लूका 22
22
ईशूए खलाफ छ़ल़
(मोत्ती 26:1-5; मार्कुस 14:1,2; जोहन्ना 11:45-53)
1आखरी रोटीओ थैर ज़हा लै ऊवार्णैओ थैर बोला, सह थिअ नेल़। 2बडै प्रोहत अर शास्त्री थिऐ ऐहा गल्ले ताका दी कि ईशू पाणअ हाम्हां किहअ करै मारी पर तिंयां डरा तै लोगा का।
यहूदो छ़ल़-कपट
(मोत्ती 26:14-16; मार्कुस 14:10-11)
3तेखअ राख्स बस्सअ करेती गराऊंओ यहूदा दी, ज़ुंण ईशूए बारा च़ेल्लै मांझ़ै एक त। 4तेऊ किई बडै प्रोहता अर पहरीए सरदारा संघै गल्ला कि किहअ करै दैणअ ईशू तिन्नें हाथै। 5तिंयां हुऐ बडै खुश अर तिन्नैं किअ तेऊ लै ढब्बै दैणैंओ बाहिदअ। 6तेऊ तिन्नें गल्ला मनी अर सह लागअ मोक्कै भाल़अ कि बाझ़ी हाल्लअ-गोल्लअ पाई बझ़ैल़णअ ढाकणैं ईशू तिन्नें हाथै।
च़ेल्लै संघै ऊवार्णे थैरो भोज़
(मोत्ती 26:17-25; मार्कुस 14:12-21; जोहन्ना 13:21-30)
7एरुशलेम नगरी गअ त आखरी रोटीओ थैर बी नेल़ एछी, ज़ेथ दी ऊवार्णैओ मिम्मूं बल़ीदान करनअ ज़रूरी हआ त।#लुआ. 12:3,6,8,14 8तेखअ बोलअ ईशू आपणैं च़ेल्लै पतरास अर जोहन्ना लै, “डेओआ, मुल्है करा खाणां लै ऊवार्णे थैरो भोज़ तैर।” 9तिन्नैं पुछ़अ ईशू का, “तूह किधी च़ाहा कि हाम्हैं एता बणांए?”
10ईशू बोलअ तिन्नां लै, “नगरी लै डेओआ तिधी भेटणअ तम्हां एक मणछ तेऊ हणअ पाणींओ घल़अ च़कअ द, तम्हैं लागै तेऊ पिछ़ू तेऊए घअरा लै हांढदै। 11तेखअ सह ज़हा घअरा लै डेओए तेऊ घअरे मालका लै बोलै तम्हैं कि गूरू बोला इहअ कि तेरी प्राहुंणें पांड किधी आसा? ज़िधी हुंह आपणैं च़ेल्लै संघै ऊवार्णे थैरो भोज़ खाई सकूं? 12तेऊ रहैऊंणीं तम्हां का एक सज़ाऊई दी पांड अर तिधी बणाऐं तम्हैं ऊवार्णे थैरो भोज़।” 13तिंयां बी डेऊऐ अर ज़िहअ ईशू बोलअ तिन्नां लै त, तिन्नैं किअ तिहअ ई अर ऊवार्णे थैरो भोज़ किअ तैर।
प्रभू-भोज़
(मोत्ती 26:26-30; मार्कुस 14:22-26; 1 करिन्थी 11:23-25)
14ज़ांऊं बगत हुअ, ईशू शधाणूं संघै तिन्नां मांझ़ै रोटी खांदअ बेठअ। 15ईशू तिन्नां का बोलअ, “हुंह च़ाहा इहअ कि दुख भुगतणै का आजी करूं तम्हां संघै हुंह ऊवार्णे थैरो भोज़। 16किल्हैकि हुंह खोज़ा तम्हां का सत्त कि ज़ेभै तैणीं सह परमेशरे राज़ा दी पूरअ नां होए तेभै तैणीं निं मुंह अह कधि खाणअ।”
17ईशू च़कअ दाखे रसा करै भरअ द प्रिहअ संघा परमेशरो शूकर करी बोलअ, “एऊ ढाका अर आप्पू मांझ़ै बांडा। 18हुंह बोला तम्हां लै इहअ कि ज़ेभै तैणीं परमेशरो राज़ निं एछे, तेभै तैणीं निं मुंह कधि दाखो रस झुटणअ।” 19तेखअ च़की ईशू रोटी अर परमेशरो शूकर करी दैनी चोल़ी करै तिन्नां लै इहअ बोली, “अह आसा मेरी देही, ज़ुंण मंऐं तम्हां लै दैनी, मुंह आद करना लै करै तम्हैं इहअ ई।” 20इहअ ई करै दाखे रसा करै भरअ द एक होर प्रिहअ हाथै ढाकी करै ईशू बोलअ, “अह प्रिहअ आसा मेरै लोहू दी परमेशरे मणछा लै नऊंईं करार। अह बहाऊंणअ तम्हां मांझ़ै कई मणछे पाप माफ करना लै बल़ीदान करी।#लुआ. 24:8; 1 करि. 11:25; मोत्त. 26:28; जक. 9:11
21 “पर हेरा, ज़हा हुंह ढाकणैं बझ़ैल़णअ सह आसा सह ज़ुंण इधी मुंह संघै आसा। #
भज. 41:9
22किल्हैकि हुंह मणछो पूत ता आसा तेता लै ई छ़ांटअ द पर तेऊ मणछा लै आसा आफ़त! ज़हा हुंह ढाकणैं बझ़ैल़णअ।” 23तेखअ लागै तिंयां आप्पू मांझ़ै पुछ़-ज़ाच़ करदै कि हाम्हां मांझ़ै कुंण आसा ज़ुंणी अह काम आसा लाअ द करी?
