1 Opi 14

E’yo Ahiyani ondrile Yeroboamu ma ruaari

1Ewu nderisi azo bi Yeroboamu mvi Abiyani. 2#1 Opi 11:31Yeroboamu ’yo oku ini tia kini, Mi nga, ma matu ’ba mi vu, mi oja mi ’ba ndule ’ba kazu mi nizu mi oku Yeroboamuni ku, mi mu Siloa; mi ne, nabi Ahiyani ’dale, eri’i e’yo mani ’yopi ndra kini ma nga ovu ’ba ’doyi ma opiruri. 3#1 Sam 9:7Mi ji enya mudri ’diyi pi, enya olemiru ’diyi pie, anyuoso imvuari pie, mi mu eri vu; eri nga e’yo mvani ngazu cazu ngoni yari ’yo mi tia. 4#1 Opi 11:29Oku Yeroboamuni ’ye ’dini, eri nga, eri mu Siloa, eca Ahiya vile joa. Te Ahiya econi nezaru ku mile erinini asele erini ovule mbazaunirisi. 5#O’be 21:30Te Yehova ’yo Ahiya ma tia, Mi ne, oku Yeroboamuni eca mi zi mva erini ma e’yosi; a’disiku eri ovu azoru. Mi ma ’yo eri tia ’dini ’dini. Te e’yoni nga ovu ’dini, erini firiaria eri nga ’ye inzosi ekile oku andinile. 6Eri ovu ’dini, Ahiya ka ididi eri ma pani eri ra erini firia jotilia, eri kini, Mi fi, mi oku Yeroboamuni; mi ’ye inzosi ekile mi oku andinile a’di e’yosi ya? Te ma ovu e’yo ewaru be candiru ’yozu mi tia. 7#2 Sam 12:7; 1 Opi 16:2Mi mu ’yo Yeroboamu tia kini, Yehova Mungu Israelini ’yo ’dini: Mani mile’dule uru ’ba eseliasi, mi ’bale opiru ’ba mani Israeli ma driliarisi, 8#1 Opi 11:31; 15:5mani opi nyaza asile nzele suru ’Daudiniri ma driasi fezu mi dririsi; te ti mi ovuni ekile ati’bo mani Daudi azita mani ma ta mbapi, ma vuti bipi asi driasi, kiri e’yo ovupi onyiru ma miliari ’yepi rarile ku, 9#2 Sur 11:15; Neh 9:26; Zab 50:17; Eze 23:35te mi ’ye onzi aga ’ba dria mi drilia oko ’diyini ’yeleri ra, mi mu mini Mungu azini pi edezu wura edele aya akapi acisirisi ’diyi be, adra mani engazu, mi ’be ma mi ngukua; 10#1 Opi 15:29; 21:21; 2 Opi 9:8; Azi 32:36e’yo ’disi, mi ne, ma nga candi fe jo Yeroboamuni ma dria, ma nga agupianzi dria onze Yeroboamu vusi ra, ombele ati’baru ’diyi ’ba kari’baru Israelia ’diyi be iri tro, ma nga suru Yeroboamuni ini teke teke ra, ekile ’bani daka wele driarile. 11#1 Opi 21:24Suru Yeroboamuni odrapi akua ’diyi, oceyi nga nyani; odrapi nyamua amve ’diyi aria ’bua ’diyi nga nyani; a’disiku Yehova ’yo e’yo ’dirini. 12E’yo ’disi mi nga, mi mu mi vile joa. Te mi ka nga mi pa ’ba aku alia, mva nderi nga dra ra. 13#2 Sur 12:12; 19:3; File 1:6; 2 Pet 2:8, 9Te Israeli; dria yi nga eri owu, nga eri sa; a’disiku ’ba Yeroboamuni ma eselia eri a’dule nga eca ’biliani, a’disiku Yehova Mungu Israeliniri ma milia e’yo were onyiru ovu eri ma alia indi suru Yeroboamuni ma alia. 14#1 Opi 15:27Azini indi Yehovani nga opi pe i dri Israeli ma drilia ngapi suru Yeroboamuni inipi o’du nderisiri. Te e’yo ngoni ya? 15#Azi 29:28; 2 Opi 17:6; Zab 52:5; Amo 2:9; Zef 2:4; Mat 15:13; Yos 23:15; 2 Opi 15:29; Efu 34:13; Azi 12:3Engazu curu’do Yehovani nga Israeli co ekile omini yale yi aliarile, eri nga Israeli onze pi ola be angu onyiru erini ndra fele yi a’bipi dri ’doriasi, nga yi ere Yi Ara tia ’aa’dasi, yini Asera yini edele adra Yehovani engazurisi. 