1 Opi 1

Abisagini azi ngazu Daudi driri

1Te opi Daudi ovu ’ba dezani eli be kakau; yi ka bongo su ruania ti, ruani drini ani ku. 2#1 Sam 16:21E’yo ’disi ati’ba erini ’yo eri tia, Eco onyiru ma nda zamva opi mani amboruri dri, eri ma so pa opi drilia eri agei tezu; eri ma la mi agatia, ’dini opi mani amboruri ma rua ma dri ani. 3#Yos 19:18’Dini yi nda zamva ndrizaru angu dria ma alia cazu kpere lokiri Israelinia, te yi isu Abisagi ’ba Sunamuni yi eji eri opi vu. 4#E’do 4:1; Mat 1:25Zamva nderi ovu ndrizaru tu; eri te opi ma agei, te opi lani erisi ku.

Adoniyani opi nyaza pazu okposiri

5 # 2 Sam 3:4; 1 Sur 3:2; Azi 17:16; 2 Sam 15:1; Zab 20:7 Te Adoniya Hagiti mvi ’ba i ngulupi uru, ’yozu, Ma nga ovu opiru ma’i; eri ede i ngulupi dri gari pi asikari akanya dria ’diyi pie, ’ba kali towi nzupi eri drilia ’diyi pie. 6#1 Sam 3:13; O’be 23:13; 29:15; 2 Sam 3:3, 4; 1 Sur 3:2De ata erini egani ndra eri ma dria aluni ku, ’yozu kini, Mi ’dini a’di e’yo ’ye ya? Eri ’ba ndrizani tu; osi eri Abisalomu ma vutia. 7#2 Sam 20:25; 1 Opi 2:22Eri eci ti Yoabu Zeruiya mvi be, azini kuhani Abiatari be; te yi bi Adoniya ma vuti eri aza kozu ani. 8#1 Opi 4:18; 2 Sam 23:8Te kuhani Zadoki pi, Benaya Yehoyada mvi pie, nabi Natani pie, Simei pie, Rei pie, ’ba okporu Daudi vile ’diyi pie, yi fini Adoniya piyiru ku. 9Te Adoniya nga kabilo ofu, ti ’pie, anyapa osoru ’diyi pie, oni Zoheletini ovupi Eni-rogeli ageiaria; omve i adripi dria, opianzi pie, ’ba Yudaa ovupi opi vile ati’baru ’diyi be dria, 10te awuni nabi Natanini omve ku, Benaya pie, ’ba okporu ’diyi pie, adri Sulemani pie.

11 # 2 Sam 3:4 Te Natani ’yo Bati-seba Sulemani andri tia, Mi erini nga e’yo Adoniya Hagiti mvini opi nyazu opi lamani Daudini nikokoruri ku ya? 12#O’be 11:14; 12:15Awa’dini kirikiri mi emu, mi ku ma mi dri ondua fe, ’dini mi eco mi ngulupi ma idri pazaru, Sulemani mi mvi ma idri be indi. 13#1 Sur 22:9; 29:23; Yer 33:21Mi mu di, mi fi opi Daudi vu, mi ’yo tinia, Opi mani amboruri la! Mi soni ndra oyo ati’bo okuru mini tia kini, Sulemani mi mvini nga opi nya ma vutiani, eri nga ri oguna opiniri ma driani ku ya? Ka’dini Adoniyani opi nyani a’disi ya? 14Mi ne, mini e’yo ’diyi ’yoria opi be ’dini, ma nga fi mi ma vutisi alu indi, ma nga fe e’yo mini ’yole ’diyi ma so pa kilili. 15Bati-seba nga di fi jo aliza ma alia opi vu (te opi nde de de suru suru ’bo, azini Abisagi ’ba Sunamuari ovu eri agei teria), 16Batiseba nga avu va opini inzizu. Opi ’yo tinia, Mi le a’dini ya? 17#E’do 18:12; Efe 5:33; 1 Pet 3:6Eri omvi eri tia, Opi mani, mi soni ndra oyo ati’bo okuru mini tia kini, Sulemani mi mvini nga opi nya ma vutiani, eri nga ri oguna opiniri ma driani, ku ya? 18Te mi ne, curu’do Adoniyani opi nyani; te mi’i, opi mani amboruri, mi nini e’yo nderi ku. 19Eri ofu ti, anyapa osoru ’diyi pie, kabilo kakau ’diyi pie ’bo, omve vini opianzi dria, kuhani Abiatari pie, Yoabu ’ba asikari ongulumuru dri cepiri pie ’bo; te eri omveni Sulemani ati’bo miniri ku. 20Te mi’i, opi mani amboruri la, Israeli dria yi mile ’ba mi vu, ’dini mi ma ece yi dri ’ba ngapi ripi opi mani amboruri ma oguna ma dria eri vutiari. 21#Azi 31:16; Isa 57:2; 1 Opi 2:10Ka, ’dini yo, eri nga eca ’dini, opi mani amboruri ka nga o’du ko tualu a’bi erini be ’bo, yi nga ama omve mva mani Sulemani be ’ba onziru.

