Popular Bible Verses from तितस 3

Share

पर तज़ी बी रहैऊअ म्हारै उद्धार करनै आल़ै परमेशरै हाम्हां का इहअ कि सह हाम्हां लै किहअ झ़ूरा अर किहअ झणैल़ू आसा। तेऊ किअ म्हारअ उद्धार। अह निं म्हारै धर्में कामां करी हुअ, पर अह हुअ इहअ करै कि तेऊ किई हाम्हां लै झींण। परमेशरै दैनी हाम्हां लै नऊंईं ज़िन्दगी। तेऊ धोऐ हाम्हैं भितरा का अर म्हारै पाप किऐ दूर, अर हाम्हैं बणाऐं तेऊ नऊंऐं साबै बभार करनै आल़ै। इहअ किअ तेऊ हाम्हां दी पबित्र आत्मां पाई। परमेशरै दैनी हाम्हां लै पबित्र आत्मां बाझ़ी मोलै कि सह हाम्हां दी बडी शगती संघै काम करे किल्हैकि ईशू मसीहा मूंअ म्हारै पापा लै म्हारअ उद्धार करनै आल़अ हणें तैणीं। परमेशरै किअ इहअ तै कि सह आपणैं जशा करै हाम्हां आप्पू संघै धर्मीं बणांए अर हाम्हैं बी तेऊए लुआद बणी सके अर हाम्हां तेऊ संघै सदा लै ज़िन्दगी भेटे ज़ेते हाम्हैं आशा आसा।

तितस, ज़ेतरअ हई सके आपणैं सोभी विश्वासी का बझ़ैल़ै राज़ै अर तिन्‍नें कार-करिंदैओ अदर करनअ अर हाम्हां लागा तिन्‍नों हुकम मनणअ अर सोभी साबै लागा भलै कामां करना लै तैर रहणअ। कोहिए निंदा निं करनी, नां लोगा संघै हठल़दै लागणअ, तम्हैं करै तेभै बी सबर ज़ेभै लोग तिहअ करे ज़ेता लै तम्हैं राज्ज़ी निं हंदै। सोभी लोगा संघै डाहणअ हर बगत नरम बभार।

पर नथोघी हठ, यहूदी दादा-बाबे लाम्मी बही पिछ़ू हठ, झ़गल़ै अर मोसा गूरे बधाना मनणे बारै हठल़णैं का रहै दूर। ईंयां एही गल्‍ला हआ बगत ज़ांऐं करनै आल़ी अर एता करै निं ताह किछ़ै फाईदअ हणअ।

ज़ुंण टोली दी फूट पाआ तेऊ लै दै एकी बारी चतैनगी कि इहअ करनअ छ़ाड। ज़ै ताखा इहअ शुझिए कि सह आसा अज़ी बी तिहअ ई करदअ लागअ द, तेऊ लै दै दुजी बारी चतैनगी। तेखअ निं तेऊ दी होर बगत ज़ांऐं करी।