बडी पदबी कसरी आसा
24तिंयां च़ेल्लै लागै आप्पू मांझ़ै हठल़दै कि हाम्हां मांझ़ै बडअ कुंण आसा? 25तेऊ बोलअ तिन्नां लै इहअ, “होरी ज़ातीए सैणैं करा तिन्नां प्रैंदै राज़, अर ज़ुंण तिन्नां प्रैंदै हक डाहा तिंयां पजैल़ा होरी लोगा मांझ़ै आपणैं बारै एही गल्ला कि हाम्हैं ई आसा तम्हां लै मज़त करनै आल़ै।
26 “पर तम्हैं निं इहै हई, पर ज़ुंण तम्हां मांझ़ै बडअ होए, सह हऐ सोभी का होछ़अ अर ज़ुंण बडअ आसा, सह बणै दास ज़िहअ। 27किल्हैकि बडअ कुंण आसा, सह ज़ुंण रोटी खांदअ बेठअ द आसा, या सह ज़ुंण च़ाकरी करा? सह ज़ुंण रोटी खांदअ बेठअ द आसा? पर हुंह आसा तम्हां मांझ़ै दास ज़िहअ।
28 “पर तम्हैं आसा तिंयां ज़ुंण मेरी परिक्षा दी हर बगत मुंह संघै रहै। 29ज़िहअ मेरै बाब परमेशरै मुल्है एक राज़ पाठ आसा डाहअ द। 30तिहअ ई डाहा हुंह तम्हां लै बी ताकि तम्हैं मेरै राज़ा दी मुंह संघै मेरी मेज़ा दी खाआ-पिआ। इधी तैणीं कि राज़गाद्दी दी बेशी इज़राईले बारा गोत्रो नसाफ करे।
पतरासे हुधणें बारै गल्ला प्रगट करनी
(मोत्ती 26:31-35; मार्कुस 14:27-31; जोहन्ना 13:36-38)
31 “शमौन, शमौन, भाल़, राख्सै मांगै तम्हैं परमेशरा का ताकि तम्हां कणक ज़िहै मांडे। 32पर मंऐं किई ताल्है अरज़ कि तेरअ मुंह दी विश्वास करनअ निं लोल़ी घट हुअ अर ज़ांऊं तूह बापस फिरे, आपणैं इना साथी-भाई करै हेर-सभाल़ करी पाक्कै।”
33पतरासै बोलअ ईशू लै, “हे प्रभू, हुंह आसा ताह संघै कैद खानै डेऊणा लै बी तैर अर हुंह सका तेरी तैणीं आपणीं ज़ान बी दैई।”
34पर ईशू बोलअ तेऊ लै, “हे पतरास, हुंह बोला ताल्है इहअ कि आझ़ ऐहा ई राची मुर्गै दूई बारी बाशणैं का आजी हुधणअ तूह मेरै बारै चिई बारी।”
ढबैओ थैल्लू, झ़ोल़ी अर तलबार
35तेखअ पुछ़अ ईशू तिन्नां का, “ज़धू मंऐं तम्हां लै ढबैओ थैल्लू, झ़ोल़ी अर पोलल़ै बाझ़ी छ़ाडै तै, तधू कै तम्हां किछ़ू गल्ले कामीं हुई ती?”
