e’du eri ra.

Elisa pi ’ba Suriaa ’diyi be

8Te opi Suriaari ovu omba ’bazu Israeli be, eri ama e’yo ati’ba erini be kini, Ama nga hema mani aso pari ’doa azini ’daa. 9#2 Opi 13:14; Zab 25:14; O’be 3:32; Isa 6:13; Amo 3:7; Mat 5:13’Ba Munguniri pe ’ba ti opi Israeliniri vu kini, Mi ma ne onyiru, mi ma aga pari ’daasi ku, a’disiku ’ba Suriaa ’diyi yi nga si ’daa. 10Opi Israeliniri nga ’ba ti pe pari ’ba Mungunirini ’yole eri tiaria, ’dini eri pa i pari nderi ma alia kiri pale alu kani pale iri ’dinini ku.

11’Dini asisile opi Suriaarini oti tu e’yo nderisi; eri nga di ati’ba ini omve, nga ’yo yi tia kini, Emi eceni ma dri ku, a’di’i ama eselia ovu opi Israeliniri vuleru ya? 12’Ba alu ati’ba erini ’diyi eseliari ’yo kini, Yo, opi mani inzileri la, te Elisa, nabi ovupi Israeliari eri ece opi Israeliniri dri e’yo dria mini ’yole jo mini lazuri ma alia ’diyi. 13#E’do 37:17Opi nga ’yo, M mu ne, kani eri ngoa yani, ’diri ma ma pe ’ba ti eri ebizu ani. Te ’yo eri tia, Mi ne, eri ovu Dotania. 14’Dini eri pe asikari ongulumuru tre ’diyi ma ti, akanya pisi gari be; yi eca inisi, ace aku nderi kuru. 15#Efu 24:13Ati’bo ’ba Mungunirini ka enga angu trasi drio drio, eri ka fu amve, mi ne, asikari ongulumuru tualu akanya pie, gari pie yi ovu aku ageia kuru. Te ati’bo erini ’yo eri tia, Ma yee, opi mani la! Ama di ’ye sini ya? 16#2 Sam 22:3, 31; 2 Sur 32:7; Zab 3:3-8; 18:2; 91:2; O’be 18:10; 21:31; Isa 43:1; Rum 8:31Eri omvi e’yo kini, Mi ru ku; ’ba ovupi ama be ’diyi yi kakau aga ’ba ovupi yi be ’diyi ra. 17#2 Opi 2:11; Zab 34:7; 68:17; Zek 1:8; 6:1-7; Ebra 1:14Te Elisa nga zi kini, Yehova, mi zi mile erini fo, eri ma ne ani. Te Yehova nga di mile karilau nderini zi ra, eri nga ne ani; te mi ne, oni nde ga tre akanya pisi gari aciru be Elisa ageia dria. 18#E’do 19:11; Yob 5:14; ’Yeta 13:9’Ba Suriaa ’diyi ka esi va Elisa vu, eri zi Yehova tia kini, Ma matu ’ba mi vu, mi co ’ba ’diyi,dini yi ma mile ma obi yi ani. Eri nga di yi co yi mile obizu ekile e’yo Elisani ’yolerile. 19Te Elisa ’yo yi ria, ’Di ovuni geri emini ku, ’di ovuni vini aku nderi ku; emi bi ma vuti, ma nga emi ji ’ba emini ndaleri vu. Eri nga di yi dri ce Samariaa. 20Eri nga eca ’dini, yi ka fi Samariaa ’bo, Elisa nga ’yo, Yehova, mi zi ’ba ’diyi ma mile, ’dini yi ma ne ani. Yehova nga di mile yini zi, yi ne ani; te mi ne, yi ovu Samaria eselia agadua. 21#2 Opi 2:12; 8:9Opi Israeliniri ka yi ne ra eri ’yo Elisa tia kini, Ma ati, ma o’di yi ra ya? Ma o’di yi ra ya? 22#O’be 25:21; Rum 12:20Eri omvi e’yo kini, Mi ma o’di yi ku. Mi le ’ba mini obile ombaa seisi azini osusi ’diyi o’dizu ya? Mi ’ba enya yi ma drilia yi be, ’dini yi ma nya, ma mvu, ma mvi opi yini vu beni. 23#2 Opi 5:2; 24:2Eri nga di nyaka amboru ede yi dri; yi ka nya, ka mvu ’bo, eri nga di geri fe yi dri, yi nga mvi opi yini vu. Te asikari nguluru Suriaa ’diyi asini emu dika angu Israeliniria ku.

