रोमियों 9
9
इस्राएल रे लोक्कां तांइ अव्वे कै?
परमेश्वर ते उसेरे चुणे रे मणू
1मैं सच बोलदा किजोकी मैं मसीह यीशु रा मणू है, मैं झूठ नी बोल्लेया करदा है, मेरा विवेक पवित्रात्मा रे जरिये इस गल्ल जो पक्का करदा, 2मेरे जो बड़ा वरी दुख है, अते मेरे जो अपणे लोक्कां तांइ बड़ी काली हुंदी। 3किजोकी मैं यहूदी लोक्कां जो, जे मेरे अपणी जाति रे मणू हिन, छुटकारा दुआणे तांइ श्रापित कित्ते जाणे, ते मसीह का अलग करी दित्ते जाणे तांइ भी तैयार है। 4से मणू मेरे सांई इस्राएल देस रे मणू हिन, से परमेश्वर रे गोद लित्ते री औलाद्दां बणने तांइ चुणे गे थिये, परमेश्वर ने तिन्हा पर अपणी महिमा ज़ाहिर कित्ती। तिन्हा ने तिन्हा लोक्कां कने वाचा बन्नी। तिन्हा जो परमेश्वर रा कानून, ते तिन्हेरी अराधना करणे रा सौभाग्य मिल्लेया। 5अब्राहम, इसहाक ते याकूब तिन्हेरे पुरखे हिन। ते मसीह यीशु भी इन्सानी तौर पर इक्क इस्राएली मणू थिये। परमेश्वर जो महिमा मिलदी रे जे सारेयां पर राज करदे। आमीन! 6पर इय्यां नी है कि परमेश्वर अपणे वादे जो निभाणे बिच नाकाम होई गे, किजोकी इस्राएल रे खानदान रा हर मणू परमेश्वर रा मणू नी है। 7अते अब्राहम रे खानदान बिच पैदा होणे री वजह सारे तिन्हेरी सच्ची औलाद्दां नी बणी जांदे, किजोकी जिय्यां कि पवित्रशास्त्र बिच परमेश्वर ने अब्राहम जो बोल्लेया,
“इसहाक का ही तेरा वंश गिणेया जाणा।”
हालांकि अब्राहम रे होर भी बच्चे थिये। 8मतलब की इन्सानी तौर पर अब्राहम री जे औलाद्दां होए री हिन, से सारे परमेश्वर री औलाद्दां नी केहलांदी। पर परमेश्वर रे वादा कित्ते रे औलाद्दां ही अब्राहम री औलाद्दां गिणी जांदी। 9किजोकी परमेश्वर ने ए वादा कित्तेया थिया, मैं अगले साल फिरी हटणा, ते सारा जो इक्क मुंडा होणा। 10अते इन्ना ही नी, पर असा रे पुरखे इसहाक ते रिबेका जो जुड़वे बच्चे होये। 11-12पर तिन्हेरे पैदा होणे रे पैल्ले या तिन्हेरे बिच किच्छ भी खरा या बुरा होणे का पैल्ले ही परमेश्वर ने रिबेका जो दस्सेया,
“बड्डे मुंडे ने छोटे मुंडे री सेवा करणी।”
परमेश्वर ने ए गल्ल ए ज़ाहिर करणे तांइ बोल्ली कि से अपणे मकसद तांइ लोक्कां जो चुणदे, ते ए तिन्हा दोन्नां रे किच्छ करणे री वजह कने नी थिया। 13जिय्यां कि पवित्रशास्त्र बिच लिख्खे रा है,
“मैं एसाव का बधी करी याकूब जो चाएया।”
14तां फिरी असी कै बोलण? कै परमेश्वर तिन्हा जो चुनणे बिच ना नाइन्साफी करदे जिन्हा जो से चुणना चाह्ंदे? बिल्कुल भी नी। 15किजोकी परमेश्वर ने मूसा कने बोल्लेया थिया,
“मैं जिस पर भी दया करणा चाह्ंगा, तिस पर दया करणी,
ते जिस कुसकी पर अनुग्रह करणा चाह्ंगा, तिस पर अनुग्रह करणा।”
16इधेरे तांइ परमेश्वर तिन्हा जो चुणदा, जिन्हा पर से दया करणा चाह्ंदे, ते ए सारा किच्छ असा री मर्जी या कम्मां पर निर्भर नी करदा, पर सिर्फ परमेश्वर री दया पर निर्भर करदा। 17किजोकी पवित्रशास्त्र बिच परमेश्वर ने मिस्र रे फिरौन जो बोल्लेया थिया,
“मैं तिज्जो इधेरे तांइ राज्जा बणाया थिया,
ताकि मैं तेरे जरिये अपणी ताकत दिखाई सकां,
ते मेरे नां रा प्रचार सारी दुनिया बिच हो।”
18इधेरे तांइ परमेश्वर जिस पर दया करणा चाह्ंदे तिस पर दया करदे, अते जिस जो जिद्दी बनाणा चाह्ंदे तिसजो जिद्दी बणाई दिंदे।
परमेश्वर रा गुस्सा ते उसेरी दया
