भज़न 68
68
बिधाता हेरनअ जुध ज़िती
गाज़ै-बाज़ै आल़ेए सैणैं लै राज़ै दाबेदे गिह
1हे बिधाता, ऐबै कर तूह किज़ै! इना दुशमणा खद्रेल़ पोर्ही,
ईंयां दुशमण ज़ुंण ताखा नफरत करा, ईंयां लोल़ी ज़िहै आऐ तिहै ई बापस ठुर्है।
2इना कदुष्टा फर्ल़ाऊ धूँआं ज़िहै!
ताह नेल़ एछी लोल़ी ईंयां इहै गल़ै
ज़िहअ आगीए सेका करै घिऊ गल़ा।
3पर धर्मीं मणछ लोल़ी ताह सेटा राज्ज़ी-मौज़ी रहै,
तिन्नैं लोल़ी हास्सदी खेल्हदी तेरी ज़ै-ज़ैकार किई।
4ए म्हारै परमेशर, तूह आसा सह ई ज़ुंण बादल़ा प्रैंदै शुंआर हआ,
ताह नाअं आसा बिधाता,
हाम्हैं मनाऊंआं तेरी खुशी, संघा करा तेरी ज़ै-ज़ैकार।
5परमेशर, तूह रहा आपणैं पबित्र घअरै#68:5 पबित्र घअरै स्वर्गै ,
तूह करा छ़ुटै-मुक्कै दै अर बिधबा बेटल़ीओ नसाफ।
6ज़ुंण कल्ही आसा, तूह बसाऊआ तिन्नों घअर,
कैद किऐ दै मणछा करा तूह आज़ाद।
पर द्रोही लोगा लागणअ शुन्नैं रेगीस्तानै रहणअ।
7ज़ांऊं तंऐं आपणीं परज़ा आज़ाद किई अर
उज़र रेगीस्ताना बाती आजू नढैऊऐ,
8पृथूई दी हुई ज़ाज़री अर
उझै का छ़ुटअ सरग,
किल्हैकि तूह इज़राईलीओ परमेशर बिधाता ज़ुंण सीनाई धारा प्रैंदा का राज़ करा,
तेरै डरै छ़ुटी तिन्नां काम्मणीं।
9हे बिधाता, तंऐं दैनअ सरगा का रज्ज़ी पाणीं,
तेता करै किई तंऐं आपणीं ज़ैगा भिई हरी-भरी।
10तेरी टोली लागी खिरी तिधी रहंदी बस्सदी,
तंऐं दैनी तिन्नां लै खुल्है दिलै सोभै गल्ला।
11तंऐं किअ हुकम अर
बेटल़ीए छ़ुंढे-छ़ुंढ लागी तेरै महान कामें बारै सोभी का इहअ खोज़दी,
12“दुशमण राज़ै ठुर्है डरै आपणीं-आपणीं सैना संघी!”
बेटल़ी ज़ुंण जुधे बगती घअरै हआ, तिन्नैं बी बांडी लुटी दी माया:
13च़ंदी करै महल़ै दै कबूतर ज़ेते फैंख च़ोखै सुन्नें आसा तै!
तैबी बी किल्है आसा तम्हां मांझ़ै कई ज़ण्हैं जुधे बगती भडैल़ै रहै दै लुक्की?
14परमेशर बिधाता ज़हा का सारअ बल आसा, ज़ांऊं तेऊ राज़ै खद्रेल़ै,
सह पल़अ ज़िहअ सलमोन ज़ोता प्रैंदै हिंअं।
15बाशान धार आसा महान
तेथ आसा कई उछ़टी-उछ़टी ज़ोता।
16ज़हा धारा बिधाता आपणअ बसेरअ किअ
अर ज़िधी तेऊ सदा रहणअ,
तेता भाल़ी होरी धारा किल्है लागी ज़ल़ण हंदी?
17ज़ेभै मालक बिधाता सीनाई पबित्र धारा आपणीं परज़ा लै प्रगट हणअ,
तेऊ संघै हणैं हज़ारो रथ।
18ज़ेभै बिधाता उझै उछ़टै लै डेऊअ,
तेऊ निंणै आप्पू संघै कई कैदी मणछ बी,
तेऊ ढाकणीं हठू मणछे भैंट बी।
बिधाता रहणअ सदा लै तिधी।
19ए म्हारै मालक, हाम्हां करनी तेरी ज़ै-ज़ैकार!
