प्रकाशन 21

नऊंअ सरग अर नऊंईं पृथूई

1तेखअ भाल़अ मंऐं नऊंअ सरग अर नऊंईं पृथूई किल्हैकि पैहलअ सरग अर पृथूई हुई खतम अर समुंदर बी निं रहअ।#ईशा. 66:22

2तेखअ भाल़ी मंऐं पबित्र नगरी एरुशलेम स्वर्गा का परमेशरा सेटा का होथदी, अर सह थिई लाल़ी ज़ेही सज़ाऊई दी, ज़ुंण आपणैं लाल़ै लै हार शंगार किई दी हआ। 3तेखअ शूणअ मंऐं राज़गाद्दी सेटा का एक ज़ोरै इहअ बोल्दअ, “भाल़, एभा पोर्ही बस्सणअ परमेशर मणछा जैंदरी, अर तेऊ करनअ तिन्‍नां मांझ़ै बसेरअ, अर तिंयां हणैं तेऊए परज़ा अर परमेशरा रहणअ आप्पू ई तिन्‍नां संघै अर सह ई हणअ तिन्‍नों परमेशर।#लेब. 26:11-12; एज. 37:27

4“तेऊ टुशणैं तिन्‍नें आछिए आशू, अर तेखअ निं कधि मौत एछणी अर नां शोग अर नां लेरा-पकारा अर नां दाह दुख। पैहलै संसारै ज़ुंण गल्‍ला ती, तिंयां सोभै गल्‍ला हणीं खतम।”#ईशा. 25:8

5ज़ुंण राज़गाद्दी प्रैंदै त बेठअ द, तेऊ बोलअ इहअ, “भाल़, मंऐं लाई सोभै गल्‍ला नऊंईं करी।” तेखअ बोलअ तेऊ इहअ, “इना गल्‍ला लिख, किल्हैकि ईंयां बैण आसा विश्वास करनै जोगी अर शुचै।”#ईशा. 42:9

6तेखअ बोलअ तेऊ मुल्है इहअ, “सोभै गल्‍ला गई पूरी हई, आदी अर अंत आप्पै। ज़ुंण बी नचिशअ होए मुंह दैणअ तैहा सोबल़ा का मुफ्त झुटणा लै ज़ुंण सदा रहणैं आल़ी ज़िन्दगी दैआ। 7ज़ुंण ज़िते सह ई हणअ आजू तिन्‍नां सोभी च़िज़ो मालक अर हुंह हणअ तिन्‍नों परमेशर अर सह हणअ मेरअ शोहरू।

8“पर ज़ुंण मुंह दी विश्वास निं डाहे, तिंयां पाणै ज़ोरा-ज़ोरी तेऊ समुंदरै ज़ुंण गंधका करै ज़ल़ा, सह आसा दुजी मौत। अह इहअ नतिज़अ हणअ तिन्‍नां लोगो बी ज़ुंण होरी लोगा सम्हनै मेरअ नाअं लणैं का डरा, ज़ुंण कदुष्ट काम करा, ज़ुंण होरी मारी पाआ, ज़ुंण कंज़रैई करा, ज़ुंण ज़ादू करा, मुहुर्ती पूज़णै आल़ै अर झ़ुठअ बोला।”#1 करि. 6:9-10; इफि. 5:5

नऊंअ एरुशलेम

9तेखअ ज़हा स्वर्ग दूता का तिंयां साता खरी करै भरी दी सात लोहदी थिई, तिन्‍नां मांझ़ै बोलअ एकी ज़ण्हैं मुंह सेटा एछी, “ओर्ही एछ, मुंह रहैऊंणीं ताखा सह बेटल़ी मतलब ज़ुंण मिम्मूंए लाल़ी आसा हणैं आल़ी।”

10परमेशरे आत्मां किअ हुंह आपणैं बशै अर तेखअ निंयं हुंह स्वर्ग दूतै एकी उछ़टी धारा प्रैंदा लै अर पबित्र नगरी एरुशलेम रहैऊई स्वर्गै परमेशरा सेटा का होथदी। 11नगरी ती तेऊ झ़ामणा करै च़मकदी लागी ज़ुंण परमेशरा का निखल़ा त अर तेते च़मक ती किम्मती पात्थर यशब अर आर-पार शुझदै शिश्शै ज़ेही साफ।