19तां फिरी किच्छ लोक्कां ने मेरे कने बोलणा, “जे अगर इदेयी गल्ल है, तां परमेश्वर असा जो गलत किय्यां ठैहराई सकदे?” किजोकी कोई भी परमेश्वर जो से करणे का नी रोक्की सकदे जे से करणा चाह्ंदे। 20ना, इय्यां मत बोल। तू इक्क मामुली इन्सान होई करी, किय्यां परमेश्वर जो जवाब देई सकदा? कै मिट्टी जो अपणे बणाणे वाले कुम्हार का ए पूच्छणे रा हक है, कि तू मेरे जो इदेया किजो बणाया? 21कै इक्क कुम्हार जो ए हक नी है कि इक्क ही साँचे का बदिया कम्मां तांइ भांडे बणाए, ते तिस्सी साँचे बिच का आम इस्तेमाल रे भी भांडे बणाए? 22परमेश्वर अपणी ताकत ते गुस्सा तिन्हा लोक्कां पर ज़ाहिर करणा चाह्ंदे थिये जे मुकाई दित्ते जाणे रे जोग्गे थिये, पर इसेरे बजाए परमेश्वर तिन्हा लोक्कां कने सबर कने रे। 23परमेश्वर ने तिन्हा लोक्कां पर अपणी महिमा ज़ाहिर करी कित्ता, जिन्हा जो तिन्हा ने अपणी महिमा दैणे तांइ चुणेया थिया। 24मतलब असी लोक, जिन्हा जो परमेश्वर ने ना सिर्फ यहूदी लोक्कां बिच का, पर गैर यहूदियां बिच का भी चुणेया। 25गैर यहूदियां रे बारे बिच सोचदे होए परमेश्वर ने भविष्यद्वक्ता होशे री कताब बिच बोल्ले रा है,
“मते जणे जे मेरे मणू नी थिये, तिन्हा जो मैं अपणे मणू बोलणा।
मते मणू जिन्हा जो मैं पैल्ले प्यार नी कित्तेया, तिन्हा जो मैं अवे प्यार करणा।
26ते जिस जगाह् पर परमेश्वर ने बोल्लेया, तुसी मेरे मणू नी हिन,
तित्ते ही जिन्दे परमेश्वर ने तिन्हा जो अपणी औलाद्दां बोल्लेया।”
27अते यशायाह भविष्यद्वक्ता ने पवित्रशास्त्र बिच इस्राएल देस रे लोक्कां रे बारे बिच रोई करी बोल्लेया,
“भले ही इस्राएल रे औलाद्दां समुन्द्र री रेत रे कणां सांई अणगिणत हिन,
तां भी तिन्हा बिच का थोड़े जणेया ने ही बचणा।”
28किजोकी प्रभु ने तौले ही दुनिया रे सारे लोक्कां का सख्ती कने हिसाब लैणा।
29अते जिय्यां कि यशायाह भविष्यद्वक्ता ने पैल्ले भी बोल्लेया थिया,
“जे अगर सेना रे प्रभु असा रे औलाद्दां जो नी बक्शदे,
तां असा री हालत सदोम ते अमोरा प्रदेश रे लोक्कां सांई होई जाणी थी,
जिन्हा जो परमेश्वर ने मुकाई दित्तेया थिया।”
इस्त्राएल रा अविश्वास
30तां फिरी असी कै बोलण? गैर यहूदी मणू परमेश्वर री नजरां बिच धार्मिक बणने री कोसीस नी करेया करदे थिये, पर परमेश्वर ने तिन्हा लोक्कां जो धार्मिक ठैहराया, किजोकी तिन्हा लोक्कां ने मसीह बिच विश्वास कित्तेया। 31इस्राएल रे मणू चाह्ंदे थिये कि परमेश्वर तिन्हा लोक्कां जो मूसा रे कानूनां जो मनणे कने धार्मिक ठैहराई दैण, पर तिन्हा जो धार्मिक नी ठैहराया गेया। 32इय्यां किजो नी होया? किजोकी से मणू परमेश्वर पर विश्वास करणे कने नी, पर मूसा रे कानून जो मन्नी करी धार्मिक ठैहरणा चाह्ंदे थिये। से मणू अपणे रस्ते बिच बड्डे बट्टे कने ठोकर खाई करी #9:32 इस जगाह् पर बड्डा बट्टा मसीह यीशु रे पास्से इसारा करदा ते इसेरा मतलब है कि से मणू मसीह यीशु पर विश्वास नी करी सके।छुड़की पये। 33जिय्यां कि पवित्रशास्त्र बिच लिख्खे रा है,
“दिख्खो, मैं सिय्योन #9:33 सिय्योन इत्ते यरुशलेम पास्से इसारा करदा।बिच इक्क बट्टे जो रखणा,
जिस कने ठोकर लगदी, अते इक्क इदेइ टोल,
जिस कने ठोकर खाई करी लोक्कां ने छुड़कणा,
पर से जे कोई मणू तिस पर विश्वास करे,
तां तिसजो कदी शर्मसार नी होणा पैणा।”
Currently Selected:
रोमियों 9: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
