भज़न 39
39
पाप माफी लै अरज़
जदूतून, गाज़ै-बाज़ै आल़ेए सैणैं लै राज़ै दाबेदो भज़न
1हुंह लागा आप्पू इहअ सोठदअ, “मुंह डाहणअ आपणअ खैल कि हुंह किज़ै करा,
मुंह निं आपणीं ज़िभा पाप करनै दैणअ।”
ज़ै कदुष्ट मणछ बी मेरै मुंहां सम्हनै होए,
मुंह निं तिन्नां लै बी किछ़ बोल़णअ।
2हुंह रहअ च़ुप्पी मंऐं निं एक बैण बी बोलअ,
मंऐं निं भलाईए गल्ल बी बोली!
पर मुंह पल़ी होर बी खास्सी दाह ज़िरनी,
3मेरै दिलै हआ ती भितरी आग लागी दी।
सोठी-सोठी हआ तै मेरै होर बी बूरै हाल,
तेखअ निं मेरै इहअ बोल़णैं बाझ़ी रहूअ,
4“हे बिधाता, ज़ीबाण, तूह डाह मुखा खोज़ी कि हुंह कधू तैणीं ज़िऊंणअ?
ऐबै मेरी आजू केतरी अमर रही?
मेरी मौत केभै हणीं?”
5तंऐं भाल़ मुल्है केही धख ज़ेही अमर आसा दैनी दी!
ज़ुंण ज़िन्दगी हुंह ज़िऊआ, सह आसा ताल्है धख ज़ेही।
मणछे ज़िन्दगी आसा बागरीए एकी झ़लारै ज़ेही अर
6उडदी छ़ैल्ली ज़ेही।
हाम्हैं हआ बृथा मैन्थ करदै लागै दै,
हाम्हैं डाहा ज़ैदात कठा करी,
पर इहअ थोघ निं हंदअ कि आजू अह कहा भेटणीं!
7हे मेरै मालक, तै हुंह किज़ै न्हैल़ूं?
आशा डाहा हुंह तेरी।
8तूह बच़ाऊ मुंह मेरै सोभी पापा का,
ऐडै मणछा निं मेरअ सुहांग दैई करनै।
9हुंह रहूं काल्लै ज़िहअ च़ुप्पी, हुंह निं एक बैण बी बोल्दअ,
तंऐं ई डाहअ हुंह एही दाह ज़िरदअ लाई।
10ऐबै कर तूह मुखा ऐहा आफ़ता दूर,
तेरै हाथे मारा करै च़ाल्लअ मेरअ शाह निखल़ी।
11तूह नैरा हाम्हां म्हारै पापा लै सज़ा दैई,
ज़ेता लै हाम्हैं मणछ झ़ूरा, तेता करा तूह सूल़ी ज़िहअ सुलै-सुलै खतम।
हाम्हैं आसा ई बागरीए एकी झ़लारै ज़िहै।
12हे बिधाता, मेरी लेर-पकार शुण,
हुंह पाआ ताह सेटा पकार,
मेरी लेरा शूणीं कर मेरी मज़त।
हुंह आसा तेरै घअरै परदेसी मसाफर,
ज़िहै मुखा एकी ज़मानै मेरै दाद-बाब थिऐ।#इब्रा. 11:13
13मेरै मरनै का आजी दै मुंह कल्ही रहणैं,
तै झ़ाणीं मुंह धख खुशी भेटे!
Currently Selected:
भज़न 39: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
