प्रकाशन 22

ज़िन्दगी दैणैं आल़अ पाणीं

1तेखअ रहैऊअ तेऊ स्वर्ग दूतै मुखा पाणीं तेता लै बोला तै ज़िन्दगी दैणैं आल़अ पाणीं। सह पाणीं त शिश्शै ज़िहअ आर-पार शुझणैं आल़अ। तेऊ पाणींए सोबल़ ती परमेशरे राज़गाद्दी का लागी दी ज़ुंण मिम्मूंए राज़गाद्दी बी आसा। 2नदी थिई नगरी मांझ़ा-मांझ़ी लागी दी बगदी अर तेते बाढा बाती तै बूट लागै दै ज़ुंण ज़िन्दगी दैआ। तिंयां थिऐ इहै बूट कि तेथ लागा तै सारी साला बारा रंगे फल़ अर हर भिन्‍नैं लागा तै होरी-होरी रंगे फल़। तेते पाच तै दुआई ज़ेता करै पृथूई दी संसारे सोभी लोगे बमारी हआ ती ठीक।#एज. 47:7

3तेखअ निं कधू फिटक हणअ अर परमेशर अर मिम्मूंए राज़गाद्दी हणीं तैहा नगरी। तेऊए दास करनी तेऊए च़ाकरी।#जक. 14:11

4परमेशर भाल़णअ तिन्‍नां मुंहां सम्हनै अर तिन्‍नें माथै हणअ तेऊओ नाअं लिखअ द। 5तेखअ निं कधि राच पल़णीं। ज़ुंण लोग तिधी रहा तिन्‍नां निं प्रैश्शै लै दीऐ ज़ाल़णे ज़रुरत आथी। नां तिन्‍नां प्रैश्शै लै सुरज़े ज़रुरत आथी। किल्हैकि तिधी आसा परमेशर आप्पै ज़ुंण लोगा लै प्रैश्शअ दैआ। तेखअ ज़ुंण लोग तिधी रहा तिन्‍नां करनअ जुगै-जुगै राज़।#ईशा. 60:19; दान. 7:27

6तेखअ बोलअ तेऊ स्वर्ग दूतै मुल्है इहअ, “ईंयां गल्‍ला ज़ुंण मंऐं ताखा रहैऊई अर खोज़ी, ईंयां आसा शुची अर ईंयां रहणीं हई। परमेशर बिधाता ज़ुंणी आपणीं आत्मां आपणैं सोभी गूरा लै दैनी, तेऊ ई किअ आपणैं स्वर्ग दूता लै हुकम कि सह इधी एछी तेऊए दासा का तिन्‍नां गल्‍ला रहैऊए ज़ुंण पाक्‍की आजू छ़ेक्‍कै आसा हणैं आल़ी।”#प्रका. 1:1

प्रभू भिई फिरी एछणअ

7ईशू बोला आपणैं सोभी लोगा “हेरा, हुंह आसा छ़ेक्‍कै एछणैं आल़अ, परमेशरा दैणीं तिन्‍नां लै बर्गत ज़ुंण ऐहा कताबा दी प्रगट किऐ दै समादा दी धैन दैए।”

8हुंह आसा सह ई जोहन्‍ना, ज़ुंणी ईंयां गल्‍ला शूणीं अर भाल़ी। ज़ांऊं मंऐं भाल़अ अर शूणअ, ज़ुंण सह स्वर्ग दूत मुखा इना गल्‍ला रहैऊआ त, हुंह पल़अ तेऊए च़रणैं माथै टेक्‍कणा लै उटअ। 9तेऊ बोलअ मुल्है इहअ, “भाल़, इहअ निं करै किल्हैकि हुंबी आसा ताह अर तेरै होरी संघी भाई अर परमेशरे गूरो अर ऐहा कताबे गल्‍ला मनणै आल़ैओ संघी च़ाकरी करनै आल़अ, परमेशर ई आसा एक्‍कै च़ाकरी करनै जोगी ज़हा सेटा माथअ लागा टेक्‍कणअ।”

