1 'Ba Korintoa 'Diyi 15
15
E’yo ’ba draza ’diyini engazuri
1Te ma adripi, ma fe emi ma ni e’yo baru mani ndra olule emi tia, emini ndra a’ile, emini pa sozu eri alia, 2emini ovuzu pazaru erisiri’i, emi ka e’yo ’yoza mani olule emi tiari bi kirikiri-emi ka ndra awi eri a’i oye kurisi. 3#Isa 53:5-12Te ma idri emi dri okorisi e’yo fele ma driri, kini Kristo dra azi onzi amanisi, ekile e’yo sizani ’yolerile, 4#Zab 16:8-10; Mat 12:40; ’Yeta 2:24-32; 2 Opi 20:5; Isa 54:7; Hos 6:2; Yoh 1:17sa eri ra, eri enga o’du nasi ra ekile e’yo sizani ’yolerile, 5#Mat 28:16-17; Mar 16:14; Luk 24:34, 36; Yoh 20:19eri e’da i Kefa vu, vilerisi ’ba mudri drini iri ’diyi vu indi. 6Vu tinia e’da i vini adripi vu tualu pari alua, yi ma kalafe aga turu towi ra, te yi ma eselia ’ba kakau ovu indi troa curu’do, te yi ma azi ’diyi, o’du o’be yi ’bo. 7#Luk 24:50Vutinia e’da i vini Yakobo vu, vutinia ’ba ti opele ’diyi vu dria. 8#’Yeta 9:3-6; 1 Kor 9:1’Ba dria ma vutia eri e’da i ma vu indi, ekile mva osipi mba alipi agaarile. 9#’Yeta 8:3; Efe 3:8; Mat 5:19; 1 Tim 1:15Te ma ovu ’ba werearu tu ’ba ti opele ’diyi ma eseliari’i, ma funi dri ’bani ma omvezu ’ba ti peleriru ku, mani kanisa Munguni inzalerisi. 10#2 Kor 11:5, 23; 6:1Te ’yeta anzutiri Mungunisi ma ovu ekile mani ovulerile, te ’yeta anzutiri erini ovupi fezaru ma driri ovuni tokoru ku. Te ma nga azi okposi aga yi dria ra, te ma’i yo, te ’yeta anzutiri Munguni ovupi ma beri nga azi nderini. 11’Dini kani ma’i, kani yi’i yani, ama olu ’dinile ra, emi a’i ’dinile indi.
12Te e’yo oluza ka ’yo kini Kristo enga ’ba draza eselia ’bo, ’ba azini emi eselia ’diyi ’yo kini, Engata ’ba draza ma eseliari yo, ’dini ngoni ngoni ya? 13Te engata ’ba draza eseliari ka ovu yo, Kristo engani de ndra vini ku indi; 14te Kristo ka enga ku, oluta amani ovu di toko, a’ita; emini ovu vini toko indi. 15#’Yeta 1:22; 5:32Azini vini isu ama ovu ’ba e’yo Munguni ma eti nzepi inzoru ’diyi, amani e’yo eti nzele Mungusi kini eri enga Kristoni ’bo, ’dinirisi, te de engani eri ku, ka ovu adaru kini ’ba draza engani ku. 16#1 Kor 6:14A’disiku ’ba draza ka enga ku, Kristo engani de ndra ku lindi. 17Te Kristo ka ndra enga ku, a’ita emini ovu toko, emi ovu nga azionzi emini ma alia ’dani. 18Azini vini ’ba o’duni o’bele Kristo ma alia ’diyi la dri ’bo indi. 19Ama ka ovu asi teza be Kristo ma alia kiri ewu amani ovuzu idriru ’dorisi a’dule, e’yo amani ovu candiru tu aga ’ba azini ’diyi dria ra.
20 #
Kol 1:18; 1 Kor 11:30 Te curu’do Kristo enga ’ba draza eselia ’bo, eri anyadri kapi oko ’ba o’du kopi ’diyi ma eseliari’i. 21#E’do 3:17-19; Rum 5:12, 18Te drani ecale ndra ’basirisi,engata ’ba draza eseliari eca ’basi indi. 22A’disiku ekile Adamu ma alia ’ba driani odralerile, ’dinile indi Kristo ma alia ’ba dria nga ovu ’bazaru idriru. 23#1 Tes 4:16; Eceza 20:5Te ’ba dria alu alu yi paria ’yeke: anyadri kapi okori Kristo’i, vilerisi ’ba Kristoni ’diyi erini emviria. 24#Dan 2:44Vutinia asizani, erini ngazu suru nyaza fezu Mungu Ata dri, erini opi nyaza dria pi ojazu tokoru dri ceza opini dria pie, okpo be dria ’boria, 25#Zab 110:1; Mat 22:44Te eri ma ovu opiru ’dani, de nga eri ’bani juru ini dria i ma pa agelea ku. 26#Eceza 20:14; 21:4Juru erini ngale ojale tokoru vile asizuri eri drani. 27#Zab 8:6A’disiku kini, ’Ba afa dria eri pa agelea, eri ma e’yo erizu. Te eri ka ’yo ra, ’Ba afa dria e’yo erini erizu ’bo, mi nga ni ra eri kilili kini ’ba afa dria ’bapi e’yo erini erizuri ace lu ’bakokoruni. 28Te afa dria ka nga ovu ’bazaru e’yo erini erizu ’bo, o’du ’dasi Mvini nga ’ba afa dria ’bapi e’yo erini erizuri ma e’yo eri indi, ’dini Mungu ma ovu dria, afa dria ma alia.
