1 'Ba Korintoa 'Diyi 14

E’yo ’yozu ti ndu ndusiri

1 # 1 Kor 12:10, 31 Emi bi leta avasiri ma voti, te emi ma le ovuzu afa feza Orindini ’diyi be avasi indi, te tuni ani emini e’yo nabiru oluzuri’i. 2Te ’ba e’yo ’yopi ti ndusiri eri e’yo ’yo ’ba ma tia ku, te Mungu tia; te ’ba aluni erini ku, te eri e’yo zizaru ’diyi ’yo Orindisi. 3Te ’ba e’yo nabiru olupiri eri e’yo ’ba ezozuri pi olu ’ba ma tia, asi omiza pie, e’yo ’ba asi aza kozuri be. 4’Ba e’yo ’yopi ti ndusiri eri i ma ngulupi ma aza ko, te ’ba e’yo olupiri eri kanisa ma aza ko’i. 5#Kal 11:29Te ma le emi driani e’yo ’yozu ti ndu ndusi ra ’bo, te agapiri ma le emi ma olu e’yo’i. Te ’ba e’yo olupiri eri aga ’ba e’yo ’yopi ti ndu ndusiri ra, pe lu eri ka ti oja ka, kanisa ma nga e’yo ’ba ezozuri isu ani beni.

6Te di, ma adripi, ma ka mu emi vu e’yo ’yozu ti ndu ndusi, ma nga emi aza ko ngoni, ma ka e’yo ’yo emi tia e’yo ovupi ecezarurisi, kani nitasi, kani e’yo oluza nabirurisi, kani imbatasi ku ya? 7Te afa idri kokoru awu wupi ’diyi ma e’yo trotro, kani ejelekoni, kani o’dini, yi kal awu yini ma o’duko awa ku, ’bani nga e’yo yini vuleri kani coleri ni ngoni ngoni ya? 8’Ba ka guka vu wuta saaru saarisi, a’dini nga i ede muzu ombaani ya 9’Dinile emi indi, emini e’yo ’yoria ti ndusi, emi ka e’yo ’bani vale rari ’yo ku, yi fi e’yo nde ’yoleri ni ngoni ngoni? Te emi nga ovu e’yo ’yozu olia a’dule, 10O’duko wudrikurua ’diyi ma suruti ka ovu kakau ti, te aluni ovuni efi kokoru ku; 11te ma ka o’duko Inderi ma efi ni ku, ma nga ovu lururu ’ba e’yo ’yopiri ma milia, ’ba e’yo ’yopiri nga vini ovu jururu ma milia indi. 12’Dinile indi, emini leria ovuria afa feza Orindini ’diyi be avasi, emi ma ndru ovuzu afa feza kanisa ezozu ’diyi be tre,

13E’yo ’disi ’ba e’yo ’yopi ti ndu ndusiri ma zi Mungu tia i ma ni e’yoni ojazu ani. 14A’disiku ma ka e’yo zi Mungu tia ti ndusi, orindi mani zi Mungu tia ra ’bo, te asisile mani ’yani efi ku. 15#Efe 5:19Te bani ngoni i ya? Ma nga Mungu zi orindisi ra, te ma nga Mungu zi asisilesi indi; ma nga ongo ngo orindisi ra, te ma nga ngo asisilesi indi. 16Te mi ka inzi orindisi, ’ba ripi ’ba imbale kuri ma pariari nga Amena ’yo ziza mini awa’difo fezuri ma vutia ngoni ngoni ya? te de nini e’yo mini ’yoleri ku. 17Te mi mini Mungu zi awa’difo fezu ’yeke ’bo, te ezoni agu nderi ku. 18Ma awa’difo ’yo Mungu vu, mani e’yo ’yole ti ndu ndusi aga emi dria rarisi; 19te ti, mani e’yo alu alu ’yozu kiri towi a’dule kanisa alia asisile mani be, mani ’ba azini imbazu indiri,ovu onyiru tu ma milia aga mani e’yo alifu mudri ’yozu ti ndusiri ra.

