लूका 23

राज़पाल पिलातुसे दरबारै ईशू

(मोत्ती 27:1,2,11-14; मार्कुस 15:1-5; जोहन्‍ना 18:28-38)

1तेखअ सारी सभा उझ़ुई अर तिन्‍नैं निंयं ईशू राज़पाल पिलातुसा सेटा लै। 2तिंयां लागै ईशू लै इहै दोशा लांदै, “हाम्हैं भाल़अ अह म्हारै देशे लोगा रोम राज़े खलाफ शकाऊंदअ अर अह करा माहा राज़ै लै कारै दैणा लै नांईं, अर आप्पू लै बोला अह मसीहा अर राज़अ।”

3पिलातुसै पुछ़अ ईशू का, “तूह यहूदी मणछो राज़अ आसा?”

ईशू दैनअ ज़बाब, “तूह आसा लागअ द आप्पै बोल्दअ।”

4तेखअ बोलअ पिलातुसै बडै प्रोहता अर तिधी होरी लोगा लै, “मुखा निं एऊ मणछा दी किछ़ै दोश शुझदअ।”

5पर तिंयां लागै होर बी खास्सै बोल्दै, “अह शकाऊआ गलील मुल्खै ओर्ही इधी तैणीं, सारी यहूदा दी शिक्षा दैई सोभी लोगा।”

6इहअ शूणीं पुछ़अ पिलातुसै तिन्‍नां का, “अह गलील मुल्खा का आसा?” 7ज़ांऊं पिलातुसै ज़ाणअ कि तेऊ मुल्खै करा हेरोदेस राज़अ राज़। तेऊ छ़ाडअ ईशू हेरोदेस राज़ै सेटा लै। किल्हैकि सह थिअ तिन्‍नां धैल़ै एरुशलेम नगरी आअ द।

हेरोदेस राज़ै सेटा ईशू

8हेरोदेस हुअ ईशू भाल़ी बडअ खुश, किल्हैकि सह च़ाहा त कई धैल़ै ओर्ही ईशू भाल़णअ अर तेऊ ती ईशूए बारै खास्सी गल्‍ला शूणीं दी। हेरोदेस राज़ै ती एही बी आशा कि ईशू तेऊ का किछ़ै नछ़ैण रहैऊए। 9तेऊ पुछ़ी ईशू का खास्सी गल्‍ला पर ईशू निं किछ़ ज़बाब दैनअ, 10बडै प्रोहत अर शास्त्री तै खल़्हुऐ दै बडै तन मन्‍न लाई ईशू लै दोशा लांदै। 11तेखअ हेरोदेस राज़ै अर तेऊए सपाही किअ ईशूओ सुहांग अर बैंज़णीं रंगे झिकल़ै बन्हैऊंईं छ़ाडअ बापस पिलातुसा सेटा लै। 12तैहा ई धैल़ी हुऐ पिलातुस अर हेरोदेस आप्पू मांझ़ै साथी, एता पैहलै डाहा तै तिंयां एकी-दुजै लै ज़ीद।

मौते सज़ा दैणैंओ हुकम

(मोत्ती 27:15-26; मार्कुस 15:6-15; जोहन्‍ना 18:39—19:16)

13राज़पाल पिलातुसै शादै सोभै बडै प्रोहत, अफसर अर होर लोग, संघा बोलअ इहअ, 14“तम्हैं आणअ अह मणछ मुंह सेटा लै अर तम्हैं बोला एऊए बारै इहअ कि अह पाआ लोगा शकाऊई करै कबाता! पर मंऐं हेरअ अह थारै सम्हनै ज़ाच़ी-भाल़ी। पर ज़हा गल्‍लो तम्हैं एऊ लै दोश लाअ, इहअ निं मुखा एऊ दी सज़ा दैणैं जोगी किछ़ै शुझुअ। 15नां हेरोदेस राज़ै एऊ दी किज़ै दोश भेटअ। किल्हैकि तेऊ छ़ाडअ अह मुंह सेटा लै बापस। ऐबै भाल़ा, एऊ निं इहअ किछ़ै किअ कि हुंह एऊ लै मारनै जोगी सज़ा दैई सके। 16तै ऐबै लाअ मंऐं अह च़िक्‍की करै छ़ाडी।” 17पिलातुस त थैरे धैल़ी तिन्‍नां लै एकी ज़ुल्म करनै आल़ै कैदी छ़ाडणा लै मज़बूर।

18तेखअ पाअ सोभी हाल्‍लअ-गोल्‍लअ अर लैल़ा पाई बोलअ, “एऊ पाआ मारी अर हाम्हां लै छ़ाड बरोबा।” 19बरोबा त ज़ुंणी नगरी दी राज़ द्रोह अर हत्या किई ती अर सह थिअ कैद खानै पाअ द। 20पर पिलातुस च़ाहा त ईशू छ़ाडणअ अर तेऊ समझ़ाऊऐ तै लोग एकी बारी भिई। 21पर लोगै लैल़ा पाई-पाई बोलअ, “एऊ मारा क्रूसा दी।”