22Te mi ne, erini nga e’yo ’yoria opi be, nabi Natani eli ra, 23Yi ’yo opi tia kini, Mi ne, nabi Natani eca ’di. Ka eli opi drilia ’bo, eri avu va opi drilia, su dri va nyakua. 24Te Natani ’yo ra, Opi mani amboruri la, mi ’yo mi’i, Adoniyani nga fu opiru ma vutia, eri nga ri oguna opini maniri ma driani, ya? 25#1 Sam 10:24; 2 Sam 16:16; 2 Opi 11:12; 2 Sur 23:11A’disiku andru eri si va, eri ofu ti, anyapa osoru ’diyi pie, kabilo kakau ’diyi pie ’bo, eri omve opianzi dria, Yoabu ’ba asikari ongulumuru dri cepiri pie, kuhani Abiatari pie; te mi ne, yi ovu nyaria azini mvuria eri drilia, ’yozu, Opi Adoniya ma rua ma adri ala ’dani. 26Te ma’i ati’bo mini, kuhani Zadoki pie, Benaya Yehoyada mvi pie, Sulemani ati’bo mini pie, eri omveni ama ku. 27E’yo ’diri opi mani amboruri ’yeni ya, de mi awuni ece ati’ba mini dri ’ba ngapi ripi opi mani amboruri ma oguna ma dria eri ma vutiari ku ya?

Sulemanini ’bazu opiruri

28Te opi Daudi omvi e’yo ra, Mi omve mani Bati-sebani. ’Dini eri eli opi ma milia, pa sozu opi ma drilia. 29#Lip 8:19; 1 Sam 14:39; 25:34; 2 Sam 4:9; 12:5; 1 Opi 17:1; 2 Opi 4:30; E’do 48:16; 2 Sam 4:9; Zab 19:14; 31:5, 7; Imv 3:58Te opi so oyo kini, Ekile Yeho-vani ovule idrirurile, eri’i ma orindi onzepi candi dria ma aliasiri, 30adaru ekile mani oyo sole ndra mi tia ru Yehova Mungu Israelirurisirile, ’yozu, Sulemani mi mvi nga opi nya ma vutiani ada, eri nga ri oguna maniri ma dria ma pariani; adaru ma nga ’ye ’dini andru. 31#Neh 2:3; Dan 2:4; 6:21Bati-seba nga di avu va, su drini va nyakua opini inzizu, ’yozu, Opi mani amboru Daudi ma rua ma adri ala ’dani ’dani!

32Te opi Daudi ’yo ra, Mi omve mani kuhani Zadoki pi, nabi Natani pie, Benaya Yehoyada mvi pie. Te yi eca opi drilia. 33#2 Sam 20:6; Esi 6:8; 2 Sur 32:30Te opi ’yo yi tia, Emi ji ati’ba opi emi vilerini ’diyi emi be tualu, emi fe ma mvi Sulemani ma tu akanya ma ngulupi vileri ma dria, emi ji eri va Gihonia; 34#1 Sam 10:1; 16:3, 12; 2 Sam 2:4; 5:3; 1 Opi 19:16; 2 Opi 9:3; 11:12; 2 Sam 15:10; Mar 11:9, 10te kuhani Zadoki pi nabi Natani be, ma osu odu eri dria ’dale eri ’bazu opiru Israeli ma drilia; emi nga di guka vu, ’yozu kini, Opi Sulemani ma rua ma ovu ala ’dani! 35’Di ma vutia, emi ma etu eri ma vutia, eri nga emu ri oguna mani ma dria; a’disiku eri nga ovu opiru ma pariani; ma pe eri opiru Israeli pi nyazu Yuda be. 36#Azi 27:15-26; Yer 11:5; Mat 6:13Te Benaya Yehoyada mvi omvi e’yo opi tia, Awa’dini! Yehova, Mungu opi mani amboruriniri ma ’yo ’dini indi. 37#Azi 2:7; Yos 1:5, 17; 1 Sam 20:13; 1 Opi 8:57; 2 Opi 2:9; 1 Sur 28:20Ekile Yehovani ovule ndra opi mani amboruri berile, eri ma ovu Sulemani be trotro indi, ma ’ba oguna eriniri amboru aga opi mani amboru Daudiniri ma oguna ra.