E’yo Elisani ’yele ’bani Samariani acezu kururiari

24Eri nga eca ’dini, ’di ma vutia Beni-hadadi opi Suriaari oku asikari erini ongulumuru ’diyi dria, eri mu uru Samariani acezu ombasi kuru. 25#Lev 26:26Abiri amboru turi nga ’de Samariaa, yini eri acele kururisi, yini ani akanya dri jezu sekeli kali aro dahabunisi, azini a’balau ze okele konakonaru jezu sekeli towi dahabunisi. 26Opi Israelinirini agaria abi kaliru dria, oku alu nga wu eri vu kini, Opi mani, kirikiri mi ko ma aza fo, opi mani la! 27Eri nga ’yo, Yehova ka mi aza ko ku, ma afa mi azi kozuri isu ngoa ya? Kani engazu akuma anya dizuria, kani pari zabibu ma su nzizuria ya? 28#Lip 18:23; Isa 22:1Opi nga ’yo eri tia, A’dini mi ’yeni ya? Eri nga e’yo omvi kini, Oku ’dori ’yo ma tia kini, Mi fe mi mvini, ama ma nya eri andru, te dru ama nga ma vileri nya. 29#Lev 26:29; Azi 28:53, 57’Dini ama a’di ma mvini, ama nya eri ra. Te dru ma ’yo eri tia, Mi fe mi mvini, ama ma nya eri; te eri zi i mvini ra. 30#E’do 37:29, 34; 1 Opi 21:27; 2 Opi 5:7; 18:37Eri eca ’dini, opi ka e’yo oku nderini ’yoleri eri ra, eri asi bongo ini-isu eri ovu agaria abi kaliru ma driasi-te ’ba lu eri, azini mi ne, eri su koliba eri ma ruaa bongo erini ma etia. 31#Rut 1:17; 2 Sam 3:9, 35; 1 Opi 2:23; 19:2; ’Yeta 23:14Eri nga di ’yo ra Mungu ma ’ye ma ’dini, azini agapi rari indi, Elisa Safati mvi ma dri ka ovu ’dani eri ma ruaa andru.

32 # Zab 118:6, 9; Eze 8:1; 20:1; Mal 3:16; Luk 13:32; 1 Opi 18:4 Isu Elisani riria jo erini ma alia, azini ’ba ’wara ori eri be tualu. Isu opi pe ’ba ovupi eli vuri ma ti ’bo; te de nga ojio ecani ku, Elisa ’yo ’ba ’wara ’diyi ma tia kini, Emi ne ra ya? ’Ba ’ba ’dipiri ma mvi ’dori pe ’ba ti ma dri lizu ’do’i! Emi ne, ojio nde ka nga eca ra, emi opi jotile eri dri, emi bi jotile okporu. Opi erini ma pa ma ididi ovuni eri ma vutia ku ya? 33#Yob 21:15; Zab 27:14; O’be 30:9; Isa 8:17; Hab 2:3; Mal 3:14; Eceza 16:9Erini nga e’yo ’yozu yi tiaria, ojio nga eca va eri vu, eri ’yo kini, Candi ’dori efu Yehova vu! Ma Yehovani te dika a’di e’yosi ya?

Currently Selected:

2 Opi 6: LB66

Highlight

Copy

Compare