22पिलातुसै बोलअ चिऊथी बारी तिन्‍नां लै, “किल्है, एऊ किज़ै कदुष्ट काम किअ? मंऐं निं एऊ दी मौता दैणैं जोगी किछ़ै दोश भाल़अ, तै लाअ मंऐं अह च़िक्‍की करै छ़ाडी।”

23पर तिंयां पल़ै पिछ़ू, “एऊ छ़ड़ाऊआ क्रूसा दी” अर तिंयां लागै होर बी ज़ोरै लैल़ा लांदै। 24तेखअ दैनअ पिलातुसै हुकम कि ज़िहअ ईंयां बोला तिहअ ई करा। 25तेऊ छ़ाडअ सह मणछ पोर्ही ज़ुंण राज़ द्रोह अर हत्या पिछ़ू कैद खानै त बंद किअ द। ज़हा तिंयां मांगा तै अर ईशू सभाल़अ तिन्‍नें साबै ज़िहअ तिंयां च़ाहा तै।

ईशू छ़ड़ाऊअ क्रूसा दी

(मोत्ती 27:32-44; मार्कुस 15:21-32; जोहन्‍ना 19:17-27)

26ज़ांऊं तिन्‍नैं ईशू निंयं, तिन्‍नैं ढाकअ शमौन नाओं मणछ कुरेन नगरी का आअ द, सह थिअ गराऊंआं का लागअ द एछदअ, सह निंयं तिन्‍नैं ज़ोरा-ज़ोरी क्रूसा बगारू।

27पिछ़ू लागै खास्सै मणछ हांढदै। कई बेटल़ी लागी लेरदी अर हिक्‍का पटाक्‍कदी। 28ईशू बोलअ तिन्‍नां बाखा भाल़ी करै, “हे एरुशलेम नगरीए शोहरीओ, मुल्है निं लेरा लाआ, पर आपणैं-आपणैं शोहरू लै लाआ लेरा। 29किल्हैकि इहै धैल़ै एछणैं, ज़ेभै लोगा इहअ बोल़णअ, ‘तिंयां बेटल़ी आसा भागा आल़ी ज़ुंण बांढी आसा, भागा आल़अ आसा सह ओदर ज़ुंणीं ज़ल्म निं दैनअ, अर भागा आल़ी आसा तिंयां च़ूई ज़ुंणीं दुध निं पणैऊंअं।’ 30तैहा घल़ी बोल़णअ तिन्‍नां इना उछ़टी धारा लै इहअ, ‘हाम्हां प्रैंदै ढूल़ा’ अर ढेक्‍का लै बोल़णअ इहअ, ‘हाम्हां डाहा दाबी।’

31 “किल्हैकि, ज़ै तिंयां हरै बूटा संघै इहअ करा, तै शुक्‍कै बूटा लै भुझ़ा तिन्‍नां कै निं करनअ होए।”

32तिन्‍नैं सपाही निंयैं दूई होर मणछ बी क्रूसा दी छ़ड़ाऊंणा लै ज़ुंण खुंनी अर द्रोही तै।

33ज़ांऊं तिंयां तैहा ज़ैगा पुजै, ज़िधा लै खोपल़ीए ज़ैगा बोला, तिन्‍नैं तिधी तिंयां कदुष्ट कामां करनै आल़ै दूई डाकू बी एक दैहणै अर एक बाऊंऐं क्रूसा दी छ़डाऊऐ। 34तेखअ बोलअ ईशू, “हे बाब, इना कर माफ, किल्हैकि इना का निं थोघै कि ईंयां किज़ू करदै आसा लागै दै?” संघा तिन्‍नैं सपाही बांडै आप्पू मांझ़ै परच़ी पाई तेऊए झिकल़ै।#1 पत. 3:9; ईशा. 53:12; भज. 22:18

35लोग तै लागै दै खल़्हुई करै भाल़ै अर तिंयां सपाहीए अफसर बी लागै सुहांगा करदै अर इहअ बोल्दै, “एऊ होर ता बच़ाऊऐ, ज़ै अह मसीहा आसा अर ज़ै अह परमेशरो छ़ांटअ द थिअ आप्पू ता बच़।”#भज. 22:7

36सपाही बी आऐ नेल़ संघा दैनअ मिल्‍लै दाखे रसा दी चुशू डबेऊई ईशू का च़ाखणा लै। तिंयां बी लागै तेऊए सुहांगा करदै।#भज. 69:21 37“ज़ै तूह यहूदी मणछो राज़अ आसा, तै आप्पू; बच़ हेरुं।” 38तेखअ तेऊ प्रैंदै क्रूसे च़ुंडी टोक्‍की तिन्‍नैं एक तगती, अर तेथ त तेऊओ दोश लिखअ, “यहूदी मणछो राज़अ।”