12नगरी फेर ती बेघै बडी उछ़टी दुआल दैनी दी, अर तेते ती बारा प्रऊल़ी अर तिन्‍नां बारा प्रऊल़ी दी तै बारा स्वर्ग दूत। तिन्‍नां प्रऊल़ी दी तै इज़राईलीए बारा गोत्रे नाअं लिखै दै। 13नगरी दी थिई पुर्बा बाखा, पछ़म, उतर अर दखण सोभी दिशा बाखा चअन-चअन प्रऊल़ी।

14नगरीए दुआल ती बारा आथरी, बडी-बडी ज़ानीं प्रैंदै च़िणीं दी। तिन्‍नां बारा ज़ानीं दी तै मिम्मूंए बारा शधाणूंए नाअं लिखै दै। 15ज़ुंण स्वर्ग दूत मुंह संघै गल्‍ला करदअ त लागअ द, तेऊ का थिई नगरी, प्रऊल़ी अर तैहा दुआली नापणे एक सुन्‍नें गज़।#जक. 2:1

16सह नगरी ती च़कोर बस्सी दी अर सह थिई लाम्मी अर बिरली बराबर। तेऊ स्वर्ग दूतै नापी तैहा गज़ा करै, सह नगरी निखल़ी 1,400 मील सह थिई लाम्मी, बिरली अर उछ़टी बराबर। 17एता बाद नापी तेऊ स्वर्ग दूतै सह दुआल कि केतरी उछ़टी आसा, तेऊ नापी सह तेऊ साबै ज़िहै मणछ नापा, सह दुआल निखल़ी 144 हाथ।

18सह नगरीए दुआल ती किम्मती पात्थर यशब, अर नगरी ती च़ोखै सुन्‍नैं करै बणाईं दी शिश्शै ज़ेही च़मकिल्‍ली। 19तैहा नगरीए दुआलीए आथरी तै सोभी रंगे किम्मती पात्थरा करै बणाऐं दै। पैहली आथरी ती यशब, दुजी, नीलमणीं, चिऊथी लालड़ी अर च़ौथी मरकते।#ईशा. 54:11-12 20पांज़ूई गोमेदक, छ़ऊई मानिक, सातुई पीतमणीं, आठुई पेरोज़ अर नहुई पुखराज़, दसुई लहसनिए, गैर्हूई धूम्रकांत अर बार्हूई याकूते। 21बारा प्रऊल़ी ती बारा मोतीए, एक-एक प्रऊल़ ती एकी-एकी मणीं करै बणाईं दी अर नगरीए सल़क ती शिश्शै ज़ेही साफ च़ोखै सुन्‍नैं करै बणाईं दी।

22मंऐं निं तैहा नगरी एक बी भबन भाल़अ किल्हैकि सर्वशक्तिमान परमेशर अर मिम्मूं आसा आप्पै तैहा नगरी दी। तैही निं तिधी भबने ज़रुरत आथी। 23तैहा नगरी निं सुरज़ अर ज़ोथो ज़ाथी किछ़ काम आथी, किल्हैकि परमेशरे झ़ामणा करै आसा तेथ प्रैश्शअ लागअ द हंदअ, अर मिम्मूं आसा तेतो दीअ।#ईशा. 60:19

24तैहा नगरीए झ़ामणा करै हआ संसारे सोभी लोगा लै प्रैश्शअ अर पृथूईए राज़ै आणनीं आपणीं ज़ैदात तैहा नगरी लै। 25तैहा नगरीए प्रऊल़ी हआ कबल्‍ली घुआल़ी किल्हैकि तिधी निं कधि राच पल़दी।#ईशा. 60:11; जक. 14:7

26संसारे सोभी लोगा आणनीं शोभली च़िज़ा अर लोगे ज़ैदात तैहा नगरी लै। 27तैहा नगरी दी निं कोई बी छ़ोतली च़िज़ा अर च़िल़्हखरै काम करनै आल़अ या झ़ुठ बोल़णैं आल़अ केऊ बी साबै डेऊई सकदअ। पर सिधै तिंयां लोग सका तेथ डेऊई, ज़सरै नाअं मिम्मूं ज़िन्दगीए कताबा दी आसा लिखै दै। तैहा कताबा दी आसा तिधे तिन्‍नां लोगे नाअं ज़हा का सदा रहणैं आल़ी ज़िन्दगी आसा।#ईशा. 52:1

Currently Selected:

प्रकाशन 21: OSJ

Highlight

Copy

Compare