रोमियों 4
4
अब्राहम रा उदारण
1तां फिरी असा जो यहूदी होणे रे नाते अपणे पुरखे अब्राहम रे बारे बिच कै बोलणा चाएदा? कुस वजह कने तिन्हा जो धार्मिक गिणेया गेया? 2किजोकी जे अगर अब्राहम ठीक कम्मां कने धार्मिक ठैहराया जादां, तां तिन्हा का घंमड करणे री वजह होई सकदी थी, पर से परमेश्वर रे सामणे घमंड नी करी सकदे। 3किजोकी पवित्रशास्त्र ए बोलदा कि अब्राहम ने परमेश्वर रे कित्ते रे वादे पर विश्वास कित्ता ते परमेश्वर ने तिन्हा जो इस तांइ धार्मिक ठैहराया। 4कम्म करणे वाले जो मजूरी दैणा दान नी पर हक्क समजेया जांदा। 5पर मणू अपणे कम्मां री वजह कने नी पर दुष्ट लोक्कां जो धार्मिक बणाणे वाले परमेश्वर बिच विश्वास रे जरिये धार्मिक ठैहराये जांदे। 6तिय्यां ही दाऊद बोलदा कि परमेश्वर ने तिन्हा लोक्कां जो किय्यां आशीष दित्ते री है, जिन्हा लोक्कां जो तिन्हा ने बिना कम्मां रे धार्मिक बणाए रा है। 7जिय्यां कि तिनिये पवित्रशास्त्र बिच लिख्खे रा है:
“धन्य हिन से जिन्हा रे अधार्मिक माफ होए,
ते जिन्हेरे पाप ढकी दित्ते गे।
8धन्न हिन से मणू जिन्हेरे पाप परमेश्वर नी गिणदे।”
9तां ए धन्न वचन, कै खतने वालेयां तांइ ही है, या बगैर खतने वालेयां तांइ भी है? जे पवित्रशास्त्र बिच लिख्खे रा है असी से ही बोलदे आया करदे हिन, कि अब्राहम ने परमेश्वर रे वादे पर विश्वास कित्ता ते परमेश्वर ने तिन्हा जो इस तांइ धार्मिक ठैहराया। 10ए सब किच्छ कुस बेल्ले होया? खतना होणे का पैल्ले या खतना होणे रे बाद? ए खतना करणे रे बाद नी पर खतना होणा का पैल्ले ही होया। 11परमेश्वर ने पैल्ले ही अब्राहम जो धार्मिक ठैहराई करी अपणाई लित्तेया थिया, जां हल्ले तिन्हेरा खतना भी नी होए रा थिया। खतने रा निसान परमेश्वर द्वारा अपणाए जाणे री निशानी है। इधेरे तांइ अब्राहम तिन्हा लोक्कां रे आत्मिक पुरखे हिन जिन्हेरा खतना ता नी होए रा है पर तिन्हा जो परमेश्वर बिच विश्वास है। से मणू अपणे विश्वास रे जरिए धार्मिक बणाए गेरे हिन। 12अते अब्राहम खतने वालेयां रे भी आत्मिक पुरखे हिन, पर सिर्फ तां ही जां से मणू परमेश्वर पर तिय्यां ही विश्वास करदे हो, जिय्यां खतना होणे का पैल्ले अब्राहम जो परमेश्वर बिच थिया।
विश्वास रे जरिए परमेश्वर रे वादे रा पूरा होणा
