गणांई 14
14
इज़राईली हुऐ मोसे द्रोही
1तिन्नां बारा ज़ण्हैं ज़ुंण कनान देशै भेख लंदै डेऊऐ तै, तिन्नें इना गल्ला शूणीं लागै सोभै इज़राईली टोलीए लोग लैल़ा लांदै अर तैहा सारी राची रहै तिंयां लेरदै लागी। 2सोभै इज़राईली टोलीए लोग लागै मोसा अर हारणा सेटा तेऊ लै निंदा करदै। सोभै लोग लागै इहअ बोल्दै, “एता का हणअ त इहअ ठीक कि हाम्हैं मरदै मिसर देशै ई! कि मरदै हाम्हैं एऊ बणैं!#1 करि. 10:10 3बिधाता किल्है च़ाहा हाम्हां तेऊ देशा लै निंणअ? हाम्हैं पाणै तेऊ देशे लोगा जुधा दी मारी अर म्हारै बेटल़ी माठै करनै तिन्नां कैद, एता का आसा हाम्हां लै मिसर देशा लै बापस फिरनअ ठीक।” 4तेखअ लागै तिंयां आप्पू मांझ़ै गल्ला करदै, “एछा हाम्हां बणाणअं आप्पू मांझ़ै आपणअ एक सैणअ संघा डेऊणअ हाम्हां मिसर देशा लै बापस फिरी।”#शधा. 7:39
5तेखअ टेक्कअ मोसा अर हारणै इज़राईली टोली सेटा धरनीं उटअ पल़ी माथअ। 6नूनो शोहरू ज़ैहसू अर यपुन्नेंओ शोहरू कालेब ज़ुंण भेख लंदै तेऊ देशा लै डेऊऐ तै, तिन्नैं धैल़ै दुखी हई घेरी का आपणैं झिकल़ै, 7संघा लागै सोभी इज़राईली टोली लै इहअ बोल्दै, “ज़ेऊ देशो भेख लणा लै हाम्हैं सारै देशै हांढी फिरी आऐ, सह देश आसा सोभी का बधिया देश। 8ज़ै बिधाता हाम्हां करै खुश होए, तेऊ हेरनै हाम्हैं तेऊ देशै पजैल़ी ज़ुंण सेठ अर ज़ेते ज़िम्मीं-ज़ैगा रज़दी-पज़दी आसा। 9तम्हैं करा सिधअ इहअ कि बिधाता लै द्रोह करदै निं लागा, नां तिधी रहणैं आल़ै लोगा का डरा, किल्हैकि तिंयां हारनै आसा हाम्हां लै सान। बिधाता आसा हाम्हां संघै, अर तेऊ हेरै तिंयां देअ र्हाऊई ज़ुंण तिन्नें फाज़त करा, तम्हैं निं डरदै लागा।”#इब्रा. 3:16
10सोभै इज़राईली टोलीए लोग लागै लैल़ा-पकारा लांदै कि इना दूई लै दैआ पात्थरो ढो। तेखअ हुअ इहअ कि हेरा-हेरी शुझुअ लोगा का कि बिधाता हुअ मेल़-ज़ोल़े खिम्भा दी बादल़ा दी प्रगट।
11तेखअ बोलअ बिधाता मोसा लै इहअ, “इना लोगा केभै तैणीं निं मेरी कदर करनी? इना लोगा मांझ़ै किऐ मंऐं बतेर्है च़मत्कारे काम, पर तज़ी बी निं ईंयां विश्वास करदै! 12ईंयां निं आजू ऐबै मेरै लोग रहणैं, ईंयां करनै मुंह बरैबाद, पर ताह करै पज़ेरनी मुंह आजू एही ज़ाती, सह हणीं इना का बी खास्सी बलबान।”
मोसा किई बिधाता का अरज़