तूह रहा हाम्हां लै हर धैल़ै झणैल़ू,
परमेशर, तंऐं आसा हाम्हैं बच़ाऊई डाहै दै।
20हे बिधाता, म्हारै मालक, तूह करा कबल्ली म्हारी फाज़त,
हे परमेशर, तंऐं आसा हाम्हैं मरनै का बच़ाऊई डाहै दै।
21ए म्हारै बिधाता, ज़ुंण आपणैं पापी कामां नांईं छ़ाडदै,
तिन्नें फाल़णीं ताह ताल़ू-तुंबी।
22हे मेरै मालक, तंऐं आसा आप्पै इहअ बोलअ द, “मुंह आणनैं थारै दुशमण बाशान धारा का बापस फरेऊई,
तिंयां च़ाऐ समुंदरे थाल्लै किल्है निं होए पुजै दै, तिधा का बी पजैल़णैं मुंह तिंयां बापस!
23ताकि तम्हैं तिन्नें लोहू जैंदरी आपणीं गंईं डाहे अर
थारै कुक्कर तिन्नों मास्स रज्ज़ी खाए।”
24हे बिधाता, तेरअ फेर निखल़दअ भाल़अ सोभी,
परमेशर तूह ज़ुंण म्हारअ राज़अ आसा, तेरअ फेर हुअ तेरी पबित्र ज़ैगा पूरअ।
25गिहा लाणैं आल़ै लागै आजू हांढदै अर बाज़णैं आल़ै पिछ़ू,
तिन्नां मांझ़ै थिई कुंआरी शोहरी डफली बाज़दी लागी दी हांढदी।
26तिंयां ती इज़राईली मणछा लै इहअ बोल्दी लागी दी,
“ज़सरअ मूल़ इज़राईल आसा, तिंयां करा बिधाते ज़ै-ज़ैकार!”
27बिन्यामीन ज़ुंण सोभी का होछ़अ गोत्र आसा, सह हांढा सोभी का आजू,
तेता बाद यहूदा गोत्रो सैणअ आपणैं दला संघै।
तिन्नां पिछ़ू ज़बलून अर नप्ताली गोत्रे सैणैं आपणैं-आपणैं दला संघै।
28हे बिधाता, आपणअ बल रहैऊ,
ज़िहअ तंऐं पैहलै बी आपणैं तेऊ भबना का
29बल रहैऊअ ज़ुंण एरुशलेम नगरी आसा
अर ज़िधी ताल्है पृथूईए राज़ै भैंट पजैल़णीं।
30मिसर ज़ुंण बणें बडै ज़ीबा ज़िहअ नगाल़ै जैंदरी आसा, तेऊ दै नैरनीं,
तेऊ देशा दै नैरनीं ज़ेते सैणैं अर लोग बणें म्हैशै ज़िहै आसा!
तिंयां लोल़ी च़ंदी हाथै भैंट ढाकी धरनीं पेटा करै हांढी ताह सेटा माथअ टेक्कअ।
ज़ुंण देश झ़गल़ै लै झ़ूरा, तिन्नां खद्रेल़ ओर्ही-पोर्ही।
31मिसर देशा का एछणैं राज़दूत,
कूश देशे लोगो परमेशरे ज़ै-ज़ैकार करना लै करा बाह खल़ी।
32पृथूई दी देशै-देशै राज़ करनै आल़ै राज़ैओ,
तम्हैं सोभै बोला सोभिए मालक बिधाते भज़न।
33ज़ुंण बिधाता सोभी सरगा प्रैंदी पोर्ही हांढा,
तेऊए बैण शूणां, सह आसा किज़ै बोल्दअ लागअ द।
34परमेशरे ज़ोरे बारै खोज़ा सोभी का!
इज़राईली जैंदरी हआ तेऊओ अदर अर
सारै भ्रमंडै करा सह राज़।
35हे बिधाता, तेरी पबित्र ज़ैगा लोल़ी तेरी डअर रही,
तूह ज़ुंण हाम्हां इज़राईलीओ परमेशर आसा,
तूह दैआ आपणीं परज़ा लै बल अर तागत।
परमेशरे लोल़ी सदा ज़ै-ज़ैकार हुई।
Currently Selected:
भज़न 68: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
