भज़न 21
21
बिधाता लै शूकर
गाज़ै-बाज़ै आल़ेए सैणैं लै राज़ै दाबेदो भज़न
1हे बिधाता, तेरअ महान बल दैआ राज़ै बी खुश करी,
सह मनाऊंआं खुशी किल्हैकि तूह दैआ तेऊ लै ज़ीत।
2तूह दैआ तेऊ लै तिहअ ज़िहअ तेऊओ दिल च़ाहा,
तेरै निं तेऊ लै कधि नांह हंदी।
3तूह एछा तेऊ सेटा लै बर्गत लई,
संघा लाआ तेऊए मुंडै तूह सुन्नेंओ मुगट।
4सह मांगा ताखा ज़िन्दगी अर
तूह दैआ तेऊ लै जुगा-जुगा लै लाम्मी अमर।
5ताह करै हुअ तेऊओ सारै दी अदर,
तंऐं दैनी तेऊ लै ज़ीत अर तेता करै हुअ सह मशूर।
6तूह दैआ तेऊ लै सदा बर्गत अर
सह हआ खुशी दी मगन कि तूह रहा तेऊ संघै।
7राज़अ करा ताह परम प्रधान परमेशर बिधाता दी भरोस्सअ,
तूह झ़ूरा सदा तेऊ लै अर
सह रहा सदा अटल़।
8ताह बिधाते महान बला करै ढाकणैं तेऊ आपणैं सारै दुशमण,
ज़ुंण तेऊ संघै ज़ीद डाहा तै।
9ज़ांऊं तूह आप्पै प्रगट हणअ,
तिंयां दुशमण दझ़णैं ज़िहै आगीए बडै कूंडा दी!
ताह बिधाता काढणअ तिन्नां प्रैंदै आपणअ सारअ रोश्श अर
तिंयां हणैं आगी जैंदरी दझ़ी खतम।
10तेखअ निं पृथूई दी तिन्नें आद-लुआद बी बच़णीं अर
ताह निं मणछा जैंदरी तिन्नों नाअं-नशाण डाहणअ।
11तेरी हान्नी करना लै तिन्नें ज़ेतरी बी बिक्री किई ती,
तिंयां निं एक बी सफल हणीं।
12ताह छ़ाडणैं तिन्नां बाखा आपणैं कतीर अर
तिंयां ठुर्हनै च़ऊ पाओऐ।
13हे बिधाता, तेरअ बल आसा महान,
हाम्हां करनी गिहा बोली-बोली तेरै महान ज़ोरे ज़ै-ज़ैकार।
Currently Selected:
भज़न 21: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