डाकूओ प्राश्त

39ज़ुंण तिंयां ईशू संघै डाकू बी क्रूसा दी तै छ़ड़ाऊऐ दै, तिन्‍नां मांझ़ै बोलअ एकी निंदा करी इहअ, “तूह कै मसीहा निं आथी? तै तूह आप्पू बी बच़ अर हाम्हां बी बच़ाऊ।”

40एता लै दुजअ लागअ तेऊ पैहलै झ़ाहल़ काढी नैरदअ, “तूह कै परमेशरा का बी निं डरदअ आथी? ताल्है बी, अह ई सज़ा आसा दैनी दी। 41हाम्हैं आसा फैंसले साबै ठीक सज़ा भुगतदै लागै दै किल्हैकि म्हारै कामों भेटणअ त हाम्हां अह ई फल, पर एऊ निं किछ़ै कदुष्ट काम किअ आथी।” 42तेखअ बोलअ तेऊ, ए ईशू, “ज़ेभै तूह आपणैं राज़ एछे, तेभै डाहै मेरअ बी खैल।”

43ईशू बोलअ तेऊ लै, “हुंह खोज़ा ताखा सत्त कि तूह हणअ आझ़ ई मुंह संघै स्वर्गे।”

ईशूए प्राण शोटणै

(मोत्ती 27:45-56; मार्कुस 15:33-41; जोहन्‍ना 19:28-30)

44दपहरा पोर्ही चिऊथै पहरै तैणीं रहअ तेऊ देशै घोर न्हैरअ हई अर उडै तैणीं रही ज़ेही राच पल़ी। 45सुरज़ डुबअ अर परमेशरे भबनै लाअ द पल्दअ धेल़्हुअ प्रैंदा का थाल्‍लै तैणीं दूई बाखा लै।#आम. 8:9; इब्रा. 10:19

46तेखअ बोलअ ईशू ज़ोरै लैल़ पाई इहअ, “हे बाबा, मंऐं छ़ाडी आपणीं ज़िन्दगी तेरै आसरै।” इहअ बोली शोटै तेखअ ईशू प्राण। 47एकी सुबैदारै तेऊ सम्हनै तिधी ज़ुंण हुअ तेता भाल़ी किई परमेशरे ज़ै-ज़ैकार संघा बोलअ, “ज़रूर अह मणछ त धर्मीं।”

48खास्सै मणछ ज़ुंण तिधी भाल़ै थिऐ आऐ दै, तिंयां डेऊऐ एता भाल़ी हिक्‍का पटाक्‍कदी घअरा लै। 49ईशूए सोभ भेतू-बछ़ैणूं अर ज़ुंण बेटल़ी गलील मुल्खा का ईशू सेटा आई, तिंयां ती दूर खल़्हुई करै ज़ुंण तिधी हुअ तेता भाल़ी लागी दी।#भज. 38:11; 88:8

ईशू दाबी डाहंणअ

(मोत्ती 27:57-61; मार्कुस 15:42-47; जोहन्‍ना 19:38-42)

50युसुफ नाओं एक बज़ीर त सादअ सिधअ अर धर्मीं मणछ। 51सह निं तिन्‍नें बच़ारा अर कामां का खुश आथी त। सह थिअ यहूदी मणछे नगरी अरमतियाह गराऊंओ रहणैं आल़अ अर सह बी थिअ परमेशरे राज़ा न्हैल़अ लागअ द।

52सह डेऊअ राज़पाल पिलातुसा सेटा लै संघा मांगी तेऊ का ईशूए ल्हास। 53तेखअ थुआल़ी तेऊ ल्हास क्रूसा का धरनीं, संघा डाही बाछे कोरी च़ादरा दी पल़ेटी तैहा घोरी दाबी ज़ुंण भिल़ी दी थिई कोती दी अर तेथ निं अज़ी बी कोहै डाहअ त। 54सह धैल़ी थिई ऊवार्णे थैरे तैरी करने धैल़ी अर बशैघे धैल़ी ती शुरू हणैं आल़ी।

55तिंयां बेटल़ी ज़ुंण गलील मुल्खा का थिई आई दी, तिंयां डेऊई पिछ़ू-पिछ़ू अर तिन्‍नैं भाल़ी सह घोर कि ईशूए ल्हास किधी आसा डाही दी। 56बापस फिरी करै बणाअं तिन्‍नैं खुशबूदार तेल अर बशैघे धैल़ी किअ तिन्‍नैं बधाने साबै राम।#लुआ. 20:10; बधा. 5:14

Currently Selected:

लूका 23: OSJ

Highlight

Copy

Compare