1 Samueli 1
1
Samuelini osizuri
1 #
1 Sur 6:27; Rut 1:2 Isu de ndra agu alu indi, eri ’ba Ramataimu-zofimu angu oniru Efiraimuari ma aliari, runi Elikana’i Yerohamu mvi, Yerohamu Elihu mvi, Elihu Tohu mvi, Tohu Zufu mvi, suru Efiraimuari. 2Eri oku be iri; aluri ma ru Hana’i, aziri ma ru Penina’i. Penina ovu anzi beni, te Hanovu ami kokoru. 3#Azi 12:5; Yos 18:1; Lip 18:31; Zab 78:60; Yer 7:12-14Te agu nderi adri enga eri vile akuarisi muzu elivusi eli vusi Yehova asikari ongulumuruniri inzizu azini edeta edezu eri dri Siloa. De anzi Eli atalau edeta edepi Yehova dririni, Hofini pi Finehasi be ’dale indi. 4O’du Elikanani edeta edezuri ka eca ra, eri fe afa feza -oku erini Penina dri, anzi erini agupia’nziru ’diyi pie, ezoanzi be dria; 5#E’do 30:2te Hana dri eri fe afa feza mileko iri, erini Hanani lelerisi, te Yehova opi opojo erini ti ci. 6A’i erini ecandi eri tu, matu fezu eri dri, Yehovani eri ma opojo opile cirisi. 7#Efu 23:14; Azi 16:16; Luk 2:41Agupi erinini ’yeria ’dini eli vusi eli vusi, Hanani turia jo Yehovania, Penina ecandi eri ’dini. E’yo ’disi eri wu ra, nyani afa ku. 8#Rut 4:15Te agupi erini Elikana ’yo eri ma tia kini, Hana, mi owu a’di e’yosi ya? Mi nyani afa ku a’di e’yosi ya? Asi mini ovu candisi a’disi ya? Ma ovuni mi dri agupianzi mudri ’diyi ma paria aga ra ku ya?
9 #
1 Sam 3:3
’Dini Hana enga yini nyaka nyaria azini mvuria Siloa ’boria. Isu de Eli atalau edeta edepiri ri i vile oguna dria, otile hekalu Yehovaniri ma pati ageia. 10#Yob 7:11; 10:1; Kal 30:3; 2 Sam 17:8Te Hana ma asi ovu matusi ambo tu, eri zi Yehova tia, eri wu okporu taisi. 11#Kal 6:5; E’do 28:20; Kal 21:2; 30:3-8; Lip 11:30; Ekl 5:4; E’do 29:32; Efu 4:31; 2 Sam 16:12; Zab 25:18; E’do 8:1; 30:22; Zab 132:1, 2Te eri so oyo kini, Yehova asikari ongulumuruniri la, mi ka nga candi ati’bo okuru minirini ne ra, mi ka ma e’yo ega ra, mi ka ati’bo okuru miniri ma e’yo avi ku, te mi ka agupimva fe ati’bo okuru miniri dri ra, ka’dini ma nga eri fe Yehova dri ewu erinisi dria, azini idri ngani eri ma dri elo ku. 12Te eri nga eca ’ dini, erini ziria ’dani Yehova ma drilia, Eli ne tile erini ra. 13Te Hana eri ’yo e’yo asisi a’dule, eri ma ti ’ye muni muni, te ’ba erini o’duko erini ku; e’yo ’disi Eli ega eri ati ewasi. 14Te Eli ’yo eri ma tia, Mi nga ati ’dini kpere agopi ya? Mi ku patiefi su ja kie. 15#Zab 62:8Te Hana omvi e’yo kini, Yo, opi mani, ma ovu oku ovupi matu be ma asiari; ma mvuni patiefi ma su pi ewa okaru be ku, te ma ma asi ofu Yehova ma drilia. 16#2 Kor 6:15Mi ega ati’bo okuru miniri ovu oku saaruni ku, a’disiku ma ovu ’do e’yo ’yozu matu mani turi pi ma alia ecandiza maniri be. 17#Lip 18:6; 1 Sam 25:35; Luk 7:50; 8:48; Zab 20:4, 5Eli omvi e’yo kini, Mi mu asi anzuru be, azini Mungu Israeliniri ma fe mi dri e’yo mini zile eri tiari. 18#E’do 33:15; Rut 2:13; Ekl 9:7; Yoh 16:24Te eri ’yo, Mi ku ati’bo okuru miniri ma isu asi ndriza mi ma milia. ’Dini oku nderi mu di ra, eri nya afa ra, azini mile erini ovuni candisi dika ku.
19 #
E’do 30:22
Te yi enga o’biti drio drio Yehovani inzizu; te yi mvi cazu yi vile joa Ramaa. Azini Elikana nga di i eci oku erini Hana be ra, te Yehova ega e’yo erini ra; 20te eri nga eca ’dini, ewu nde ka eca ra, Hana nga a isu ra, eri osi agupimvani, te eri ’da runi Samueli’i, kini, A’disiku mani eri zile Yehova tiarisi.
21Te agu nde Elikanaruri ’ba eri vile joa ’diyi pie dria, yi tu mu edeta eli vusiri pi fezu Yehova dri, oyo soza erini be. 22#Luk 2:22; 1 Sam 2:11; 3:1Te Hana tuni ini ku, te eri ’yo agupi ini ma ria kini, Ma ngani tu mu ’dale ku, kpere mvani ba kuria; ma nga eri ji ndo, ’dini eri ma efu Yehova ma milia ovuzu ’dale ’dani ’dani. 23#Kal 30:7; 2 Sam 7:25Te agupi erini Elikana ’yo tinia kini, Mi ’ye e’yo endrepi mi milia onyiruri, mi te kpere mini kuria mva endruzu ’boria; Yehova ma ’ye lu e’yo ini. ’Dini oku nderi te ra, eri endru mva cazu o’du erini kuzu mva endruzuri tia. 24#Azi 12:5Te erini kuria mva endruzu ’boria, eri ’du eri ji indi, monio na ’diyi anyafura abaka aluri pie, patiefi ma su kerea aluri pie; eri ji di eri jo Yehovani Siloaria, de mva nde nga werearu. 25Yi li monio ra, yi ji mva nde Eli vu. 26Te Hana ’yo ra, Opi mani la! Ekile orindi minini ovule indirile, opi mani, ma ovu oku ndra pa sopi mi ageia ’doa zipi Yehova ma tiari’i. 27#Mat 7:7Ma zi ndra mva ’diri ma e’yosi; azini Yehova fe ma dri afa mani e’yoni zile eri ma tiari. 28#E’do 24:26, 52E’yo ’disi ma fe vini alu eri Yehova dri indi; ewu erinisi dria eri nga ovu Yehovani. ’Dini eri inzi Yehovani ’daa.
Currently Selected:
1 Samueli 1: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