38 # 2 Sam 8:18; 23:20-23 ’Dini kuhani Zadoki, nabi Natani pie, Benaya Yehoyada mvi pie, ’ba Keretia, ’diyi pie, ’ba Peletia ’diyi pie, nga di si va, yi fe Sulemani ma ri akanya opi Daudi vileri ma dria, yi ji eri kpere Gihonia. 39#Efu 30:23-32; Zab 89:20; 1 Sam 10:1; 16:1; 1 Sur 29:22; 1 Sam 10:24Te kuhani Zadoki ’du ti o’yu odu be Hema aliasi, osu eri Sulemani dria. Yi vu guka ra; te ’ba dria yi ’yo ra, Opi Sulemani ma rua ma adri ala ’dani! 40’Ba dria nga tu eri ma vutisi, yi vu ejeleko, yi otre ayikosi tu, ’dini nyaku osi i otreta yinisi ani. 41Te Adoniya pi omu dria ovupi eri be ’diyi be, yi eri otrena nderi yini nyaka nyazu dezu ’boria. Te Yoabu ka o’duko gukani eri, eri nga ’yo ra, O’yona efupi aku amboa ’diniri ma efini ngoni ya? 42#2 Sam 18:27De erini nga e’yo ’diri ’yoria, mi ne, Yonatani kuhani Abiatari ma mvi eca; te Adoniya ’yo ra, Mi efi, a’disiku mi ’ba onyiruni, e’yo kuza onyiru ejipiri. 43Te Yonatani omvi e’yo Adoniya tia kini, Opi amani Daudi ’ba Sulemani opiru ’bo ada; 44opi pe kuhani Zadoki pi ma ti eri be, nabi Natani pie, Benaya Yehoyada mvi pie, ’ba Keretia ’diyi pie, ’ba Peletia ’diyi pie; azini yi ’ba eri muzu akanya opi vileri ma dria; 45te kuhani Zadoki pi nabi Natani be, yi osu odu eri dria Gihonia eri ’bazu opiru ’bo; engazu ’dale yi tu uru ayikosi, ’dini aku amboru nderi ga tre o’yonasi. ’Diri o’duko emini erileri’i. 46#1 Sur 29:23Sulemani ri di oguna opi nyazuri ma dria ’bo. 47#E’do 47:31Indi vini ati’ba opi vile ’diyi eca opi amani amboruri Daudini inzizu, ’yozu, Onyiru Mungu mini ma ’ba ru Sulemanini ma ku aga ru miniri ra, oguna eriniri ma ovu amboru aga oguna miniri ra. Te opi eri avu va pari erini lazuri ma dria. 48#1 Opi 3:6; Zab 132:11, 12Opi ’yo ’dini indi, Yehova Mungu Israeliniri ma ovu inzizaru, erini ’ba alu fele rizu oguna mani ma dria andru, mani ndrele ma milesirisi. 49Omu dria Adoniya vile ’diyi ma rua nga di ya ya, yi enga uru, ere yi dria dria muzu geri yinia ra. 50#1 Opi 2:28; Efu 21:14; 38:2Te Adoniya ovu urisi Sulemani ma e’yosi; te eri enga ra, mu pari edeta edezuri ma o’yu bi ci. 51Te ’ba yi ’yo Sulemani tia, Mi ne, Adoniya ovu urisi opi Sulemani ma e’yosi; te mi ne, eri bi pari edeta edezuri ma o’yu ra, ’yozu kini, Opi Sulemani ma so oyo ma tia oko raka, kini eri ngani ati’bo iniri li seisi ku. 52#1 Sam 14:45; 2 Sam 14:11; ’Yeta 27:34; Azi 1:17Sulemani ’yo ra, Eri ka i e’da ’ba baru, dribi erini aluni ngani e’de nyakua ku; te yi ka e’yo onzi isu eri alia, eri nga dra ra. 53’Dini opi Sulemani eri pe ’ba ti, yi osi eri va pari edeta edezuriasi. Eri emu, eri avu va opi Sulemanini inzizu; te Sulemani ’yo eri tia, Mi mu jo minia.

Currently Selected:

1 Opi 1: LB66

Highlight

Copy

Compare