13परमेश्वर ने अब्राहम ते तिन्हेरे खानदान कने वादा कित्तेया थिया तिन्हा ने दुनिया रे वारिस होणा, परमेश्वर ने अब्राहम कने ए वादा इधेरे तांइ नी कित्तेया, किजोकी तिन्हा ने मूसा रे कानून रा पालण कित्तेया, पर इधेरे तांइ किजोकी तिन्हा ने परमेश्वर बिच विश्वास कित्तेया थिया ते इस तांइ से धार्मिक ठैहराए गे। 14जे अगर अब्राहम ते तिसेरे खानदान कने इधेरे तांइ वादा कित्तेया गेया किजोकी तिन्हा ने मूसा रे कानून रा पालण कित्तेया, तां विश्वास बेकार ते वादा बेमतलब ठैहरदा। 15किजोकी परमेश्वर ने तिस हर मणू जो सजा दैणी जे कानून जो पूरे तरिक्के कने नी मनदा। जित्ते कानून नी, तित्ते तिसेरा कोई उल्लंघन भी नी। 16इधेरे तांइ वादा, परमेश्वर पर विश्वास करणे पर आधारित है, ताकि परमेश्वर रा वादा तिन्हा रे अनुग्रह रे मुताबक हो, परमेश्वर रा ए वादा सिर्फ अब्राहम ते तिन्हेरे वशंजा तांइ ही नी है जिन्हा का मूसा रा कानून है, ए तिन्हा सारे मणूआं तांइ है जिन्हा बिच अब्राहम जदेया ही विश्वास है, जे असी सारे मणूआं रे पुरखे हिन। 17जिय्यां कि पवित्रशास्त्र बिच लिख्खे रा है,
“मैं तेरे जो मती जातियां रा पुरखे ठैहराए रा है।”
परमेश्वर री नजर बिच अब्राहम असा रे पुरखे हिन। तिन्हा ने तिस परमेश्वर पर विश्वास कित्तेया, जे मुर्देयां जो जिन्दा करदे, ते तिन्हा जो अस्तित्व बिच लांदे, जिन्हेरा कोई अस्तित्व नी है। 18-19परमेश्वर ने अब्राहम जो बोल्लेया कि तिन्हा मती जातियां रा पुरखे बणना। अब्राहम जो ए लग्गेया कि से पिता बणने तांइ बड़ा जादा बूड्डा होई गे रा है किजोकी से इक्क-सौ साल्ले रा होई गेया थिया, ते सारा अप्पु भी अवे बच्चे नी जम्मी सकदी थी। हालांकि हर गल्ल कने ए ही लग्गेया कि से मते लोक्कां रा पिता नी बणी सकदा, पर फिरी भी तिन्हा ने आस नी छड्डी ते विश्वास करदे रे। 20पर अब्राहम ने कदी भी परमेश्वर रे वादे पर शक नी कित्ता ते ना ही तिस पर कोई सवाल चुक्केया, बल्कि तिसेरा विश्वास होर मजबूत होई गेया ते तिनिये परमेश्वर री महिमा कित्ती। 21ते पक्का जाणी लित्ता की जिस गल्ल रा परमेश्वर ने वादा कित्ता, से तिन्हा जो पूरा करणे रे भी काबिल हिन। 22किजोकी अब्राहम ने परमेश्वर रे वादे पर विश्वास कित्ता ते परमेश्वर ने तिन्हा जो इस तांइ धार्मिक ठैहराया।
23ते ए वचन,
“अब्राहम ने परमेश्वर रे वादे पर विश्वास कित्ता ते परमेश्वर ने तिन्हा जो इस तांइ धार्मिक ठैहराया,”
सिर्फ तिन्हा तांइ ही नी लिख्खेया गेया, 24बल्कि असा लोक्कां तांइ भी लिख्खेया गेया, किजोकी तिन्हा पर विश्वास करणे री वजह कने तिस परमेश्वर ने असा जो धार्मिक ठैहराणा, जिन्हा ने मसीह यीशु जो मुर्देयां बिच का जिन्दा कित्ता। 25मसीह यीशु असा रे पाप्पां तांइ पकड़वाए गे ते मारे गे, ते असा जो धार्मिक ठैहराणे तांइ परमेश्वर ने तिन्हा जो जिन्दा भी कित्ता।
Currently Selected:
रोमियों 4: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
