रोमियों 8
8
पवित्रात्मा रे जरिये जिन्दगी
1इधेरे तांइ अवे जे प्रभु यीशु मसीह बिच विश्वास करदे, तिन्हा पर सजा रा हुकम नी है। 2किजोकी पवित्रात्मा ने तिन्हा जो मसीह यीशु रे जरिये पाप ते मौत रे काबू का अजाद करी दित्ते रा है ते नौई जिन्दगी दित्ते री है। 3असा रे पापी स्वभाव री वजह कने मूसा रा कानून कमजोर होई करी जे नी करी सकेया, से परमेश्वर ने कित्ता। तिन्हा ने अपणे इकलौत्ते पुत्तर जो असा पाप्पी लोक्कां का इक्क इन्सान रे रुप बिच भेज्जेया। ते परमेश्वर ने अपणे पुत्तर जो असा रे पाप्पां तांइ कुर्बानी रे रुप बिच देई करी, असा रे पाप्पां री सजा तिन्हेरे सरीर पर पाई दित्ती ते असा पर पाप री ताकत जो मुकाई दित्ता। 4तिन्हा ने ए इधेरे तांइ कित्ता ताकि असी अपणी मर्जी करणे रे बजाए, पवित्रात्मा री गल्ल मन्नी करी मूसा रे कानून जो पूरा करण। 5-6जे मणू पाप रे स्वभाव रे काबू बिच हिन, से पाप री गल्लां सोचदे, ते इसेरा अंजाम मौत है, पर जे मणू पवित्रात्मा रे काबू बिच हिन, से मणू आत्मिक गल्लां रे बारे बिच सोचदे, ते इसेरा अंजाम सच्ची जिन्दगी ते सांती है। 7किजोकी पाप रे स्वभाव रे काबू बिच रैह्णा ता परमेश्वर कने दुश्मणी रखणा है, किजोकी पाप रा स्वभाव ना परमेश्वर रे कानून रे हेठ है, ते ना ही होई सकदा। 8अते जे पाप रे स्वभाव रे काबू बिच हिन, से परमेश्वर जो खुस नी करी सकदे। 9पर जां कि पवित्रात्मा तुसा रे बिच बसदा, तां तुसा पाप रे स्वभाव रे काबू बिच नी, बल्कि पवित्रात्मा रे काबू बिच रैहन्दे। ते जे अगर कुसकी मणू बिच मसीह रा आत्मा नी है, तां से परमेश्वर रा मणू नी है। 10जे अगर मसीह तुसा बिच वास करदे, तां भले ही पाप री वजह कने सरीर रे मरी जाणे पर भी, पवित्रात्मा तुसा जो जिन्दगी दिंदी, किजोकी तुसा परमेश्वर रे सामणे धार्मिक ठैहराए गेरे हिन। 11पवित्रात्मा तुसा बिच रैहन्दा जिन्हा ने मसीह यीशु जो मुर्देयां बिच का जिन्दा कित्ता। ते जिय्यां परमेश्वर ने मसीह यीशु जो मुर्देयां बिच का जिन्दा कित्ता, तिय्यां ही तुसा जो भी तिस्सी पवित्रात्मा रे जरिये मुर्देया बिच का जिन्दा करणा जे तुसा बिच रैहन्दा। 12ओ मेरे संगी विश्वासियों, असा का निभाणे तांइ किच्छ जिम्मेदारियां हिन, पर असा रा पाप रा स्वभाव नी चाह्ंदा कि असी तिन्हा जो निभाण। 13किजोकी जे अगर तुसा पाप रे स्वभाव रे काबू बिच जिन्दगी जिंगे, तां परमेश्वर का बखरे कित्ते जाणे, ते जे अगर तुसा पवित्रात्मा री ताकत कने से कम्म करणा छड्डी देयो जे पाप रे स्वभाव कने हुंदा, तां तुसा ने जीणा।
