तितस 3
3
मसीही च़ाल-च़लण
1तितस, ज़ेतरअ हई सके आपणैं सोभी विश्वासी का बझ़ैल़ै राज़ै अर तिन्नें कार-करिंदैओ अदर करनअ अर हाम्हां लागा तिन्नों हुकम मनणअ अर सोभी साबै लागा भलै कामां करना लै तैर रहणअ। 2कोहिए निंदा निं करनी, नां लोगा संघै हठल़दै लागणअ, तम्हैं करै तेभै बी सबर ज़ेभै लोग तिहअ करे ज़ेता लै तम्हैं राज्ज़ी निं हंदै। सोभी लोगा संघै डाहणअ हर बगत नरम बभार।
3हाम्हां लागा अह गल्ल आद डाहणीं कि एक बगत त इहअ बी कि हाम्हैं बी तै तिन्नां मणछा ज़िहै ऐडै ज़ुंण अज़ी मसीहा दी विश्वास निं करदै। हाम्हैं निं परमेशरे गल्ला मंदै तै। हाम्हैं बी तै धोखै दी पल़ै दै। हाम्हैं करा तै कबल्लै कदुष्ट काम करना लै आपणअ बगत ज़ांऐं अर हाम्हैं रहा तै तिहअ करदै लागी ज़ेता म्हारी देही च़ाहा ती। हाम्हैं बी च़ाहा तै तिन्नां गल्ला ज़ुंण होरी का आसा। हाम्हैं पज़ेरा तै होरीए दिलै आप्पू लै नफरत अर हाम्हैं करा तै एकी-दुजै संघै ज़ीद।
4पर तज़ी बी रहैऊअ म्हारै उद्धार करनै आल़ै परमेशरै हाम्हां का इहअ कि सह हाम्हां लै किहअ झ़ूरा अर किहअ झणैल़ू आसा। 5तेऊ किअ म्हारअ उद्धार। अह निं म्हारै धर्में कामां करी हुअ, पर अह हुअ इहअ करै कि तेऊ किई हाम्हां लै झींण। परमेशरै दैनी हाम्हां लै नऊंईं ज़िन्दगी। तेऊ धोऐ हाम्हैं भितरा का अर म्हारै पाप किऐ दूर, अर हाम्हैं बणाऐं तेऊ नऊंऐं साबै बभार करनै आल़ै। इहअ किअ तेऊ हाम्हां दी पबित्र आत्मां पाई।
6परमेशरै दैनी हाम्हां लै पबित्र आत्मां बाझ़ी मोलै कि सह हाम्हां दी बडी शगती संघै काम करे किल्हैकि ईशू मसीहा मूंअ म्हारै पापा लै म्हारअ उद्धार करनै आल़अ हणें तैणीं।#जोए. 2:28
7परमेशरै किअ इहअ तै कि सह आपणैं जशा करै हाम्हां आप्पू संघै धर्मीं बणांए अर हाम्हैं बी तेऊए लुआद बणी सके अर हाम्हां तेऊ संघै सदा लै ज़िन्दगी भेटे ज़ेते हाम्हैं आशा आसा।
8ईंयां गल्ला आसा शुची बोली दी ज़ुंण मंऐं ताल्है एभै बोली। हुंह च़ाहा इहअ कि तूह दैए विश्वासी लै इना गल्ला सखाऊंणा लै खास धैन। ज़ुंण परमेशरा दी विश्वास करा, तिंयां भलै काम करना लै हर बगत धैन डाहे ज़ुंण भलै अर सोभिए फाईदे आसा।
हठल़दै निं लागणअ
9पर नथोघी हठ, यहूदी दादा-बाबे लाम्मी बही पिछ़ू हठ, झ़गल़ै अर मोसा गूरे बधाना मनणे बारै हठल़णैं का रहै दूर। ईंयां एही गल्ला हआ बगत ज़ांऐं करनै आल़ी अर एता करै निं ताह किछ़ै फाईदअ हणअ। 10ज़ुंण टोली दी फूट पाआ तेऊ लै दै एकी बारी चतैनगी कि इहअ करनअ छ़ाड। ज़ै ताखा इहअ शुझिए कि सह आसा अज़ी बी तिहअ ई करदअ लागअ द, तेऊ लै दै दुजी बारी चतैनगी। तेखअ निं तेऊ दी होर बगत ज़ांऐं करी। 11ताखा जाणअ थोघ लागी कि इहै आसा सत्ता का कबाता पेठै दै, अर तिन्नें पाप करा ऐहा गल्ला पाक्की कि तिंयां आसा दोशी।
खिरी दैनअ द समाद
12मुंह छ़ाडणैं अरतीमास या तुखिकुस क्रेतै टापू लै ताह सेटा लै, मुंह सेटा लै करै निकूपुलिस नगरी तैणीं एछणें कोशिश, किल्हैकि मंऐं आसा इहअ सोठअ द कि मुंह काटणै हिंऊंदे धैल़ै तिधी। 13ज़ेभै जेनास नाओं बकील अर दुजअ अपूलोस नाओं तिन्नें हांढा दी आजू निखल़े, तिन्नां लै करै मज़त ज़ेतरी किई थारै भलै हई सका। तिन्नां लै दैऐ तिन्नें ज़रुरतीए सोभै गल्ला ताकि तिन्नें हांढा दी आजू किछ़ू गल्ले काम्मी नां पल़े। 14सिधअ इहअ ई निं, तूह रहअ विश्वासी लै एही शिक्षा दैंदअ लागी कि हाम्हां लागा हर भलै काम करनै ज़रूरी शिखल़णै ताकि सोभिए गरज़ा पूरी होए। ताकि तिंयां निक्की ज़िन्दगी नां ज़िऊए।
राज्ज़ी-खुशी
15इधी ज़ेतरै बी विश्वासी मुंह संघै आसा, तिंयां दैआ तम्हां लै राज्ज़ी-खुशी अर तिन्नां सोभी भाई-बैहणी लै बी दैऐ राज्ज़ी-खुशी ज़ुंण आपणअ संघी विश्वासी समझ़ी हाम्हां लै झ़ूरी करा।
हुंह करा प्राथणां कि परमेशरो जश लोल़ी तम्हां लै हुअ। एवमस्तू।
Currently Selected:
तितस 3: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
