भज़न 2
2
राज़अ ज़ुंण बिधाता छ़ांटअ
1देशा-देशे लोग किल्है आसा रोश्शै लाल-पिंऊंल़ै हुऐ दै?#2:1 ज़ुंण परमेशरा नांईं मंदै
तिन्नैं किल्है लाअ फज़ूल गल्ला सोठणा लै आपणअ बगत ज़ांऐं करी?#शधा. 4:25,26
2धरतीए सोभी राज़ै किअ बिधाता
अर तेऊ राज़ै लै एक्कअ ज़ुंण परमेशरै आप्पै आसा छ़ांटअ द,
संघा लागै आप्पू मांझ़ै इहअ बोल्दै,
3“तेऊए बधाना का हणअ हाम्हां आज़ाद
अर हाम्हां निं तेऊए बशै रहणअ!”
4म्हारअ मालक बिधाता ज़ुंण स्वर्गै आपणीं राज़गाद्दी दी आसा बेठअ द,
तेऊ फुक्कणी तिन्नां लै हास्सी अर तेऊ करनअ तिन्नां देशो सुहांग।
5बिधाता हणअ तिन्नां लै रोश्शै लाल-पिंऊंल़अ,
अर तिन्नां पल़णअ हैल़अ ज़ांऊं बिधाता रोश्शै तिन्नां लै इहअ बोल़णअ,
6“ज़ुंण राज़अ मंऐं छ़ांटअ,
सह बशैल़अ मंऐं आपणीं पबित्र धारा सियोने राज़गाद्दी दी।”
7राज़अ बोला इहअ, “मुंह खोज़णीं तिंयां गल्ला सोभी का
ज़ुंण मंऐं शूणअ कि बिधाता किअ इहअ हुकम,
‘तूह आसा मेरअ पूत किल्हैकि आझ़ बणअ हुंह तेरअ बाब।#शधा. 13:33; इब्रा. 1:5; 5:5
8तूह मुखा मांगी ता भाल़, मुंह बणाणैं देशा-देशे लोग तेरी ज़ैदात
अर सारी धरतीओ मालक हणअ तूह।
9ताह राट्टणै तिंयां लोहे शोठै करै
अर ताह करनै तिंयां माट्टे भांडै ज़िहै फाल़ी करै शरबूर।’”#प्रका. 2:26,27; 12:5; 19:15
10देशा-देशे राज़ैओ, कबुधी निं हआ,
संसारै राज़ करनै आल़ैओ, ऐहा चतैनगी दी दैआ धैन,
11बिधाते डरा हेठै रही करा तेऊए च़ाकरी अर काम्बदी-काम्बदी करा तेऊए ज़ै-ज़ैकार।
12तेऊए शोहरू सेटा टेक्का माथअ,
इहअ निं हआ कि बिधाता
रोश्शै लाल-पिंऊंल़अ हई तम्हां नच़ानक खतम करे।
सह करा तेऊए फाज़त अर तिन्नां लै दैआ बर्गत ज़ुंण तेऊ सेटा शरण लआ।
Currently Selected:
भज़न 2: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