14इधेरे तांइ जे मणू पवित्रात्मा रे हिसाब कने चलदे हिन, से ही परमेश्वर रे औलाद्दां हिन। 15किजोकी तुसा जो गुलामी री आत्मा नी मिल्ले री है कि तुसा जो डर बिच जिन्दगी बिताओ, पर जां परमेश्वर ने तुसा जो अपणी औलाद्दां बणाई करी गोद लेई लित्ता, तां तुसा जो पवित्रात्मा मिल्लेया। अवे असी परमेश्वर जो पिता बोलदे। 16पवित्रात्मा अप्पु ही असा री आत्मा कने ए गवाई दिंदी कि असी परमेश्वर री औलाद्दां हिन। 17ते जे अगर असी परमेश्वर री औलाद्दां हिन तां असी तिन्हेरे वारिस भी हिन। बल्कि असी मसीह यीशु कने परमेश्वर री महिमा रे वारिस हिन। जे अगर असी मसीह यीशु सांई जुल्म सैह्ंदे, जे असी अब्बे सहन करेया भी करदे हिन, तां असा ने भी तिन्हेरी महिमा बिच हिस्सा पाणा।
भविष्य बिच आणे वाली महिमा
18मेरे जो ए गल्ल पक्के तरिक्के कने पता है कि इस बेल्ले असी जे दुख-तकलिफां सहन करेया करदे हिन, से तिस महिमा रे सामणे किच्छ भी नी है जे परमेश्वर असा जो दैणे वाले हिन। 19किजोकी परमेश्वर री सारी रचना बड़ी उम्मीद तिस दिन जो भालेया करदे हिन जां परमेश्वर ने ज़ाहिर करणा कि कुण तिन्हेरे असली औलाद्दां हिन।
20पर परमेश्वर री बणाए री हर इक्क रचना ने अपणे बणाए जाणे रा मकसद गवाई दित्ता। ए तिसेरी अपणी मर्जी कने नी होया पर परमेश्वर ने इय्यां होणा दित्ता।#8:20 इसेरा खास मतलब ए है कि ए सब किच्छ आदम रे पाप करणे री वजह कने होया। पर फिरी भी आस है। 21परमेश्वर री बणाए री हर इक्क रचना बड़ी उम्मीद कने तिस दिन जो भालेया करदी है, जां तिसने मौत ते बर्बादी का छुटकारा पाई करी परमेश्वर री औलाद्दां कने महिमामय अजादी बिच शामिल होई जाणा। 22असी जाणदे कि परमेश्वर री बणाए री हर इक्क रचना, आदम रे पाप करणे रे बेल्ले का लेई करी आज तिकर इक्क दुपराणी जनानी सांई लोकिणे री पीड़ां कने तड़पेया करदी है। 23सिर्फ परमेश्वर री रचना ही नी तड़पेया करदे हिन, पर असी भी, जिन्हा जो परमेश्वर रा पैल्ला दान, पवित्रात्मा, जे परमेश्वर रे वादे री निशानी है, मिलणे रे बावजूद भी तिस दिन री भाल बिच अंदर ही अंदर तड़पेया करदे हिन जां असा जो हर बुराई का छुटकारा मिली जाणा। 24असा जो महिमा मिलणे री उम्मीद तिस बेल्ले दित्ती गयी थी, जां परमेश्वर ने असा जो बचाया थिया, पर जे अगर असा का से पैल्ले का ही है जिसेरी असी आस रखदे, तां असा जो तिस तांइ अग्गे जो उम्मीद लाए रखणे री जरुरत नी है। 25पर असी तिस ही चीज री आस रखदे जिन्हा जो हल्ले असी दिख्खे रा ना हो। ते असा जो सबर ते हौंसले कने तिसजो भालणा भी चाएदा। 26इस्सी तरिक्के कने पवित्रात्मा भी असा री आत्मिक कमजोरी बिच असा री मदद करदा, किजोकी असी अप्पु नी जाणदे कि परमेश्वर कै चाह्ंदे कि असा जो कुस गल्ल तांइ प्रार्थना करणा चाएदी, पर पवित्रात्मा अप्पु ही असा तांइ रुआंसे मन कने इदेइ बिनती करदे जिस जो लफ्ज़ां बिच बयान नी कित्तेया जाई सकदा। 27ते परमेश्वर जे मन री गल्लां जो जाणदे, से समजी जांदे कि पवित्रात्मा कै बोल्लेया करदे हिन, किजोकी से पवित्र मणूआं तांइ परमेश्वर री इच्छा रे हिसाब कने बिनती करदे।
