1 Opi 5

Sulemani pini ti ecizu opi Hiramu beri

1 # 2 Sam 5:11; Amo 1:9 Te Hiramu opi Turoari, eri ka eri kini yi osu odu Sulemani ma dria ovuzu opiru ati ma paria ’bo, eri pe ati’ba ini ma ti eri vu; a’disiku Hiramu le ndra Daudini o’du dria ’dani. 2#2 Sur 2:3Te Sulemani pe ’ba ti Hiramu vu ’yozu, 3#2 Sam 7:5; 1 Sur 22:8; 28:3; 2 Sur 6:6-8Mi ni ra, ma ati Daudi econi ndra jo sizaru Yehova Mungu eriniri ma rusi ku ombani ovule eri ma ageia kuru kururisi, ecazu o’du Yehovani juru ’bazu va eri ma palaaria, 4#1 Sur 22:9; Zab 72:7; Isa 9:7Te curu’do Yehova Mungu mani fe ava liza ma dri angu ma kalaasi dria ra; ari’ba yo, e’yo ecapi drileonziruri vini yo. 5#2 Sur 2:4; 2 Sam 7:12, 13; 1 Sur 22:10Te mi ndre, ma ’ba asi mani jo sizu Yehova Mungu maniri ma rusi, ekile Yehovani ndra ’yole Daudi ma ati tiarile, kini, Mvi mini mani ngale ’bale oguna mini dria mi ma pariari, eri nga jo si ma rusini. 6#1 Opi 6:9, 10, 16, 20; 2 Sur 2:8; Eze 27:5Ka’dini mi azi yi ma ga pati marioni ovupi Lebanonia ’diyi ma dri; ati’ba mani nga ovu ati’ba mini be tualu; te ma nga mi dri oya ofe ati’ba mini vusi ekile e’yo dria mini ngale ’yolerile; a’disiku mi ni ’ba ama eselia aluni nipi pati gapi ekile ’ba Sidonia ’diyini nilerileni yo. 7Eri eca ’dini, Hiramu ka e’yo Sulemanini eri ra, eri ovu ayikosi tu, eri ’yo, Yehova ma ovu inzizaru andru, eri’i mva onduaru fepi Daudi dri ovuzu suru ambo ’dori ma driliari. 8Te Hiramu pe ’ba ti Sulemani vu ’yozu, Ma eri e’yo mini tini pele ma vuri ’bo; ma nga e’yo dria mini leleri ’ye pati marionisi azini pati masarusi. 9#1 Opi 9:20, 21; 2 Sur 2:16; Ezr 3:7; Eze 27:17; ’Yeta 12:20Ati’ba mani ’diyi nga yi eji engazu Lebanoniasi cazu miria; te ma nga yi eci tualu acizu miri dria cazu pari mini ngale ecele ma driria, ma nga fe ’ba ma ayu yi, mi nga yi isu o’du ’daa; te mi nga e’yo mani leleri ’ye nyaka fezu ’ba ma vile joa ’diyi dri. 10’Dini Hiramu fe ndra Sulemani dri pati marioni azini masani dria ekile erini lelerile. 11#2 Sur 2:10Te Sulemani fe Hiramu dri nganu kekele alifu kali iri nyakaru ’ba eri vile joa ’diyi dri, azini lodu obi alia kali iri. Sulemani fe Hiramu dri ’dini eli vusi eli vusi. 12#1 Opi 3:12; 2 Sur 1:12; Yak 1:5Te Yehova fe Sulemani dri ondua ekile erini azile eri tiarile; asi anzuru ovu Hiramu pi ma eselia Sulemani be; te ’ba ’diyi iri tro eci ti yi ma eselia e’yo azizasi.

13Te opi Sulemani oku ’ba azi ngapi ’diyi engazu Israeli dria ma alia; ’ba erini okule ’diyi yi ovu alifu kali na. 14#1 Opi 12:18Eri pe yi ma ti Lebanonia, ’ba alifu mudri elezu mba alu alu vusi; mba alu yi ovu Lebanonia, mba iri yi ovu akua; Adoniramu ovu ’ba okule azia ’diyi ma drilia. 15’Ba Sulemanini teri ojipi ’diyi yi ovu alifu kali aziri, ’ba oni nzepi oni ruaa ’diyi yi ovu alifu kali aro; 16drinia ’ba ’wara Sulemanini azi drilia ’diyi ovu alifu na drini turu na, yi ovu ’ba azi ngapi ’diyi ma drilia. 17Ekile opini azilerile yi onze oni amboru aje ambosi ’diyi, ’dini jo ndu ’bazu ani oni Yini ruani edele ’diyisi. 18’Dini ’ba Sulemanini jo sipi ’diyi azini ’ba Hiramuni jo sipi ’diyi, azini ’ba Gebalia ’diyi, yi opa oni nde ’diyi ma rua, yi ede pati osiza ngonde oni be jo nderi sizu.

Currently Selected:

1 Opi 5: LB66

Highlight

Copy

Compare