भज़न 116
116
बिधातो करा शूकर, तेऊ बच़ाऊऐ तम्हैं मरनै का
1हे बिधाता, हुंह झ़ूरा ताल्है खास्सअ।
किल्हैकि तूह शूणां मेरी लेर-पकार।
2ज़ेभै बी हुंह अरज़ करा, तूह हेरा मेरी शूणीं,
मुंह रहणअ सारी ज़िन्दगी ताह सेटा अरज़ करदै लागी।
3मौतै गोटअ त हुंह फेरा-फेर,
मरने डरै हेरअ त हुंह पठी घेप्पी,
हुंह त डअर अर खरी दी पल़अ द।
4तेखअ किई मंऐं अरज़,
“हे बिधाता, ज़ीबाण, तूह बच़ाऊ मुंह मरनै का।”
5हे बिधाता, तूह आसा भलअ अर झणैल़ू,
ए म्हारै परमेशर, तूह करा खास्सी झींण।
6तूह करा भोल़ै मणछे फाज़त,
ज़ेभै मुंह आफ़त पल़ी ती, तेभै बच़ाऊअ हुंह तंऐं ई।
7हुंह बोला आपणैं दिलै हैअ डाह,
किल्हैकि बिधाता आसा मुल्है भलअ।
8हे बिधाता, तंऐं बच़ाऊअ हुंह मरनै का,
तंऐं टुशै मेरी आछी का आशू अर
तंऐं निं मुल्है ठोहल़ दैनी लागणै।
9मुंह रहणअ आपणीं ज़िऊंदी ज़िता,
ताह बाखा हांढदै लागी।
10मंऐं डाहअ तेभै बी ताह प्रैंदै विश्वास ज़ेभै मंऐं इहअ बोलअ,
“हुंह हुअ पठी बरैबाद।”
11ज़ांऊं मुंह खास्सअ हैल़अ बी फिरा, मंऐं बोलअ इहअ,
“सोभै मणछ आसा शल़ैघी।”
12बिधाता मुल्है ज़ेतरी भलाई किई,
तेते बदल़ै हुंह तेऊ लै किज़ै सका दैई?
13मुंह दैणअ ताह बिधाता लै दाखे रसो अर्घअ,
मुंह करनअ तेरअ शूकर कि तंऐं बच़ाऊअ हुंह।
14ज़ेभै तेरै लोगो झाल़अ होए,
तेभै करनी मुंह सोभी नदरी तेरी मानत पूरी।
15ज़ै तेरअ एक बी भगत मरे,
ताह हआ तेऊओ खास्सअ दुख।
16हे बिधाता, हुंह आसा तेरअ दास,
ज़ेही मेरी ईज तेरी च़ाकरी करा ती, हुंह करा तेही,
तंऐं बच़ाऊअ हुंह मरनै का।
17मुंह करनअ तेरअ शूकर करना लै बल़ीदान,
मुंह करनी ताह सेटा प्राथणां।
18-19ज़ेभै तेरी पबित्र ज़ैगा एरुशलेम तेरी परज़ा झाल़अ करे,
तेभै करनी मुंह सोभी नदरी तेरी मानत पूरी
ज़ुंण मंऐं ताल्है मनी ती।
बिधाते करा ज़ै-ज़ैकार।
Currently Selected:
भज़न 116: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