20 # Efe 4:14; Fil 3:12, 15 Ma adripi, emi ma ovu anziru asisile emini ma alia ku; te e’yo asi onzinisi emi ma ovu odekuale, te asisile emini ma alia emi ma ovu agupiru. 21#Isa 28:11-12; Azi 28:49Azita ma alia yi si ’dini ’bo, kini, Ma nga e’yo ’yo suru ’diri tia ’ba ti ndu ’yopi ’diyi pi ma tisi ani’ba be, te ka ’dini ti yi ngani ma eri ku, Opi ’yo ra. 22’Dini ti ndu ndu ’diyi ovu ecetaru ’ba e’yo a’ipi ra ’diyi dri ku, te ’ba e’yo a’ipi ku ’diyi dri; azini vini e’yo oluza eri ovu ecetaru ’ba e’yo a’ipi ku ’diyi dri ku, te ’ba e’yo a’ipi ra ’diyi dri. 23#’Yeta 2:13’Dini, kanisa dria ka yi oku tualu, te ’ba dria ka e’yo ’yo ti ndu ndusi, te ’ba imbale nga ku ’diyi, kani ’ba e’Yo a’ipi ku ’diyi ka fi ra, yi ngani ’yo emi aza aza ’dini ku ya? 24#’Yeta 4:13Te ’ba dria ka e’yo olu ra, azini ’ba e’yo a’ipi kuri, kani ’ba imbale nga kuri ka fi ra, ’ba dria yi nga onzi erini ece, ’ba dria yi nga e’yo erini li, 25#Yoh 4:19; 16:8; Isa 45:14; Dan 2:47; Zek 8:23e’yo zizaru eri asia ’diyi ovu e’dazaru; ’dini eri nga i eco a’bukuru va, nga Munguni inzi, kini ada Munguni emi eselia indi.

26 # 1 Kor 11:18; 12:8; Efe 4:12 Te bani ngoni ya, ma adripi la? Emini emi okuria tualu, emi dria alu alu ovu ongo be, kani imbata be, kani e’yo eceza be, kani e’yo ’yole ti ndu ndusiri be, kani e’yo ’yole ti ndu ndusiri ma ojaza be. E’yo dria ma ovu ’yezaru kiri ’ba ezozu. 27’Ba azini ka e’yo ’yo ti ndusi, ’ba ’diyi ma ovu iri kani na, te ma aga na ku, yi ma ’yo vutinisi vutinisi; azini ’ba’i azini ma oja e’yo nde indi. 28Te ’ba ti ndu ojapiri ka ovu yo, eri ma adri ciri kanisa ma alia, te ma ’yo e’yo i ma ngulupi ma asisi Mungu tia. 29#1 Tes 5:21; ’Yeta 17:11Nabi e’yo olupi ’diyi ma olu, iri kani na, te ’ba acepi ’diyi ma va e’yo nde ma eti’i. 30Te e’yo azini ka ovu ecezaru ’ba azini ripi vari ma tia, ’ba okori ma adri ciri. 31A’disiku emi dria alu alu eco e’yo oluzaru ra, ’ba dria ma isu imbata pi asi omiza be beni; 32te nabi e’yo olupi ’diyi ma orindi ovu nabi e’yo olupi nde ’diyi ma dri ceza ma palaa. 33Te Mungu ovuni Mungu e’yo saaruni ku, te asi anzuruniri; ekile kanisa ’ba alatararu ’diyini ma alia driarile.

34 # 1 Kor 11:3; Tit 2:5; 1 Tim 2:12; Efe 5:22; E’do 3:16 Oku ma ovu ciri kanisa alia; ovuni fezaru yi dri e’yo ’yozu ku; te yi ma ovu e’yo eriza be ’ba ma palaa ekile azitani ’yolerile. 35Te yi ka le e’yo azini nizu, yi ma zi agupi yi vile ’diyi ma tia akua. A’disiku eri ovu drinzaru oku dri e’yo ’yozu kanisa ma alia. 36Ngoni ya ! Kani e’yo Munguni e’do emi vu ya? Kani eri eca emi vu a’dule ya? 37#1 Yoh 4:6’Ba azini ka ega kini i ovu nabini, kani ’ba orindi beri’i, eri ma ni e’yo mani sile emi vu ’diyi ovu azita Opini. 38Te ’ba azini ka ni ku, ma ni ku. 39’Dini, ma adripi, emi ma nda e’yo oluzu avasi, te emi ma oga ’ba e’yo ’yozu ti ndu ndusi ku. 40#Kol 2:5Te e’yo dria ma ovu ’yezaru kililiru yi paria ’yeke.

Currently Selected:

1 'Ba Korintoa 'Diyi 14: LB66

Highlight

Copy

Compare