1 Opi 10
10
Opi okuru Sebaarini emuzu Sulemanini ndrezuri
1 #
2 Sur 9:1; Zab 72:10, 15; Isa 60:6; Yer 6:20; Mat 12:42; Luk 11:31; Lip 14:12; O’be 1:6 Te opi okuru Sebaari ka e’yo kuza Sulemanini ru Yehovanisiri eri ra, eri emu eri o’bizu zita ewarusi. 2Eri eca Yerusalemua ’ba kakau be, yi eji afa eri ma vutisi, ngamia afa aji be arikariru ejipi ’diyi be, mele kakau pie, oni ajeambosi ’diyi pie; te eri ka eca Sulemani vu eri nze eri tia e’yo ovupi eri ma asiari dria. 3#O’be 1:5; Isa 50:4Te Sulemani ece e’yo erini zile ’diyi dria; e’yo aluni opini ndepi ra, erini ecole ecele eri dri kuri yo. 4Te opi okuru Sebaari ka ondua Sulemanini pi ne jo erinisileri pie, 5#1 Sur 26:16nyaka mesa erini ma driari pie, riza ’ba erinini pie, azi agei teza ’ba azi ngapi eri dri ’diyini pie, bongo yini pie, ati’ba okelea erini fepi mesaa ’diyi pie, geri erini tuzu fizu jo Yehovani ma aliari pie dria, ava erini oti ra. 6Te eri ’yo opi tia, E’yo mani erile angu ma ngulupini ma alia, ’yeta mini pisi ondua mini beri, yi ovu e’yo kuza adaruri. 7Te ti, ma a’ini ndra e’yo nderi ku, de nga ma emuni nezu ma milesi ku; te mi ne, yi eceni ma dri e’yo nde ma aliniri nga ku; te ondua mini pi lonyi mini be yi aga e’yo kuza mani erile ndrari ra. 8#O’be 8:34Ayiko ’ba mini ’diyi dri! Ayiko ati’ba mini pa sopi mi drilia ’dani ondua mini eripi ’diyi dri! 9#1 Opi 5:7; Azi 7:8; 2 Sur 2:11; Dan 2:21; 2 Sam 8:15; Zab 72:2; O’be 8:15Inzita ma ovu Yehova Mungu mini vu, mi avani eri valerisi erini mi ’bazu oguna opini Israeliniri ma driarisi! Yehovani Israelini lele ’dani ’danirisi, eri ’ba mi opiru, e’yo lizu kililiru, e’yo onyiru ’yezu. 10Te eri fe opi dri mele onziru turu alu drini kali iri, azini afa arikariru tu ’diyi pie kakau, oni ajeambosi ’diyi pie; afa arikariru ongulumuru tro tro opi okuru Sebaarini fele opi Sulemani dri ’diyile ecani dika aluni ku. 11#1 Opi 9:27; Yob 22:24; 2 Sur 9:10Te indi vini oguru ongulumuru Hiramuni mele ejipi engazu Ofiriasiri, yi eji pati sandalini kakau tu Ofiriasi oni aje ambosi ’diyi be. 12#2 Sur 9:11Te opi ede pati sandali ’diyi jo Yehovani ma agoferu, opi vile jo ma agoferu indi, ede vini eri o’diru azini o’di zaburi ngozuriru ’ba ongo ngopi ’diyi dri; pati sandalini ’diyile ecani dika ku, ’ba neni nga vini ’dinile ku ecazu kpere andru. 13Te opi Sulemani fe opi okuru Sebaari dri afa dria erini lele ’diyi, afa dria erini a’ile ’diyi, afa Sulemanini fele lonyi opini ma eseliasi ’diyi ma dria. ’Dini eri oja i, mvi i vile angua, erii ati’ba ini be.