28असी जाणदे कि परमेश्वर हर गल्ल बिच तिन्हा लोक्कां कने भलाई करदे जे तिन्हा कने प्यार करदे। परमेश्वर ने तिन्हा लोक्कां जो अपणे मकसद तांइ चुणे रे हिन। 29किजोकी परमेश्वर अपणे लोक्कां जो पैल्ले का जाणदे, ते परमेश्वर ने तिन्हा लोक्कां जो अपणे पुत्र सांई बणने तांइ चुणे रा है, ताकि मसीह यीशु परमेश्वर रे बाकि मती औलाद्दां बिच तिन्हेरे जेठे पुत्तर ठैहरे। 30जिन्हा मणूआं जो परमेश्वर पैल्ले का जाणदे, परमेश्वर ने तिन्हा मणूआं जो चुणी लेया, ते जिन्हा मणूआं जो परमेश्वर ने चुणी लेया, तिन्हा जो परमेश्वर ने धार्मिक भी ठैहराए रा है, जिन्हा मणूआं जो परमेश्वर ने धार्मिक ठैहराया, तिन्हा जो परमेश्वर ने अपणी महिमा भी दित्ती।
परमेश्वर रा प्रेम
31अते इन्हा गल्लां जो ध्यान बिच रखदे होए असी इस अंजाम पर पुजदे, कि जां परमेश्वर असा रे पास्से है, तां कोई भी असा जो हराई नी सकदा। 32परमेश्वर ने अपणे इकलौत्ते पुत्र जो भी नी छड्डेया, पर तिन्हा जो असा रे खातिर अपणे दुश्मणा रे हत्थां बिच भी सौंप्पि दित्तेया। परमेश्वर ने असा जो से सब किच्छ जरुर दैणा जिसेरा तिन्हा असा कने वादा कित्ते रा है। 33कोई भी परमेश्वर रे सामणे असा पर इल्जाम नी लाई सकदा, किजोकी परमेश्वर ने असा जो धार्मिक ठैहराए रा है। 34इदेया कोई नी है जे असा पर सजा रा हुकम देई सके, किजोकी से मसीह यीशु ही हिन जे असा तांइ मरे ते मुर्देयां बिच का जिन्दे होई गे, ते परमेश्वर रे सज्जे पास्से बैठ्ठे रे हिन, ते असा तांइ बिनती करेया करदे हिन। 35कोई असा जो मसीह यीशु रे प्यार का अलग नी करी सकदा। ना दुख-तकलिफां, ना मुसीबतां, ना लड़ाई-झगड़े, ना अकाल, ना नगांपन, ना खतरा ते ना ही मौत। 36जिय्यां कि पवित्रशास्त्र बिच लिख्खे रा है, जित्ते दाऊद ने परमेश्वर जो बोल्ले रा है
“असी तेरे तांइ हमेसा मौत रे खतरे बिच रैहन्दे,
असी मारे जाणे वाली भेड़ां सांई गिणे गेरे हिन।”
37पर असी मसीह यीशु रे जरिये हर इक्क गल्ल बिच इक्क विजेता का बधी करी हिन, किजोकी मसीह यीशु असा कने प्यार करदे। 38किजोकी मैं पक्के तौर पर जाणदा, कि ना मौत, ना जिन्दगी, ना स्वर्गदूत, ना स्वर्ग बिच रैह्णे वाले शासक, ना आज्ज, ना आणे वाला कल, ना ताकत, ना ही ऊंचाई असा जो मसीह रे प्यार का बखरा नी करी सकदे। 39ना कोई असा रे उप्पर, ना कोई असा रे थल्ले, ना परमेश्वर री बणाए री कोई होर रचना, असा जो परमेश्वर रे उस प्यार का बखरा करी सकदा जे तिन्हा ने असा पर प्रभु यीशु मसीह रे जरिये ज़ाहिर कित्ता।
Currently Selected:
रोमियों 8: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
