भज़न 32
32
माफी छ़ाडणा लै अरज़
राज़ै दाबेदो खास भज़न
1तिन्नां लै भाल़ केही बर्गत हुई,
ज़सरै पाप बिधाता माफ किऐ अर दोश दूर किऐ।
2तिन्नां मणछा लै आसा बर्गत ज़हा लै बिधाता पाप करनैओ दोश निं काढअ
अर ज़सरै दिलै किछ़ै कपट निं आथी।
3ज़ेभै तैणीं मंऐं अह गल्ल निं मनी कि मंऐं आसा पाप किऐ दै,
हुंह हआ त सारी-सारी धैल़ी धकदअ लागअ द अर मेरै गल़ै हाडकै बी।
4हे बिधाता, तूह दैआ त धैल़-राच मुल्है सज़ा,
मेरै हुऐ तै ज़ोर-ज़ाहण ई इहै खतम
ज़िहै गरमीं करै बाच शुक्का।
5खिरी मनअ मंऐं ताह सेटा कि मंऐं किऐ पाप,
मंऐं निं ताह सेटा किछ़ै गलती च़ोरी डाही।
मंऐं सोठअ इहअ कि मुंह मनणी ताह सेटा सोभै गलती,
तंऐं किऐ तेखअ मेरै सारै पाप माफ।
6तैही लागा तेरै सोभी लोगा बगत रहंदी ताह सेटा अरज़ करनी,
ताकि ज़ेभै आफ़तो बडअ दरैअ एछे,
तेभै निं सह तिन्नां सेटा पुजणअ कि तिन्नां घर्होहल़ी सके।
7मेरै लुक्की रहणें ज़ैगा आसा तूह ई,
ताह डाहणअ हुंह आफ़ता का बच़ाऊई।
ज़ुंण ज़ीत तंऐं मुल्है दैनी,
मुंह बोल़णीं तेते ज़ोरै-ज़ोरै गिहा।
8हे बिधाता, तूह बोला मुल्है इहअ,
“हुंह खोज़ूं ताखा तैहा बाता ज़ेथ ताह हांढणअ लागा,
हुंह रहूं ताल्है सलाह दैंदअ अर ताह भाल़अ लागी।
9तम्हैं निं घोल़ै अर खच़रा ज़िहै रही ज़हा समझ़ निं हंदी,
तिंयां लागा मुर्क अर नकेल लाई काबू करनै,
नांईं ता ठुर्हा तिंयां कज़ेस्सी।”
10कदुष्ट मणछा लागणीं खास्सी दाह ज़िरनी,
पर ज़ुंण बिधाता दी भरोस्सअ डाहा,
तेऊ लै करनी बिधाता झींण।
11ज़ुंण धर्मीं मणछ आसा तम्हैं मनाऊंआं खुशी कि
तम्हैं सोभै आसा बिधाता संघै,
भोल़ै मणछ करा ज़ोरै-ज़ोरै तेऊए ज़ै-ज़ैकार।
Currently Selected:
भज़न 32: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