Lonyi Sulemanini ru kuzani beri
14Te mele ecapi Sulemani vu eli alusiri ma nziza ovu mele onzi turu azia kali azia drini azia, 15#2 Sur 9:24; Zab 72:10; Isa 21:13; Gal 4:25azini drinia orodri azini ’ba afa ozipi ’diyi pini ejileri, ’ba afa jepi ’diyi pie, opi dria ’ba yi osapi suru azini ma eselia ’diyini pie, ’ba ’ba dri cepi angu ndea diyi pie dria. 16Opi Sulemani ede gombere amboru turu iri mele dile dirisi; mele ovupi gombere alu alu ma aliari ovu sekeli turu azia. 17#1 Opi 14:26; 7:2Azini eri ede gombere turu na mele dile dirisi; mele ovupi gombere ’diyi alu alu ma aliari ma o’bizani nziza na; te opi o’ba yi jo oce Lebanoniarini ma alia. 18#2 Sur 9:17; Ebra 1:3, 8; Eceza 20:11Azini opi ede vini oguna amboru ewasisi indi, eri a’bu ruani mele alatararu agapirisi. 19Pari otiza mileko azia tuzu uru ovu eri drilia, drini ngukuari ovu nguluru, dri opirikala ovu kala ’doria ’daria indi, wura kami irini yi so pa dri opirikala nde ’diyi ma kalaa. 20Te wura kamini mudri drini iri ovu pari otiza alu alu mileko aziari ma dria kala ’dasi kala ’disi. Oguna ’dileni suruti opi nyaza azinia aluni ku. 21Okelea dria Sulemanini ovu meleni, azini vini imvu dria ovupi jo oce Lebanoniarini ma alia ’diyi yi ovu mele alatararuni; aluni ovuni dahaburu ku, a’disiku ewu Sulemaninisi eri ovu ’ba ma milia afa tokole. 22#E’do 10:4; 1 Opi 22:48; 2 Sur 20:36; Zab 48:7; Isa 2:16Opi ovu oguru ongulumuru Tarisisini be acizu yi mirini dria, tualu oguru ongulumuru Hiramuni be. Pale alu eli vusi, oguru ongulumuru Tarisisini nde ’diyi adri eca, mele ejizu, dahabu pie, ewasi pie, emgbeleke pie, aria sobi be taya ndrizaru ’diyi pie. 23’Dini opi Sulemani aga opi nyakua ’diyi dria lenyisi azini onduasi ra. 24Te wudrikuru dria nda ovuzu Sulemani ma milia, ondua erini erizu, ondua Munguni ’bale eri ma asiari. 25#2 Sam 8:2, 10; Yob 42:11; Zab 68:29; Mat 2:11Yi dria alu alu eji feta yini, imvu dahaburu piyi imvu meleru be, bongo pie, afa suza ombani pie, afa aji be arikariru pie, akanya pie, akanya farasiru pie, eli vusi eli vusi yi eji afa yini ma kalafe ’dipi.
Sulemanini akanya pi ejizu ojezu gari ombani ’diyi be orodri isuzuri
26 #
Azi 17:16; 1 Opi 4:26; 2 Sur 1:14; 9:25 Te Sulemani oku ndra gari ombani piyi asikari nzupi akanya dria ’diyi be; gari erini ombani ’diyi ovu ndra alifu alu drini turu su, asikari nzupi akanya dria ’diyi ovu alifu mudri drini iri, erini o’bale aku gari ombani ’diyia azini Yerusalemua indi opi vu ’diyi. 27#2 Sur 1:15Opi fe dahabuni ecazu Yerusalemua onile, pati marioni kakau ekile pati elioru zopi angu ’dalaria ’diyile. 28#Eze 27:7Akanya Sulemanini yi akanya engapi Misiriasi ’diyi; ’ba afa opini jepi ’diyi a’i yi nguluru nguluru, yi ofe yi ngulu vusi ngulu vusi. 29#Yos 1:4; 2 Opi 7:6Aje gari ombani omvezu engazu Misiriasiri ovu sekeli dahaburu turu azia, aje akanyani turu alu kali towi; ’dini yi eji yi opi Hitini ’diyi dri dria, azini opi Suriani ’diyi dri ’ba nde ’diyisi.
Currently Selected:
1 Opi 10: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