10तेखअ बोलअ तेऊ मुंह सेटा इहअ, “ऐहा कताबा दी प्रगट किऐ दै समादा निं गुप्त डाही किल्हैकि इना गल्‍ला पूरी हणैंओ बगत गअ नेल़ एछी। 11ज़ुंण बूरी अर छ़ोतली गल्‍ला करा तिन्‍नां लागे बूरी छ़ोतली गल्‍ला करदै। तिहअ ई ज़ुंण बी भली अर पबित्र गल्‍ला करा तिन्‍नां दैऐ भली अर पबित्र गल्‍ला कबल्‍ली करनै।”

12प्रभू ईशू बोलअ इहअ, “भाल़ हुंह आसा छ़ेक्‍कै एछणैं आल़अ, अर हरेकी लै आसा मुखा तेऊए कामें साबै फल।#22:12 मोत्त. 16:27

13 “हुंह आसा आदी अर अंत आप्पै।”#22:13 ईशा. 44:6; 48:12

14परमेशरा दैणीं तिन्‍नां लै बर्गत ज़ुंण आत्मिक रुपा दी शुचै हणां लै आपणैं झिकल़ै धोआ, किल्हैकि तिन्‍नां भेटणअ नगरीए प्रऊल़ी बाती भितरा लै एछणेंओ हक। तिन्‍नां तेऊ बूटा का फल़ा खाणेंओ हक बी भेटणअ ज़ुंण ज़िन्दगी दैआ। 15पर बूरै करनै आल़ै, कुक्‍कर, ज़ादू करनै आल़ै, कंज़रै, हत्या करनै आल़ै, मुहुर्ती पूज़णै आल़ै अर हरेक झ़ुठअ च़ाहणैं आल़अ अर बोल़णैं आल़ै निं कधि नगरी दी डेऊई सकदै।

16 “मंऐं ईशू छ़ाडअ आपणअ स्वर्ग दूत इना गल्‍ला खोज़दअ तम्हां सेटा लै ज़ुंण तम्हैं टोली दी परमेशरे लोग आसा। हुंह आसा राज़ै दाबेदे पोस्ती दी आजू लुआद, हुंह आसा भैणूं तारै ज़िहअ।”#22:16 ईशा. 11:1

17परमेशरे आत्मां अर मिम्मूंए लाल़ी बोला ईशू लै, “ताह हुअ एछणअ।” ज़ुंण बी इना गल्‍ला शूणां सह बी लऐ बोली, “एछ!” तिंयां सोभै ज़ुंण बी नचिशै होए सह झुटै तेऊ पाणीं मुफ्त ज़ुंण ज़िन्दगी दैआ।#ईशा. 55:1

नचोल़

18हुंह जोहन्‍ना दैआ तिन्‍नां सोभी लै चतैनगी ज़ुंण मेरी ऐहा कताबा दी प्रगट किई दी गल्‍ला शूणां, ज़ुंण मंऐं पैहलै ई आसा लिखी दी, ज़ै कुंण आपणीं बाखा एथ किज़ै ज़ोल़े, परमेशरा दैणीं तिन्‍नां लै सारी खरी पाई सज़ा ज़ुंण ऐहा कताबा दी आसा लिखी दी।#बधा. 12:32

19पर ज़ै कुंण ऐहा कताबा दी प्रगट किई दी गल्‍ला का किज़ै घट करे, परमेशरा करनअ तेऊ ज़िन्दगी दैणैं आल़ै बूटा का तेऊओ हेस्सअ दूर ज़ुंण पबित्र नगरी आसा, ज़ेते बारै ऐहा कताबा दी आसा लिखअ द।#बधा. 4:2; भज. 69:28

20ज़ुंण इहअ बोला कि ईंयां गल्‍ला आसा शुची, सह ईशू बोला इहअ, “हाँ हुंह आसा छ़ेक्‍कै एछणैं आल़अ!” हुंह जोहन्‍ना बोला बापस, “एवमस्तू। हे प्रभू ईशू छ़ेक्‍कै एछ।”

21हुंह करा परमेशरा का अरज़ कि म्हारै प्रभू ईशूए झींण लोल़ी सदा तम्हां सोभी लै हुई। एवमस्तू।

Currently Selected:

प्रकाशन 22: OSJ

Highlight

Copy

Compare