1 Samueli 20

Daudi pini agu ’bazu Yonatani beri

1Te Daudi apa engazu Nayoti Ramaa ’diarisi, eri emu ’yozu Yonatani ma drilia kini, Ma ’ye a’dini ya? Ezata mani ngoni ya? E’yo onzi mani mi ati ma milia erini lani ndazu ma fuzuri a’di onzini ya? 2#E’do 44:7; Yos 22:29Te eri ’yo tinia, ’Dini aluni ku! Mi ngani dra ku. Mi ne, ma ati ’yeni e’yo aluni kani amboru kani wereru ecekokoru ma dri ku; te ma ati eco te e’yo nde oci masi ra ya? Eri ’dini yo. 3Te Daudi so oyo indi, kini,; Mi ati ni onyiru tu kini ma isu asi ndriza mi milia ’bo; eri ’yo vini ra, Yonatani ma ni e’yo ’diri ku, eri kazu ovuzu candisi ku. Te ndi, ekile Yehovani ovule idri berile, azini orindi minini adrile idrirurile, ace mani pa ’duzu alu ama eselia dra be. 4Yonatani nga di ’yo Daudi ma tia, E’yo mini leleri ka ovu ngoni ti, ma nga ’ye mi dri ra. 5#Kal 10:10; 28:11; 2 Opi 4:23; 1 Sur 23:31; 2 Sur 2:4; Ezr 3:5; Neh 10:33; Zab 81:3; Isa 1:13; Eze 45:17; 46:6; 1 Sam 19:2; Zab 55:12; Yoh 8:59; ’Yeta 17:14Te Daudi ’yo Yonatani ma tia, Mi ne, eri mba o’diru drusi, ma adrini ece rizu opi be nyaka ria ku; te mi ku ma ma mu ma zizu asea kpere o’du na ondresi. 6#1 Sam 16:4; 9:12Mi ati ka e’yo mani ovuzu ’doa kuri ega ra, mi ’yo ani kini, Daudi zi ma tia asi driasi kini ma ma ku i ma nzu aku ini Betelehemua; a’disiku edeta eli vusi eli vusi ori’ba yinisiri ’dale indio 7#Azi 1:23; 2 Sam 17:4Eri ka ’yo ’dini kini, ’ Eri ’yeke; ka’dini ati’bo mini nga asi anzuru isu ra; te eri ka ovu adrasi, ka’dini mi ma ni di kilili, eri otu i asia e’yo onzi. 8#Yos 2:14; Rut 1:8; 1 Sam 18:3; 23:18; 2 Sam 14:32E’yo ’disi mi ’ye di ati’bo miniri be asi ndrizasi, a’disiku mi eji ati’bo mini mi be aziza Yehovani ma alia mi’i. Te ezata ka ovu ma vu indi, mi ma ngulupi ma fu ma mi’i; te mi te ma eji mi ati vu ka a’di e’yosi ya? 9Te Yonatani ’yo ra, E’yo ’dinileri ma isu mi ku fo! Te ma ka te ni ma ati otu e’yo onzi ’yezu mi ruaa, ka’dini ma oluni te mi tia ku ya? 10Daudi nga di ’yo Yonatani ma tia kini, A’dini nga olu ma drini, mi ati ka e’yo omvi mi tia aokosi ya? 11Yonatani ’yo di Daudi ma ria, Mi emu, ama ma fu mu asea ’dale. Te yi fu iri tro muzu asea ra. 12#Yos 22:22Azini Yonatani ’yo Daudi ma tia, Yehova Mungu Israeliniri ma ovu ’ba e’yo ndrepiriru! Ma ka nga ma ati ma asi o’bi, drusi kani o’du narisi etu ’donile ra, mi ne, e’yo mi vuleru, Daudi, ka ovu onyiru, ma ngani di ’ba ti pe mi vu e’yo nderi ecezu mi dri ku ya? 13#Rut 1:17; Yos 1:5; 1 Sam 17:37; 1 Sur 22:11, 16Te ma ati ka le e’yo onzi ’yezu mi vu, Yehova ma ’ye ma Yonatanini ’dini, azini e’yo agapi rari indi, ma ka nga e’yo nde ece mi dri ku, ma ka nga vini mi dri geri fe ku ’dini mi ma mu asi anzuru be. Yehova ma ovu mi be ekile erini ndra ovule ma ati berile. 14Mi ece ma dri asi ndriza Yehovani ma kazu drazu ku, ewu mani ovuzu idrirurisi a’dule ku; 15#2 Sam 9:1-7; 21:7; E’do 21:23te indi mi ngani asi ndriza mini ku ecezu ori’ba mani dri ’dani ’dani ku; yo, ewu Yehovani ari’ba Daudini alu alu dria ’diyi dri jaria nyaku ma dria ’borisi ti. 16#1 Sam 25:22; 31:2; 2 Sam 4:7; 21:8’Dini Yonatani azi di aziza ori’ba Daudini be kini, Te Yehova ma ofe aroti ari’ba Daudini ma dria. 17#1 Sam 18:1; 19:2; 2 Sam 1:26Te Yonatani fe Daudini oyo sozu dika, a’disiku ale erini eri vurisi; te eri le eri ekile erini i ma ngulupi lelerile.

