कुलुस्सियों 3
3
1अवे जां तुसा मसीह यीशु कने मुर्देयां बिच का फिरी जिन्दे कित्ते गे, तां तुसा स्वर्ग री चीजां री इच्छा रख्खो, ते जित्ते मसीह यीशु हिन, से परमेश्वर रे सबका जादा महिमामय जगाह् पर तिन्हेरे नेड़े बैठ्ठे रे हिन। 2दुनिया री चीजां पर नी, पर स्वर्ग री चीजां पर ध्यान लांदे रेयो। 3किजोकी तुसा तां अपणे पाप रे स्वभाव बिच मरी चुके रे हिन, अवे तुसा री जिन्दगी मसीह यीशु कने परमेश्वर बिच लुके री है। 4नौई जिन्दगी दैणे वाले मसीह यीशु ने जां वापिस हटणा जिन्हा ने नौई जिन्दगी दित्ते री है, तां तुसा भी तिन्हा कने होणा ते तिन्हेरी महिमा बिच हिस्सा लैणा।
पुराणी जिन्दगी ते नौई जिन्दगी
5इधेरे तांइ तुसा अप्पु जो अपणे पुराणे पापी स्वभाव रे काबू बिच मत पैणा देयो। मतलब कि, व्यभिचार, भिठ्ठे काम्म, बुरी तमन्ना, ते लालच जे मूर्ति पूजा करणे रे बराबर है। 6इन्हा बुरे कम्मां जो करणे री वजह कने ही परमेश्वर ने तिन्हा जो सजा दैणी। 7जां तुसा भी बुराई बिच जिन्दगी जिन्दे थिये तां तुसा भी ए सारे कम्म करदे थिये। 8पर अवे तुसा इन्हा सारी गल्लां जो, जिय्यां की गुस्से, रोष, दुश्मणी, बैर-भाव, बेजती करणा, गालीयां दैणा, छड्डी देयो। 9इक्क दूए कने झूठ मत बोल्लो, किजोकी तुसा ने अपणे पुराणे बुरे कम्मां जो छड्डी दित्ते रा है। 10तुसा अवे इक्क नौए मणू बणी गेरे हिन, ए नौआ स्वभाव अपणे बणाणे वाले परमेश्वर सांई बणदा जाया करदा है ते इस वजह कने तुसा परमेश्वर जो जादा ठीक तरिक्के कने समझणा। 11जिसेरा अंजाम ए होया कि तिस बिच कोई यूनानी, यहूदी, खतना वाले, बगैर खतना वाले, विदेशी, नौक्कर ते अजाद मणूआं बिच कोई फरक नी रेया, पर सिर्फ मसीह यीशु ही सारेयां बिच सबका जादा जरुरी हिन ते तुसा तिन्हेरे हिसाब कने जिन्दगी जियो। 12किजोकी परमेश्वर तुसा जो प्यार करदे ते तिन्हा ने तुसा जो अपणे पवित्र मणू बणने तांइ चुणी लित्ते रा है, इधेरे तांइ तुसा बड़ी करुणा, निमतापन, भलाई, कने सहनशीलता ते दया रा स्वभाव धारण करी लेयो। 13अगर तुसा का कुसकी पर इल्जाम लाणे री कोई वजह हो तां भी तुसा इक्क-दुजे री गल्लां जो सहन करी लेयो, इक्क-दूज्जे रे अपराध माफ करी देयो, जिय्यां की प्रभु ने भी तुसा रे अपराध माफ कित्ते, तिय्यां तुसा भी करो। 14सबका जादा जरुरी गल्ल ए है, कि तुसा इक्क-दूए कने भरपूर प्यार करो। इय्यां करणे कने तुसा पूरे तरिक्के कने इक्क-मन होई जाणा। 15अप्पु जो तिस सांती रे वस बिच करी देयो जे मसीह का मिलदी, किजोकी तुसा सारे ही इक्क ही सरीर रे हिस्सा हिन ते तुसा सारे इक्क-दूए कने सांती कने रैह्णे तांइ सद्दे गेरे हिन। 16जिय्यां कि तुसा इक्क दूए जो बड़ी समजदारी ते ज्ञान कने सिखांदे हिन, ते बड़ी शुकरगुज़ारी कने परमेश्वर तांइ भजन, स्तुतीगान ते आत्मिक गीत गाया करदे हिन, तिस कने कने ही मसीह रे वचनां जो अप्पु अंदर भरपुरी कने बसणा देयो। 17ते जे किच्छ भी तुसा करदे या बोलदे, से मसीह यीशु रे नां बिच करो, तिन्हेरे जरिये पिता परमेश्वर रा शुकर करदे रेयो।
मसीही परिवार तांइ नियम
18ओ लाड़ियों, तुसा अपणे लाड़ेयां रे अधीन रेयो, किजोकी मसीह यीशु रे विश्वासियां तांइ ए ही करणा सही है। 19ओ लाड़ेयों, तुसा भी अपणी लाड़ियां कने प्यार कने रेयो ते तिन्हा कने सख्ती मत करो। 20ओ बच्चेयों, अपणे मां-प्यो री हर इक्क गल्ल जो मन्नेया करो किजोकी प्रभु इसी गल्ल कने खुस हुंदे। 21ते सारे मां-प्यो सुणो, तुसा भी अपणे बच्चेयां जो तंग मत करो, इय्यां न हो कि तिन्हा रा होंसला टुटी जाए। 22ते गुलामों, सुणो, ईमानदारी कने अपणे दुनियावी मालिकां रे हुकमां जो मन्नेया करो, सिर्फ तिस बेल्ले ही नी जां से तुसा जो दिखदे होण, दिल री पूरी ईमानदारी ते प्रभु तांइ आदरमान कने करो। 23जे किच्छ तुसा करदे, से पूरे जी-जान कने करो, ते ए मन्नी करी कि तुसा लोक्कां तिकर नी पर प्रभु तांइ करेया करदे हिन। 24किजोकी परमेश्वर ने तुसा जो ईनाम दैणा, ते से ईनाम ए है कि तिन्हा ने तुसा जो तिस आशीष बिच हिस्सा दैणा जे तिन्हा ने अपणे लोक्कां तांइ स्वर्ग बिच तैयार कित्ते री है। याद रख्खो कि तुसा जिसेरी सेवा करदे से प्रभु यीशु मसीह हिन। 25किजोकी जे बुरा कम्म करदा रैहन्दा, परमेश्वर ने तिसजो सजा दैणी, ते परमेश्वर कुसकी रा भी पक्षपात नी करदे।
Currently Selected:
कुलुस्सियों 3: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