29Ka ’dini ku, ’ba baputizi bipi ’ba draza ma e’yosi ’diyi nga a’di ’ye ya? ’Ba draza ka enga aluni ku, yi di baputizi bi yi ma e’yosi a’disi ya? 30#Rum 8:36Ama vini ama fe dra dri eru vusi dria a’disi ya? 31#2 Kor 4:10, 11Ma dra zuzu ada; ma ’yo ’dini, ma adripi, oyo sozu asi afu mani ma enyazu e’yo eminisi Kristo Yesu Opi amani ma aliarisi! 32#Isa 22:13Ma ka ndra omba ’ba Efesoa nguru be, ’bani adrile ’yolerile, ma nga a’di orodri isu ya? ’Ba draza ka enga ku, ama ma nya, ama ma mvu, a’disiku ama odra dru. 33’Ba ma ici emi ku: Ti ecizu ’ba onzi beri adriza onyiruri eza eza. 34#Rum 13:11; Efe 5:14; 1 Kor 6:5; ’Yeta 26:8Emi enga, onyi ma fu kani emini, emi ma ’ye e’yo onzi dika ku. A’disiku ’ba azini nini nga Mungu ku. Ma ’yo e’yo ’diri drinza fezu emi dri.
35Te ’ba azini nga ’yo ra kini, ’Ba draza enga ngoni ngoni ya? Azini, Yi emu rua ngonile be ya? 36#Yoh 12:24Mi ’ba ondua kokoruni! Afa mini sale mi’iri engani idriru ku, ka dra kuria, 37Te afa mini saleri, mi sani ruani ngapi ovupiri’i ku, te oriefi a’dule, kani ondu, kani ori ma suruti aziniri. 38#E’do 1:11Te Munguni rua fe eri dri ini lelerile, te ori dria alu alu dri eri rua yi vileri fe’i. 39Za dria ovuni trotro ku, te ’ba ma za ndu, anyapa za ndu, aria za ndu, e’bi za vini ndu. 40Rua ’bua ’diyi yi indi, azini rua nyakua ’diyi vini indi; te afa ’bua ’diyi ma diza eri ndu, afa nyakua ’diyi ma diza eri ndu indi. 41Diza etuni eri ndu, diza mbaniri ndu, diza ’bi’bioniri vini ndu indi; te ’bi’bio alu ma diza ovu ndu ’bi’bio aziniri ma diza be.
42Engaza ’ba draza ma eseliari eri ’dini indi. Sa eri mazaru, enga eri makokoru. 43#Fil 3:20, 21Sa eri inzikokoru, enga eri diza be. Sa eri okpo kokoru, enga eri okpo be. 44Sa eri rua ’baniru, enga eri rua orindiniru. Rua ’bani ka ovu indi, rua orindiniri alu vini indi. 45#E’do 2:7; Yoh 6:63; 2 Kor 3:6, 17Te eri ovu ndra sizaru ’dini kini, Agu oko Adamururi ofu ori idri beriru; te Adamu vileri eri orindi idri fepiri’i. 46Te afa orindiruri ovuni okori’i ku, te afa ’baniri’i; afa orindiruri nga efu vilerisi ndo. 47#E’do 2:7’Ba okori ibi enga nyakua, eri irifurani; ’ba iriri ibi enga ’bua. 48’Ba irifurani ’diyi ovu ekile ’ba irifuranirini ndra ovulerile; ’ba ’bua ’diyi ovu ekile ’ba ’buarini ovulerile, 49#E’do 5:3Ekile amani ’ba irifuraniri ma wura ejilerile, ’dinile ama nga ’ba ’buari ma wura eji indi. 50#1 Kor 6:13Te ma ’yo ’dini, ma adripi, kini, rua ari beri econi suru Munguni nyazaru i ma afaru ku, te afa mapi mari econi vini afa mapi kuri nyazaru i ma afaru ku indi. 51#1 Tes 4:15-17Mi ndre! Ma emi dri e’yo zizaruri ece ’di. Ama dria ngani o’du ko ku, te yi nga ama dria ma wura oja nduru, 52#Mat 24:31; 1 Tes 4:16coti mbelekocici, ’bani yi mile colerile, guka asizuri ka nga wu raria. Te gukani nga wu ra, ’ba draza yi nga enga makokoru, azini yi nga ama wura oja nduru. 53#2 Kor 5:4Rua ecopi mapi ra ’diri ma su rua ecopi mapi kuri, azini rua ecopi drapi ra ’diri ma su rua ecopi drapi dika kuri. 54#Isa 25:8Te rua ecopi mapi ra ’diri ka nga rua ecopi mapi dika kuri su ’bo, azini rua ecopi drapi ra ’diri ka nga rua ecopi drapi dika kuri su ’bo, ’dini e’yo yini sile ’bori nga eca i paria ’yeke, kini:
Ki dratani e’yo agaza ma alia ’bo.
55 #
Hos 13:14; Isa 25:8 Dra la, e’yo agaza miniri ngoa ya? Dra la, iri mini ’ba duzuri ngoa ya?
56 #
Rum 7:13; 6:14 Iri drani ’ba duzuri eri e’yo onzini, azini okpo e’yo onzini eri azitani, 57Te awa’difo Mungu vu, erini e’yo agaza fele ama dri Opi amani Yesu Kristosirisi. 58#2 Sur 15:7; Eceza 14:13E’yo ’disi, adripi mani lele ’diyi, emi so pa kirikiri, yakokoru, ovuzu azi Opini be tre o’du dria, emini nile kini emi ecandini emi oye Opi ma alia kurisi.
Currently Selected:
1 'Ba Korintoa 'Diyi 15: LB66
Highlight
Copy
Compare
Share
Want to have your highlights saved across all your devices? Sign up or sign in
Bible in Lugbara © United Bible Societies, 1966.
