1 Opi 6

Sulemanini jo Yehovani sizuri

1Eri eca ’dini, eli turu su drini kali aro anzi Israelinini fuzu angu Misiriniasirisi, eli su Sulemanini adrizu opirurisi, eri e’do jo Yehovani si, mba Zivisi, ’di mba iriri. 2#Eze 41:1Jo Sulemanini sile Yehova driri ma oconi ovu wuale kali azia, walani wuale kali iri, azini oco edrezarini wuale kali na. 3Jobileko eti jo nde ma hekalu ma driliari ma oconi ovu wuale kali iri ekile jo nderi ma walani ovulerile; wala erini jo driliari ovu wuale medri, 4#Eze 40:16Eri ede derisa lo nderini keikei osule osurisi. 5Te jo nde ma abi ruaa eri si jo adroza jo ma kalaasi dria, jo hekaluni ma abi ruaa, pari alatararuri be iritro; azini eri oli jo odrole kalaasi ’diyi ma ale dria. 6Jo oliza valeru ’diyi ma wala wuale towi, jo adroza agaduari ma wala wuale azia, uruleruri ma wala wuale aziri; kala amveleruria eri ede oji abi ruaa, ’dini pati nde ma fi abi alia ku beni. 7Yini jo siria, yi ede eri oni ’bani ruani edele pari ’bani oni onzezuria ’diyisi; yini nde siria ’ba yi erini awu opaani, kani ogarani, kani aya azinini jo nde ma alia aluni ku. 8Jo adroza agadua ’diyi ma jotile ovu jo ma kala dri ndialeruria; yi tu jo adroza agaduaria otufe otile anazarurisi, engazu agaduaria yi tu fizu jo adroza naria ’dini indi. 9’Dini eri si jo nderi, eri de eri ra; eri ’ba jo nderi ma dri pati osiza marionisi. 10Eri si jo adroza ’diyi jo nde ma ruaa kalaasi dria, jo adroza ’diyi ma oco edrezari ovu wuale towi; yi eci yi jo nde ma ruaa pati osiza marionisi. 11O’duko Yehovani eca Sulemani vu kini, 12Jo mini sile ’dori ma e’yosi, mi ka nga aci e’yo mani azile ’diyi ma alia, mi ka e’yo liza mani ’ye, azini mi ka azita mani ma ta mba dria, acizu alenia indi, ka’dini ma nga fe ani e’yo mani ’yole mi tiari azini mani ’yole Daudi mi ati tiari ma ’ye i trotro. 13#Efu 25:8; 29:45; Lev 26:11; Zab 132:13, 14; Eze 37:26-28; 2 Kor 6:16; Ebra 3:6; 13:5; Eceza 21:3; Azi 31:6Indi vini ima nga adri anzi Israelini ma eselia, ma ngani suru mani Israeliniri ku Itoko ku.

14’Dini Sulemani si jo nderi, eri de eri ra. 15Abi alialeru ’diyi eri ede pati osiza marionisi; engazu nyakua cazu abi dria uru eri a’bu eri dria alenia pati osizasi; azini eri a’bu jo ale vari pati osiza masanisi. 16#Efu 26:33; Lev 7:6; 16:2; Kal 18:10; 1 Opi 8:6; 2 Sur 3:8; Eze 45:3; Ebra 9:3Eri ede pari jo ma esele vileria coni wuale kali iri, ede eri pati osiza marionisi engazu nyakua cazu abi dria uru, eri si eri jo ma esele alialeruria ovuzu pari e’yo ecezaniriru, ada pari alatararu turiru. 17Jo hekaluni ma oco, pari alatararu turi ma driliari, uvu wuale kali su. 18Jo alialeru ma ruaa dria pati marioni, oli pati osiza ’diyi ma ruaa ongbu azini fu ayipi ’bo ’diyi eri ovu dria pati marioni, econi oni nezaru aluni ku. 19#Efu 40:20; 1 Opi 8:6-10Eri ede pari e’yo ecezaniri jo ma alia alialeru, sanduku aziza Yehovaniri ’bazu alenia. 20Pari e’yo ecezaniri ma oconi wuale kali iri, walani wuale kali iri, oco edrezarini wuale kali iri; eri a’bo eri rua mele alatararurisi. Azini eri ede pari edeta edezuri pati marionisi indi. 21Te Sulemani a’bu jo ale dria dria mele alatararurisi, eri ase anziriku meleru pari e’yo ecezaniri drilia, eri a’bu ruani melesi. 22#Efu 30:1Eri a’bu jo nderi dria dria melesi cazu jo ndeni i dezuria dria, Eri a’bu pari edeta edezu pari e’yo ecezaniri ma aliari ma rua melesi indi.

23 # Efu 25:20; 37:7-9; 2 Sur 3:10-12; 5:8 Pari e’yo ecezaniri ma alia eri ede kerubi iri pati mizeitunisi, yi iri tro ma zoza wuale mudri, 24Kerubi ma opile alu ovu wuale towi, opile azini ovu wuale towi indi; engazu opile drilia cazu opile drile aziniria ovu wuale mudri. 25Keru bi azininiri ma zoza ovu wuale mudri; kerubi iri nde ’diyi ovu o’bizaru tro tro, wura yini si yi si si. 26Kerubi aluri ma zoza ovu wuale mudri, te kerubi aziniri ’dini indi. 27#Efu 25:20; 37:9; 2 Sur 5:8Eri ’ba kerubi ’diyi jo ’a’alesiria, te kerubi ’diyi ma opile ovu ajazaru, ’dini opidrile kerubi alurini do abi rua, azini opidrile kerubi azinirini elo abi aziniri ma rua; te opidrile yini isu ti jo agaduaria. 28Eri a’bu kerubi nde ’diyi melesi. 29Te jo ma abi rua dria, adaru dria jo alesi azini amvelerulesi eri opa wura kerubi pini, pati ituni pie, fu ayizaru ’diyi pie. 30Eri a’bu jo ale vari dria melesi, jo alialeru azini amveleru indi. 31#Yoh 10:7Te pari ’bani fizu pari e’yo ecezaniriari, eri ede jotileni pati mizeitunisi; pati i’dile jotile kalaa ’diyi, alale uruleruri be, ovu abi nde ma esele alu towiniri. 32Eri ede jotile iri pati mizeitunisi, eri opa wura kerubi pini yi ruaa, ituni pie, fu ayipi ’bo ’diyi pie; eri a’bu rua yini melesi, eri a’bu kerubi pi ma rua itu be melesi indi.

33Te pari ’bani fizu hekaluarisi, eri i’di pati jotile kalaa ’diyi pati mizeitunisi, yi ovu abi nde ma esele alu suniri, 34#Eze 41:23ede jotile iri pati masanisi indi; tiko iri jotile aluni agbo yi agbo agbo, azini tiko iri jotile azinirini agbo yi ’dinile indi. 35Eri opa wura kerubi pini yi ruaa, ituni pie, fu ayipi ’bo ’diyi pie; eri a’bu yi melesi wura erini opaleri ma miliasi dria. 36Eri ede irii jo ageiari oni opale opa ’diyisi, otizaru mileko na, azini mileko alu pari osiza marionisi.

37Jo Yehovani ma ndu ovu ’bazaru eli sunsi mba Zivinisi. 38Eli mudri drini alurisi, mba aro Bulinirisi, yi de jo nderi eseleni be dria, wurani vusi dria. Eri si jo nderi eli aziri.

Currently Selected:

1 Opi 6: LB66

Highlight

Copy

Compare