16#Isa 13:24; 1 Opi 12:30; 13:4; 15:30, 34; 16:2; Mik 6:16; Mat 18:7Eci nga Israeli ku ra, e’yo onzi Yeroboamuni, eri ngulupini ’yelerisi, azini erini fele Israelini ’yelerisi. 17#1 Opi 16:6; Ong 6:4Oku Yeroboamuni enga, mu, ca Tirizaa. Erini ecaria jotilia, mva nderi nga dra ra. 18Israeli dria sa eri, owu eri, ekile Yehovani ’yole ati’bo erini Ahiya ma msirile. 19#2 Sur 13:2’Yeta azini dria Yeroboamuni ’yele ’diyi, eri ’ba omba ngoni ngoni yari, azini eri nya opi ngoni ngoni yari, mi ne, yi si yi Buku opi Israelini ma e’yo sizuri ma alia. 20Te ewu Yeroboamuni opi nyazuri ovu eli kali iri drini iri; eri la a’bipi emi ’diyi be, azini mvi erini Nadabu nya opi eri ma pariani. Rehoboamuni opi nyazuri 21#Yob 32:9; Ekl 4:13; 1 Opi 11:36Sulemani mvi Rehoboamuni nya opi Yudani. Rehoboamuni e’dozu opi nyazurisi eli erini ovu kali su drini alu, eri nya opi eli mudri drini aziri Yerusalemua, aku nde Yehovani pele suru Israelini dria ma eselia ru ini ’bazu ’daleria, Andri erini ma ru Naama’i, eri Amoni ezoni. 22#2 Sur 12:1; Azi 32:21; Zab 78:58; Isa 62:2, 5; 1 Kor 10:22Te Yuda ’ye e’yo ovupi onzi Yehova ma miliari, yi fe ma’yara enga eri ma asia e’yo onzi yini ’yelerisi aga a’bipi yinini ’yeleri dria ra. 23#Azi 12:2; Eze 16:24; 2 Opi 17:9; Isa 57:5Yi si yi dri pari uruleru ’diyi pi, pati i’diza inzizaru pie, Asera pie, oni izuru ’diyi ma dria dria, azini pati ibiru ma etia dria; 24#E’do 19:5; Azi 23:17; 1 Opi 15:12; 22:46; 2 Opi 23:7agupi ali o’bapi agupi azinisi ’diyi ovu angu nderi ma alia indio Yi ’ye e’yo onzikanyaru dria Yehovani ngule onzi, suru erini drole anzi Israelini ma drilia ’diyini ’yelerile. 25#1 Opi 11:40Eri eca ’dini eli towi Rehoboamuni opi nyazurisi, Sisaki opi Misiriari eca a’di ’dizu Yerusalemu be; 26#1 Opi 7:51; 2 Sur 12:9; 1 Opi 10:17; 2 Sur 9:15, 16; O’be 23:5eri opa lonyi ovupi jo Yehovani ma alia ’diyi pi lonyi ovupi opi ma joa ’diyi be jizu; adaru eri wu afa ’diyi dria. Eri wu gombere Sulemanini edele melesi ’diyi dria indi. 27Opi Rehoboamu ede yi ma paria gombere molasi, eri fe yi ambo asikari opi vile jotile ma agei tepi ’diyi dri. 28Te eri ovu ’dini, etu dria opini muzu fizu Yehova ma joarisi, asikari nga yi osu, yi nga yi omvi jo yini angu agei tezuria ndo. 29’Yeta azini dria Rehoboamuni, e’yo erini ’yele ’diyi pie dria, yi sini yi buku opi Yudaa ’diyi ma e’yo sizuri ma alia ku ya? 30#1 Opi 12:24; 15:6Omba ovu ndra Rehoboamu pi ma eselia Yeroboamu be etuzu ’dani. 31Rehoboamu eri la a’bipi erini ’diyi be, yi sa eri aku Daudiniria a’bipi erini ’diyi be. Andri erini ma ru Naama’i, eri Amoni ezoni. Mvi erini Abiyamu nya opi eri ma pariani.

Currently Selected:

1 Opi 14: LB66

Highlight

Copy

Compare