1 Opi 17

Eliyani e’yo ozooni dizu kuri ecezuri

1 # Luk 1:17; 4:25; 2 Opi 3:14; Azi 10:8; Yak 5:17 Te Eliya ’ba Tisibini, ’ba ani’baru Gileadia ’diyi ma eselia, ’yo Ahabu tia kini, Ekile Yehova Mungu Israelini mani pa sozu drileniarini ovule indirile, andrali pi ozoo be ngani ovu eli ’doyisi ku, te kiri ma ka nga e’yo ’yo ma’i ka. 2E’yo Yehovani eca eri vu kini, 3Mi nga ’doasi, mi oja mi etuni efurialeru, mi zi mi yi raza Keriti Yoridani driliari ma tia. 4#Zab 37:3; Isa 33:15Eri nga eca ’dini, mi nga yi raza nderi mvu, azini ma fe azita koreke dri ’bo yi ma fe nyaka mi dri ’dale. 5’Dini eri mu ra, eri ’ye ekile yehovani ’yolerile; eri mu ovu yi raza Keriti Yoridani driliari ma tia. 6Te koreke cii eri dri enya zasi o’bitisi, azini enya zasi ondresi; eri mvu yi raza nderi. 7Eri eca ’dini vile were, yi raza nderi nga nzu ra, ozooni ’dile angu nderi ma alia kurisi.

Eliya pi awuziou Zarepatiari be

8E’yo Yehovani eca eri vu kini, 9#Oba 1:20; Luk 4:26Mi nga, mi mu Zarepati aku Sidoniaria, mi ovu ’dale. Mi ne, ma azi oku awuzioru ’daleri mi aza kozu nyakasi. 10#E’do 24:7; Zab 24:1; Isa 33:16; Yoh 4:7; Ebra 11:37’Dini eri nga, eri mu Zarepatia; erini ecaria aku nderi ma kalitilia, mi ne, awuzi ovu ’dale eja owuria; eri omve eri kini, Ma matu ’ba mi vu, mi eji ma dri yi were kerena alia mvuzaru. 11Te erini muria yi ejiria, eri omve eri kini, Ma matu ’ba mi vu, mi eji ma dri enya were mi dria indi fo. 12#E’do 18:6; 21:15, 16Eri omvi e’yo kini, Ekile Yehova Mungu minirini ovule indirile, ma ovuni enya olemi be gaa aluni ku, kiri anyafura were driega alua afazu aliari pi odu were otekua aliari be; mi ne, ma eja iri ’diyi omvu, ’dini ma mvi ani nyaka nderi a’di ma dri mva be, ama di nya ra, ama dra ndo, 13#E’do 22:1, 2; 1 Pet 1:7Eliya ’yo eri tia, Mi ru ku; mi mu ’ye mini ’yolerile; te di mi ede ma dri enya olemi were oko fo, mi eji ma dri, vutinia mi ’ye emi dri mi mvi be. 14#Zab 84:7-10, 19; 34:11; 1 Tim 4:8; Fil 4:19A’disiku Yehova Mungu Israelini ’yo ’dini, Anyafura ngani i de afazu aliasi ku, odu ngani i de otekua aliasi ku indi, ecazu kpere o’du Yehovani ozoo fezu nyakuarisi. 15#2 Sur 20:20; Mat 10:41, 42; 20:28; Ebra 11:8Eri mu ’ye ekile Eliyani ’yolerile; te eri’i, Eliya pie, ’ba eri vile joa ’diyi be, yi nya o’du kakau. 16#Azi 15:10; O’be 11:24Anyafura deni i afazu aliasi ku, azini odu deni i otekua aliasi ku indi, ekile e’yo Yehovani ’yole Eliya ma tisirile.

17E’yo ’diyi ma vutia eri eca ’dini, azo bi mva oku jo e’i nderi vileri; azo ’ye eri okporu oga i si, ’dini ava erini fu ra. 18#2 Sam 16:10; Luk 4:34; 5:8; Yoh 2:4Eri ’yo Eliya tia kini, E’yo amani mi be ngoni ya, mi ’ba Munguni la? Mi eca ma vu e’yo onzi mani ma e’yo egazu dika, azini mva mani fuzu’i ya? 19Eliya omvi eri tia, Mi fe ma dri mva mini. Eri e’du mva oku nderi ma agatiarisi, eri tu eri be jo uruleru erini lazuria, eri ela eri gbolo i ngulupiniri ma dria. 20#Efu 15:25; 17:4; Kal 11:11; 1 Sam 7:8; 1 Opi 18:36, 37; Fil 4:6; Yak 5:13, 16Eri wu Yehova vu kini, Yehova Mungu mani la, mi ji candi oku awuzio mani lazu eri vile joari ma dria, mvi erini fuzu ya? 21#2 Opi 4:34, 35; ’Yeta 20:10’Di ma vutia eri a’bu i mva dria paleko na, eri wu Yehova vu, kini, Yehova Mungu mani la, ma matu ’ba mi vu, mi fe orindi mvani ma emvi eri alia dika. 22#Zab 65:2; 66:19; O’be 15:8, 29; Mat 21:22; Luk 11:9, 10; 1 Yoh 3:22; 5:14; Azi 32:39; Luk 7:14; ’Yeta 20:10, 12; Ebra 11:35Te Yehova eri o’duko Eliyaniri ra; orindi mvani emvi eri alia dika, eri eca idriru dika ani. 23Te Eliya e’du mva nderi, esi eri be jo uruleruriasi va jo adari alia, fe eri andri dri; te Eliya ’yo kini, Mi ne, mi mvari idriru ’di. 24#Yoh 3:2; 16:30Oku nderi ’yo Eliya tia kini, Curu’do ma ni ada mi ovu ’ba Munguni, azini e’yo Yehovani ovuni mi tiliari eri e’vo adani.

Currently Selected:

1 Opi 17: LB66

Highlight

Copy

Compare