1 Samueli 18
18
Yonatanini aziza azizu Daudi beri
1 #
E’do 44:30; 2 Sam 18:33; Kol 2:2; Azi 13:6; 1 Sam 19:2; 20:17; 2 Sam 1:26; O’be 18:24; Yoh 15:17-19; 1 Yoh 3:12-14 Te eri nga eca ’dini, eri ka e’yo ’yo Saulo be ’bo, asi Yonatanini pi eci i Daudiniri be tualu, azini Yonatani le eri ekile ini i ma ngulupi lelerile. 2#1 Sam 8:11; 14:52; 17:15Saulo ’du di eri o’du ’dasi, eri kuni eri ma mvi di i ati vile akua dika ku. 3Yonatani pi nga di aziza azi Daudi be, a’disiku eri le eri ekile ini i ma ngulupi lelerile. 4Te Yonatani tru kanzu ovupi i ma ruaari, fe eri Daudi dri, afa suza ombani ayaru ’diyi pie, sei pie, osu pie, afa erini i ma opile adizuri pie. 5Te Daudi fu mu pari dria Sauloni tini pezuria, e’yo ’yezu dria onduasi; te Saulo ’ba eri ’ba ombaa ’diyi ma drilia, azini e’yo nde ovu onyiru ’ba dria ma milia, azini ati’ba Sauloni ’diyi ma milia indi.
Sauloni a’ya ’bazu Daudi vuri
6 #
Efu 15:20; Lip 5:1, 2; 11:34; Zab 68:25; 150:4; Yer 31:4 Eri nga eca ’dini yini emuria, Daudini emviria engazu ’ba Filisitiaa ’diyi ofuzuriasi, oku yi efu aku dria Israelini ’diyi vusi, yi emu ayikosi dri fuzu opi Saulo be, ongo ngoza be ongo tuza pie, arimva ’diyi pisi, ayiko pie, afa o’di cozu ’diyi be. 7#1 Sam 21:11; 29:5; Efu 15:21; Lip 5:3; 2 Sur 5:13; Zab 24:1-10; Isa 5:1Oku nde ’diyi yi ngo yi eselia yini o’di cozuria kini, Saulo ofu ini alifule, Te Daudi ofu ini alifu mudrile. 8#Ekl 4:4Te Saulo ovu adrasi, e’yo ’yoza ’diri fe eri dri asi onzi; te eri ’yo ra kini, Kini Daudini alifu mudrile, azini mani alifule a’dule; azini erini a’dini ya pe lu opi nyazani? 9#E’do 4:5; 31:2, 5; Mat 20:15; Luk 15:28Te Saulo su mile Daudi ma ruaa engazu o’du ’dasi kpere drile. 10#1 Sam 16:14; 19:24; 1 Opi 18:29; ’Yeta 16:16Eri nga eca drusi ’dini, orindi onzi engapi Mungu vuri eca Saulo ma dria okporu, fe eri azazu saaru jo alia; te Daudi co o’di i ma drisi ekile erini adrile ’yele etu vusirile. Isu de Saulo ma dria aju indi. 11#1 Sam 19:10; 20:33; O’be 27:24Te Saulo ’di aju nderi ra; a’disiku eri ’yo ra, Ma nga Daudini ’di abi ruaa ani. Te Daudi ona i paleko iri.
