फिलिप्पियों 3

परमेश्वर जो पसंद आणे वाली गल्लां

सच्ची धार्मिकता

1ते ओ मेरे संगी विश्वासियों, प्रभु री वजह कने खुस रेयो, तुसा जो से ही गल्लां घड़ी-घड़ी लिखणे बिच मेरे जो कोई तकलीफ नी है, ताकि इस कने गलत शिक्षकां का बची सको। 2तिन्हा बुरे लोक्कां का बची रेयो जे कूत्तेयां सांई हिन, ते तिन्हा लोक्कां का भी बचे रेयो जे तुसा जो बोलदे कि छुटकारा पाणे तांइ तुसा जो खतना करवाणे री जरुरत है। 3हकीकत बिच तां असी परमेश्वर रे मणू हिन, ते परमेश्वर रे पवित्रात्मा रे दसणे रे हिसाब कने अराधना करदे, ते मसीह यीशु पर घमंड करदे ते असी अपणे इन्सानी कम्मां पर निर्भर नी हुंदे। 4मैं तां इन्सानी ताकत पर निर्भर होई सकदा थिया, जे कोई इन्सानी ताकत पर निर्भर होणे री सोच रखदा, तां मैं उस का भी जादा इन्सानी ताकत पर निर्भर होई सकदा। 5जां मेरे पैदा होणे रे अठमे दिन पर परमेश्वर रे हुकमां रे हिसाब कने मेरा खतना होया, मैं पैदाइसी इस्राएली है ते बिन्यामीन गोत्र रा है, मेरे मां-प्यो यहूदी हिन, ते मैं इब्रानी है, ते मूसा रे कानून जो मनणे बिच मैं फरीसी है। 6ते मेरे अंदर इन्ना जोस थिया कि मैं कलीसिया जो तंग करणे वाला मणू थिया, ते यहूदी नियमां रे हिसाब कने इक्क धार्मिक मणू थिया किजोकी मैं हर कानून जो मनदा थिया। 7पर इक्क समय पर मैं तिन्हा सारी चीजां जो बड़ा जरुरी समजदा थिया पर अवे तिसजो मैं मसीह रे तिन्हा कम्मां जो दिखणे रे बाद जे तिन्हा ने मेरे तांइ कित्ते री हिन, तिन्हा चीजां जो बेकार समजदा। 8जे अगर मैं मसीह यीशु जो अप्पु जानणे रे मुल री तुलना बाकि चीजां कने करां, तां मैं बाकि सारी चीजां जो बेकार समजदा, ते इसी वजह कने मैं हर तिस चीज जो छड्डी रख्खेया ते मैं तिन्हा चीजां जो कचरा समजदा। ताकि मैं मसीह यीशु रे हुकमां जो जादा ठीक तरिक्के कने मन्नी सकां। 9अते मैं मसीह यीशु कने इक्क-मन होई करी रेयां, मेरी धार्मिकता मूसा रे कानूनां जो मनणे रे आधार पर नी है, पर ए धार्मिकता से है जे परमेश्वर मेरे जो मसीह यीशु बिच विश्वास करणे री वजह कने दिंदे। 10मैं ए चाह्‍ंदा कि मैं मसीह जो जाणी लेयां ते तिन्हेरी तिस मरे रे बिच का जी उठणे री ताकत रा अनुभव करां जिस कने से फिरी जिन्दे होई गे थिये, ते तिन्हेरे सांई दुख सैह्णे ते तिन्हेरे सांई बणने ते तिस्सी तरिक्के कने मरणे रे जरिये जिय्यां से मरे थिये। 11ताकि मैं भी मरे रे लोक्कां बिच का वापिस फिरी जिन्दा कित्तेया जां।

निसाने रे पास्से दौड़ना

12मैं ए नी बोलदा कि मैं ए सारी चीजां पाई चुके रा है या मैं सिद्व होई चुके रा है, पर मैं पूरी कोसीस करदे होए अग्गे बदेया करदा है ताकि मैं सिद्वता रे रस्ते पर बेहतर बणदा जां, जिस तांइ मसीह ने मेरे जो चुणेया थिया। 13ओ मेरे संगी विश्वासियों, मैं ए नी सोचदा कि मैं सिद्वता जो पाई चुके रा है, पर सिर्फ ए ही इक्क चीज करदा कि जे पीच्छे री गल्लां जो भुल्ली करी अपणी मंज़िल रे पास्से अग्गे जो बदधा रैहन्दा। 14उस मंजिल तांइ लगातार कोसीस करदा कि मेरे परमेश्वर का स्वर्ग बिच जाणे रा से ईनाम मिल्लो जिस तांइ परमेश्वर ने असा जो मसीह यीशु रे कम्म री वजह कने चुणे रा है 15अते असा बिच जिन्ने भी मणू आत्मिक तौर पर परिपक्व हिन, से इदेइ ही सोच रख्खे ते जे अगर तुसा रा होर गल्लां बिच किच्‍छ होर सोच-विचार हो तां परमेश्वर ने तुसा जो से गल्ल भी दस्सी दैणी। 16असा जो तिस सच रे हिसाब कने जिन्दगी बिताणी चाएदी जे परमेश्वर ने असा पर ज़ाहिर कित्ते री है। 17ओ मेरे संगी विश्वासियों, तुसा सारे मेरे सांई जिन्दगी जियो ते मसीह री सेवा करणे वाले असा रे साथियां का सिख्खो जे असा सांई जिन्दगी जिया करदे हिन। 18किजोकी मैं तुसा जो मती वरी दस्से रा है, ते फिरी भी तुसा जो अपणी हाख्खियां बिच आँसुआं कने दस्सेया करदा है कि इदेय मते मणू हिन जिन्हेरे बारे बिच मैं तुसा जो घड़ी-घड़ी रोई-रोई करी दस्से रा है जिन्हेरी जिन्दगी जीणे रे तरिक्के कने मसीह री कुर्बानी रे मतलब जो बिगाड़ी दिंदे। 19अग्गे चली करी तिन्हेरा खातमा होई जाणा, तिन्हेरा परमेश्वर तिन्हेरे शारीरिक इच्छा हिन, से अपणी बेशर्मी री गल्लां पर घमंड करदे, ते से मणू सिर्फ तिन्हा दुनियावी चीजां जो करणे रे बारे बिच सोचदे रैहन्दे जे इस दुनिया रे मणू करदे। 20पर असी स्वर्ग रे मणू जित्ते असा रे छुटकारा दैणे वाले प्रभु यीशु मसीह रैहन्दे। ते असी बेसबरी कने तिन्हेरे हटणे रा उतालेपन कने इंतजार करेया करदे हिन। 21तिन्हा ने अपणी तिस्सी ताकत कने जिस कने तिन्हा ने हर चीज पर अपणा काबू करी लैणा, असा रे कमजोर इन्सानी शरीरां जो बदली करी तिन्हा जो अपणे महिमामय सरीर सांई बणाई दैणा।

Currently Selected:

फिलिप्पियों 3: CDHNT

Highlight

Compare

Copy