1 'Ba Korintoa 'Diyi 12

Afa feza Orindini ’diyi

1Afa feza Orindini fele ’diyi ma e’yosi, ma adripi, ma leni emi ma ovu e’yo niza kokoru ku. 2#Hab 2:18, 19Emi ni ra, emi ka ovu ndra jururu, ’yi ce ndra emi dri wura inzile inzi ecopi e’yo ’yopi ku ’diyi ma vuti bizu, yini emi dri cele saarurile. 3#Mar 9:39; Mat 7:21; 1 Yoh 4:2, 3E’yo ’disi ma fe emi ma ni kini, ’ba azini e’yo ’yopi Orindi Munguni ma aliari ’yoni kini, Yesu ovu trizaru, ’dini ku, azini vini ’ba azini ’yoni kini, Yesu eri Opi’i, ’dini ku, pe lu Orindi Alatararurisi a’dule.

4 # Rum 12:6-8; Efe 4:4 Te afa feza ma suruti yi ndu ndu, te Orindi eri alu ’da’i; 5#Efe 4:11te azi ’ba aza kozu ’diyi ma suruti ndu ndu, te Opi eri alu ’da’i; 6te okpo azi ngazu ’diyi ma suruti yi ndu ndu indi, te Mungu afa dria ’yepi okposi e’yo dria ma aliari alu ’da’i. 7#1 Kor 14:26Te fe e’daza Orindini i e’dazuri ’ba dria alu alu dri, ’ba aza kozu ani beni. 8’Ba aluri dri fe e’yo ’yoza onduaniri Orindi ndesi, ’ba aziniri dri fe e’yo ’yoza nitaniri Orindi nde vusi, 9’ba aziniri dri a’itani Orindi nderi ma alia, ’ba aziniri dri feta ’ba ma rua atizu ’diyi Orindi nde aluri ma alia, 10#1 Kor 14:5; ’Yeta 2:4’ba aziniri dri okpo tali ’yezu diyi, ’ba aziniri dri e’yo oluzu’i, ba aziniri dri e’yo orindi ’diyini amazuri’i ’ba aziniri dri e’yo ’yozu ti ndu ndusiri ojazuri’i. 11#Rum 12:3; Efe 4:7; 1 Kor 7:7Te ’ye e’yo diyi dria Orindi nde alu ’dari ma okposi, erini e’yo ndu ndu awaria ’ba dria alu alu dri ekile erini lelerile

12 # Rum 12:4-5; 1 Kor 10:17 Ekile ruani ovule alu, te esele be kakaurile, azini esele ruani dria ovupi kakau ’diyini yi ecile rua alururile, Kristo ovu ’dinile indi. 13#Gal 3:28A’disiku Orindi alu ma alia ama dria a’i baputizi amani fizu rua alu ma alia, kani ’ba Yahudini kani ’ba Girikini, kani ati’baru kani karianziru, fe ama driani Orindi alu mvuzu’i.

14A’disiku rua ovuni lu esele alu ku, te kakau. 15Pa ka ’yo ra kini, Mani ovule gi’i kurisi, ma ovuni rua ma eseleru ku; te e’yo ’disi ovuni kini eri ovuni rua ma eseleru ku, ’dini ku. 16Te bi ka ’yo ra kini, Mani ovule mile’i kurisi ma ovuni rua ma eseleru ku; te e’yo ’disi ovuni kini eri ovuni rua ma eseleru ku, ’dini ku. 17Rua dria ka ovu mile efi’i, e’yo erizuri ngoa ya? Rua dria ka ovu e’yo erizuri’i, afa aji nguzuri ngoa ya? 18Te di Mungu ’ba rua ma esele ’diyi dria alu alu rua ma alia ekile erini lelerile. 19Te esele dria ka ovu esele alu, rua nde ma piruri ngoa ya? 20’Dini esele ovu kakau, te ruani alu. 21Te econi mileni e’yo ’yozaru gi tia kini, E’yo mani lele ’yele misini yo, ’dini ku; dri econi vini ’yozaru pa tia kini, E’yo mani de ’yele emisini yo, ’dini ku. 22Te rua ma esele amani egale yi okpo be were ’diyi ma e’yo ovu amboru tu aga ra, 23te rua ma esele amani egale kini inzita yini were ’diyi, ama yi osu inzitasi aga ra, te rua amani ma esele e’dapi onyiru ku ’diyi ovu rua ma onyi be aga ra, 24te rua amani ’ma esele e’dapi onyiru ’diyi leni onyi azini drinia ku. Te Mungu eci rua nde dria tualu, inzita agapiri fezu esele inzita kokoruri dri, 25esele coza ma ovu ani rua ma alia ku beni, te rua ma esele dria ma ’ba yi asi yi aza kozu yi eselia dria tro tro. 26’Dini esele alu ka ovu candi be, esele dria ovu candiru eri be; kani esele alu ka ovu inzizaru, esele dria ovu ayikosi eri be.

27 # Rum 12:5; Efe 5:30 Te emi ovu rua Kristoni, emi alu alu ovu rua nde ma eseleni. 28#Efe 4:11, 12Te Mungu ope ’ba azini kanisa alia ’dini, okorisi ’ba ti opele ’diyi, iririsi ’ba e’yo nabiru olupi ’diyi, narisi ’ba ’ba imbapi ’diyi, vutinia ’ba tali ’yepi ’diyi pi, vutinia ’ba afa feza ’ba rua atizuri be ’diyi pie, ’ba ’ba aza kopi ’diyi pie, ’ba ’ba dri cepi ’diyi pie, ’ba e’yo ’yopi ti ndu ndusi ’diyi pie dria. 29’Ba dria yi ’ba ti opele ’diyiru ya? ’Ba dria yi ’ba e’yo olupi ’diyiru ya? ’Ba dria yi ’ba ’ba imbapi ’diyiru ya? ’Ba dria yi ’ba tali ’yepi ’diyiru ya? 30’Ba,dria yi afa feza ’ba atizuri be ya? ’Ba dria yi e’yo ’yo ti ndu ndusi ya? ’Ba dria yi ti oja ra ya? 31#1 Kor 14:1Te emi lima le ovuzu afa feza agapi ra ’diyi be avasi.

Currently Selected:

1 'Ba Korintoa 'Diyi 12: LB66

Highlight

Copy

Compare