12 #
1 Sam 16:13; 28:15 Te Saulo ovu Daudisi urisi a’disiku Yehovani ovule eri berisi, azini erini Sauloni kule rarisi. 13#Kal 27:17; 2 Sam 5:2’Dini Saulo dro eri i ma ageiasi fa, ’ba eri asikari alifu alu ma drilia; ’dini eri fu azini eri efi ’ba dria ma milia. 14#E’do 39:2; Yos 6:27; 1 Sam 10:7; 16:18; ’Yeta 7:9; 18:10Te Daudi ’ye e’yo dria onduasi geri inia dria; azini Yehova ovu eri be. 15Te Saulo ka ndre eri e’yo dria ’ye onduasi, eri ovu erisi urisi, 16Te ’ba Israelini dria azini ’ba Yudani ’diyi dria yi le Daudini; a’disiku eri fu amve azini efi yi ma milia. 17#1 Sam 17:25; Kal 32:20; 1 Sam 25:28; 2 Sam 12:9Te Saulo ’yo Daudi ma tia, Mi i ne, ma zi osipi okori Merabu’i; ma nga eri fe mi dri okuru; mi ma adri kiri asi teza be ma dri, a’di Yehovani ’dizu. Te Saulo ’yo ra, Ma ngani ma dri ’ba eri ma ruaa ku, te ’ba Filisitiaa ’diyi nga dri ’ba eri ma ruaani. 18#Rut 2:10; 1 Sam 9:21; 2 Sam 7:18; O’be 15:33Te Daudi ’yo Saulo ma ria, Ma a’dini ya, kani ori’ba ma atini Israeli ma eselia a’dini ya, mani ovuzu opi zi ma agupiru? 19#2 Sam 21:8; Lip 7:22Te eri nga eca etu yini ’yezu Merabu Saulo ma zini fezu Daudi dririsi, fe eri Adrieli ’ba Meholatini dri okuru.
20Te Mikali, Saulo zi, le Daudini ra; yi olu e’yoni Sauloni ra, te e’yo nde ovu eri ma milia onyiru. 21#Efu 10:7; Zab 7:14-16; O’be 26:24-26; Yer 5:26; 9:8Saulo ’yo ra, Ma nga eri fe erini ra, ’dini ma ovu embaru eri dri beni, azini ’ba Filisitiaa ’diyi ma dri ma ovu eri ma ruaa beni. E’yo ’disi Saulo ’yo Daudi ma tia pale irisi kini, Andru mi nga ovu ma zi be. 22Te Saulo azi ati’ba erini ’diyi ria kini, Emi ndro e’yo Daudi be, emi ’yo, Mi ne, opi ovu ayikosi mi e’yosi, azini ati’ba erini ’diyi dria yi le mi ra; e’yo ’disi curu’do mi ma ovu opi zi ma agupiru. 23Te ati’ba Sauloni ’diyi yi olu e’yo ’diyi Daudi ma bilia ra. Te Daudi ’yo, Ovuzu opi zi ma agupiru e’da emini e’yo wereru ya; mi ne, ma alioni, ru mani kuni ku. 24Te ati’ba Sauloni olu eri ma tia kini, Daudi ’yo e’yo ’dinile. 25#E’do 34:12; Efu 22:17; 1 Sam 14:24Te Saulo ’yo ra, Emi ma ’yo Daudi ma tia ’dini, Opi leni lenyi ku, te agele ma enyi drile ’ba Filisitiaa ’diyi ma ruaa ’diyi turu alu, ’dini ari’ba opini ma arioti ofezu, Te Saulo le de Daudini fe e’dezu ’ba Filisitiaa ’diyi ma dria. 26Te ati’ba erini ka e’yo ’diyi olu Daudi tia ’bo, eri ovu onyiru tu Daudi ma milia ovuzu opi zi ma agupiru. De nga o’du nde ’diyi deni yi ku, 27#2 Sam 3:14Daudi enga ra, eri mu ra, eri’i ’ba ini pie, yi ofu ’ba Filisitiaa ’diyi turu iri; te Daudi eji agele drile yini ma enyi, fe vini yi dria opi dri, ’dini eri ma ovu opi zi ma agupiru ani. Te Saulo fe i zi Mikalini eri dri okuru, 28Te Saulo ne, eri ni kini Yehova ovu Daudi be, azini Mikali Saulo ma zi le eri ra. 29#1 Sam 12:15; Yob 5:2, 12, 13; Zab 37:12, 13; Ekl 4:4; Yak 2:13’Dini Saulo nga kiri ’ye Daudisi urisi; te Saulo ovu ari’bo Daudiniru’dani. 30#2 Sam 11:1; Luk 21:15Opianzi Filisitiaa ’diyi efu ra, eri nga eca ’dini, o’du dria yini efuzuria, Daudi ’ye e’yo onduasi ga ati’ba Sauloni ’diyi dria ra; ’dini ru erini ku tu ani.
Currently Selected:
1 Samueli 18: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