13-16मोसा बोलअ बिधाता लै इहअ, “ज़हा मिसर देशे लोगा मांझ़ा का तंऐं ईंयां लोग आपणैं बला करै छ़ड़ैऊई आसा आणै दै, ताखा आसा मेरी एही अरज़ कि हाम्हां निं एऊ रेगीस्तानै मारी। ज़ै तूह इहअ करे, मिसर देशे लोगा का जाणअ ऐहा गल्लो थोघ लागी अर तिन्नां हेरनी अह गल्ल कनानी लोगा सेटा बी पजैल़ी। तिंयां कनानी ज़हा का पैहलै ई इना गल्लो थोघ आसा कि हाम्हैं इज़राईली ज़ातीए लोग आसा तेरै आपणैं खास अर तूह बस्सा हाम्हां जैंदरी अर हाम्हैं भाल़ा ताह मुंहां सम्हनै। तिन्नैं ईंयां गल्ला बी आसा शूणीं हेरी दी कि तूह नढैऊआ धैल़ी हाम्हां घणैं बादल़ा करै अर राची डाहा हाम्हां संघै ज़ल़दी आगीओ थाम्ह। पर ज़ै तूह हाम्हां सोभी मारी पाए, तै सका तिंयां ताल्है इहअ बी बोली कि ताखा निं एतरअ बल आथी त कि तूह हाम्हां कनान देशै पजैल़ी आपणीं ज़बान पूरी करे।#लुआ. 32:11-14
17“मेरै मालक, ऐबै आसा मेरी एही अरज़ कि तूह रहैऊ आपणअ बल अर ए मेरै बिधाता ऐबै कर तिहअ ई ज़ुंण तंऐं करार आसा किई दी। 18तंऐं आसा इहअ बोलअ द, ‘हुंह थारअ बिधाता निं छ़ेक्कै रोश्श करदअ। ज़ुंण मुंह बाखा फिरा तिन्नां लै छ़ाडा हुंह माफी, हुंह रहैऊआ आपणीं महान झ़ूरी अर विश्वास। पर ज़ुंण दोशी आसा तिन्नें पापा लै दैआ हुंह तिन्नें पोचै अर पल़पोचै तैणीं तिन्नें दादा-बाबे सज़ा।’#लुआ. 20:5,6; 34:6,7; बधा. 5:9,10; 7:9,10
19“ऐबै ए मेरै बिधाता, तूह दैआ लोगा लै तेता का बी खास्सअ ज़ेता जोगी तिंयां हंदै बी निं आथी। ज़िहअ तूह मिसर देशा ओर्ही इधी तैणीं माफ करदी आअ, तिहअ ई कर तूह ऐबै बी हाम्हां माफ।”
20तेखअ बोलअ बिधाता मोसा लै, “ज़ेही तंऐं मुखा अरज़ किई तिहअ ई करूं हुंह तिन्नां माफ। 21पर ज़िहअ हुंह बिधाता आप्पू सदा-सदा लै ज़िऊंदअ आसा, तिहअ ई निं मेरै बलो थह बी आथी।#इब्रा. 3:11,18 22पर मंऐं खाऐ ऐबै सोह कि तिंयां सोभै लोग ज़ुंणी मेरै महान च़मत्कारे काम मिसर देशे शुन्नैं रेगीस्तानै भाल़ै अर तिन्नां नुआहरै कामां भाल़ी बी हर बारी मुल्है परखदै रहै लागी, अर मेरी गल्ला नांईं शूणीं आथी। 23ऐबै ज़ेऊ देशा दैणें करार मंऐं तिन्नें दादा-बाबा संघै किई ती, तिंयां निं ऐबै कधि तेऊ देशै पुजणैं। किल्हैकि तिन्नैं निं मेरी कदर किई।
24“पर मेरअ अह दास कालेब निं तिन्नां होरी ज़िहअ आथी, तेऊ किअ मेरी गल्ला दी विश्वास, तेऊ दैणअ मुंह कनान देशै पुजणैं अर तेऊए ई आद-लुआद हणैं तैहा ज़ैगा गिम्मी तेऊ अर देशे मालक।#ज़ैह. 14:9-12 25ऐबै शुण मोसा! अमोलकी अर कनानी लोग रहा निऊल़ै सऊंऐं मुल्खा दी, काल्ला दैआ तम्हैं तेथ बाखा डेऊई एक हांढ संघा एछै लाल समुंदरे बाता रेगीस्ताना लै बापस फिरी।”
बिधाता दैनी इज़राईली लै सज़ा
26तेखअ बोलअ बिधाता मोसा अर हारणा लै, 27“इज़राईली टोली लै दै इहअ समाद कि तम्हैं पापी मणछ हआ हर बगत मुल्है बखर्दै लागै दै! 28ऐबै काढा हुंह बिधाता आपणीं ज़िन्दगीए सोह कि मुंह दैणअ तम्हां लै तिहअ ई ज़िहअ तम्हैं मांगअ। 29तम्हैं मरनै इधी एऊ शुन्नैं रेगीस्तानै, थारी ल्हासा करै हणीं अह धरती भरी, ज़ेतरै बी तम्हैं बिहा साला का उझै अमरे आसा, तम्हैं रहै मुंह नकदरै समझ़ी बखर्दै लागी।#इब्रा. 3:17 30तम्हां मांझ़ै निं यपुन्नें शोहरू कालेब अर नूने शोहरू ज़ैहसू छ़ाडी कोहै तेऊ देशै पुजणैं ज़हा देशे बारै मंऐं ज़बान आसा दैनी दी कि तम्हैं बसाऊंणै मुंह तिधी।