18Yonatani ’yo eri ma tia, Dru eri mba o’diru; yi nga e’yo mini ovuzu yori ega ra, a’disiku pari mini rizuri nga ovu ndru. 19#1 Sam 19:2Te mi ka adri o’du na ’bo, mi nga di si andre ’dale mbele, emuzu pari ndra mini mi zizu o’du ndrakarisiria, mi nga di awu eni odroruza nguluri ma ageia ’daa. 20Azini ma nga ’ye na ogbi kalania, ekile ma le li ogbile. 21#Azi 6:13; 10:20; Zab 63:12; Isa 65:16; Yer 4:2Mi ne, ma nga mva ma ti pe ra kini, Mi mu ’ye ’diyi ndazu. Ma ka nga ’yo mva nde ma tia, Mi ne, ’ye yi ovu kala ’doleruria, mi enze yi; ka’dini mi ma emu, a’disiku ekile Yehovani ovule idrirurile, asi anzuru ovu mi vi, e’yo onziruni yo. 22Te ma ka ’yo mva nde ma tia ’dini kini, Mi ne, ’ye nde yi mi drilia; mi mu mu, a’disiku Yehova pe mi tini. 23E’yo te amani o’yole mi beri ma e’yosi, mi ne, Yehova ovu ani ama eselia mi be ’dani ’dani.

24 # O’be 27:12 Te Daudi zi di i asea; mba ka ega ra, opi ri va nyaka nyazu. 25#1 Sam 14:50Te opi ri ’bili ini ma dria ekile okurile, adaru ri ’bili abi ageiari ma dria; te Yonatani so pa ra, azini Abineri ri Saulo ageia, te ku pari Daudiniri pirini.

26 # Lev 6:2; 7:21; Kal 19:16; 1 Kor 15:33; 2 Kor 6:17; Efe 2:1-3; 5:11 Te Saulo ’yoni e’yo azini etu ’dasi ku; erini egale kini, Afa azini ’ye erini, eri alaru yo; ada eri alaru yo. 27Te eri nga eca dru ’dini, o’du iri mba o’dirunisi pari Daudini ovu pirini. Azini Saulo ’yo i ma mvi Yonatani ma tia, Yese mvi emuni nyakaa aje azini andru ku a’disi ya? 28Te Yonatani omvi e’yo Saulo ma ’tia, Daudi zi ma tia asi driasi muzu Betelehemua; 29eri ’yo ra kini, Mi fe ma ma mu, ma matu ’ba mi vu; a’disiku ori’ba amani yi ovu edeta edeza be aku ndea, azini ma adripi azi ma tia ovuzu ’dale indio Te curu’do, e’yo mani ka ovu mi milia ba, mi ku ma ma mu ma adripi yi ndrezu, ma matu ’ba mi vu. E’yo ’disi eri emuni mesa opini ma tia ku. 30Te aoko nya Sauloni tu Yonatanisi, eri ’yo eri ma tia kini, Mi oku ambo beri ma mvi’i, ma nini ku kini, mi pe Yese mvini mini drinza isuzu mi’ini ku ya? azini rua pilili mi andriniri ma drinzasi. 31Te de nga Yese mvi ovu idri be nyakua, mi ngani pa so okporu ku, kani opi nyaza mini ngani pa so ku indio E’yo ’disi curu’do mi pe ’ba ti eri ejizu ma vu, a’disiku eri eco drazaru. 32#E’do 31:36; 1 Sam 19:5; Zab 25:3; 69:4; O’be 14:25; 24:11; Mat 27:23; Luk 23:32; Yoh 7:31; 15:25Te Yonatani omvi e’yo i ati Saulo ma tia, ’yo eri ma tia kini, Eri ma dra a’di e’yosi ya? Eri ’ye a’dini ya? 33Te Saulo ’di eri ajusi eri fuzu; e’yo ’disi Yonatani ni di i ati le te dere Daudini fuzu ra. 34’Dini Yonatani enga mesa tiasi, eri nyani nyaka o’du iri mba nderinirisi ku, a’disiku eri ovu candisi Daudi ma e’yosi, i atini eri dri drinza felerisi. 35Te dru o’bitisi ’dini, Yonatani fu muzu asea etu yini pele Daudi berisi, azini mva gaaru alu eri be indio 36Eri nga ’yo mva nderi ma tia, Mi nzu, mi mu ’ye mani gbile ’diyi ndazu. Te erini nzuria, eri gbi ’ye alu eri drilesi. 37Te mva ndeni ecazu pari Yonatanini ’ye gbizuria, Yonatani oyu eri vu kini, ’Ye nde ovuni mi drilia ’dale ku ya? 38Te Yonatani oyu mva nderi vu kini, Mi nzu ongusi, mi ’ye mbele, mi ici mi dri ku. Azini mva Yonatanini onze ’ye ra, eri emu ambo iniri vu. 39Te mva nderi nini e’yo nderi aluni ku; kiri Yonatani pi Daudi be yi ni e’yo nderini. 40Te Yonatani nga afa ini ’diyi fe mva ini ma dria, ’yo tinia kini, Mi mu, mi ji yi akua. 41Kpere kpere mva ndeni muzu ’boria, Daudi enga uruleru, avu va, elu i dri va pale na; yi zi yi o’bolo ndruzasi avasi indi, yi owu iritro iritro, kpere taini Daudini siria. 42Yonatani nga di ’yo Daudi ma tia, Mi mu asi anzuru be, a’disiku ama so oyo iri tro ru Yehovanisi ’bo kini, Yehova ma ovu ama eselia mi be, azini ori amani ma eselia ori mini be ’dani ’dani. Eri enga ra, eri mu ra; te Yonatani mu akua ra.

Currently Selected:

1 Samueli 20: LB66

Highlight

Copy

Compare