31“पर थारै लान्हैं-सुन्हैं ज़हा लै तम्हैं इहअ बोलअ कि तिंयां लुटणैं-घशिट्टणै लोगा! तिंयां लणैं मुंह तेऊ देशै पजैल़ी अर तिन्नां भाल़णअ सह देश ज़ुंण तम्हैं किछ़ै निं समझ़अ। 32पर थारी ल्हासा रहणीं एऊ ई रेगीस्तानै पल़ी। 33ज़ेभै तैणीं तम्हैं सोभै मरी निं जाए, तेभै तैणीं रहणैं थारै शोहरू-माठै च़ाल़्ही साला तैणीं एऊ ई रेगीस्तानै ठुल़्दै लागी, किल्हैकि तम्हैं किअ पाप।#शधा. 7:36
34“ज़ेतरै धैल़ै तम्हैं तेऊ देशो भेख लंदै रहै, मुंह दैणीं तम्हां लै एकी धैल़ीए बदल़ै एकी साले साबै च़ाल़्ही साला तैणीं हर धैल़ै थारै पापा पिछ़ू घोर सज़ा। 35हुंह खाआ सोह, ज़ुंण मंऐं बोली हेरअ कि तम्हैं कपटी मणछ ज़ुंण मेरै खलाफ कठा हुऐ, थारी टोली दी निं एक बी मणछ उज़र रेगीस्तानै ज़िऊंदअ रहणअ, ज़िहअ मंऐं बिधाता बोलअ मुंह करनअ बी तिहअ ई।”
36तेखअ ज़ुंण लोग मोसा कनान देशे भेख लणा लै छ़ाडै तै अर ज़ुंणी बापस फिरी करै डरैऊंणी गल्ला खोज़ी टोलीए लोग शकाऊई बिधातो बरोध किअ त, 37तिन्नां लै लाई बिधाता एही दाह कि तिंयां मूंऐं सोभै। 38पर नूनो शोहरू ज़ैहसू अर यपुन्नेंओ शोहरू कालेब रहै दूई ज़ण्हैं ज़िऊंदै।
39ज़ांऊं मोसा ईंयां सारी गल्ला इज़राईली का खोज़ी, तिंयां लागै लेरा-पकारा लांदै अर तिन्नैं मनाऊंअ शोग। 40दुजै धैल़ै उझ़ुऐ तिंयां सोभ दोत्थी, संघा लागै इहअ बोली धारे च़ुंडी बाखा हांढदै, “हाम्हैं किअ पाप, पर ऐबै आसा हाम्हैं डेऊणा लै राज्ज़ी। हाम्हां डेऊणअ तैहा ज़ैगा लै ज़ेते बारै बिधाता करार आसा किई दी।”
41पर मोसा बोलअ तिन्नां लै इहअ, “तम्हैं निं पैहलै बिधाते गल्ला शूणीं अर ऐबै ज़िहअ तम्हैं च़ाहा, सह निं सफल हई सकदअ। 42इहअ करने निं तम्हैं कोशिश बी करा। बिधाता निं ऐबै तम्हां बाखा आथी, किल्हैकि तम्हैं फरेऊई ती तेऊ बाखा लै पिठ। 43आजू आसा अमोलकी अर कनानी थारै दुशमण तिन्नां गोटणैं तम्हैं संघा पाणै तम्हैं मारी।”
44पर इज़राईली निं मोसे गल्ला शूणीं तिंयां रहै धारा बाखा लै हांढदै लागी, इधी तैणीं कि बिधातो करारो मणशू अर मोसा रहै पिछ़ू खिम्भे डेरै दी। 45तैहा धारा रहा तै अमोलकी अर कनानी लोग, तिन्नैं दैनअ इज़राईली लै फेरा-फेर गोट, संघा दरल़ाऊऐ तिंयां च़िक्कदी-मारदी होर्मा नाओंए नगरी तैणीं।
Currently Selected:
गणांई 14: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