तिन्नैं दैनअ ज़बाब, “हाम्हां निं किछ़ू गल्ले कामीं पल़ी।”
36ईशू बोलअ तिन्नां लै, “ऐबै ज़हा का ढबैओ थैल्लू होए सह पाऐ तेऊ संघा अर झ़ोल़ी बी। तेखअ ज़हा का तलबार निं आथी, सह पाऐ आपणअ च़ोल़अ बेच़ी अर तेता करै लऐ तलबार। 37किल्हैकि हुंह बोला तम्हां लै कि अह ज़ुंण पबित्र शास्त्रा दी आसा लिखअ द, ‘सह गणअ ज़ुल्म करनै आल़ै मणछा संघै।’ सह आसा मुंह दी पूरअ हणअ ज़रूरी। किल्हैकि मेरै बारै पबित्र शास्त्रा दी लिखी गल्ला आसा पूरी हणैं आल़ी।”#गल. 3:13; 2 करि. 5:21; ईशा. 53:12
38तिन्नैं बोलअ ईशू लै, “प्रभू, भाल़ इधी आसा हाम्हां का दूई तलबारा।”
ईशू बोलअ, “ईंयां आसा बतेर्ही।”
जैतून धारा ईशूए प्राथणां
(मोत्ती 26:36-46; मार्कुस 14:32-42)
39तेखअ डेऊअ ईशू तिधा का बागै निखल़ी जैतून धारा लै ज़िहअ सह धैल़ कई बारी डेओआ त अर च़ेल्लै बी डेऊऐ तेऊ पिछ़ू। 40तिधी पुजी बोलअ ईशू आपणैं च़ेल्लै लै इहअ, “प्राथणां करा, ताकि तम्हैं खरी दी पल़ी पाप नां करे।” 41तेखअ डेऊअ आप्पू तिन्नां का ज़ुदअ ज़िहअ संघा लागअ एही प्राथणां करदअ,
42 “हे परमेशर मेरै बाबा, ज़ै हई सका, तै कर मुखा ऐहा घल़ी एऊ दुखा दूर। तैबी ज़िहअ हुंह च़ाहा तिहअ निं पर ज़िहअ तूह च़ाहा तिहअ लोल़ी हुअ।” 43तेखअ शुझुअ ईशू का स्वर्गा का एक स्वर्ग दूत, सह दैआ त ईशू लै शगती। 44ईशू हुअ खास्सअ दुखी अर तेभी रहअ प्राथणां करदअ लागी तेऊओ प्रसिन्नअ ज़ाण्हुंअ तेऊ का इहअ कि बडै-बडै लोहूए टिप्पै लागै धरनीं पल़दै।
45ईशू प्राथणां का उझ़ुअ अर दुखी हई च़ेल्लै सेटा लै डेऊअ पर तिंयां थिऐ सुत्तै दै, तेऊ बोलअ तिन्नां लै, “तम्हैं किल्है आसा सुत्तै दै? 46खल़ै उझ़िआ, प्राथणां करा ताकि खरी दी पल़ी तम्हैं पाप नां करे।”
ईशू धोखै करै ढाकणअ
(मोत्ती 26:47-56; मार्कुस 14:43-50; जोहन्ना 18:3-12)
47ईशू त इहअ बोल्दअ ई लागअ द कि तिधी आऐ खास्सै मणछ। तिन्नां बारा मांझ़ै ज़हा नाअं यहूदा थिअ, सह थिअ तिन्नां मणछा आजू-आजू अर सह आअ ईशू सेटा लै, संघा दैनअ ईशूए गलेटै माख्खू। 48ईशू बोलअ तेऊ लै, “हे यहूदा, माख्खू दैई आसा तंऐं लाअ द हुंह मणछो पूत बझ़ैल़ी कैद करनै भाल़ी?”
49च़ेल्लै ज़ांऊं भाल़अ कि आजू कै आसा ऐबै हणैं आल़अ, तिन्नैं बोलअ, “हे प्रभू तूह कै बोला हाम्हैं तलबार च़लाऊमैं?” 50तिन्नां मांझ़ै बाही एकी माहा प्रोहते दासा लै तलबारा करै अर तेऊओ दैहणअ कान शोटअ धरनीं।
51एता लै बोलअ ईशू, “हुअ इहअ निं करा” संघा लाअ ईशू तेऊओ कान बापस अर सह हुअ ज़ाथी तिहअ ई ताज़अ-नरोगअ। 52प्रोहत, भबने पहरी, सैणैं ज़ुंणी राची तिंयां गोटै तै, तिन्नां लै बोलअ ईशू, “तम्हैं कै हुंह डाकू समझ़अ कि मुंह ढाकदै आसा तलबारा अर शोठै पाई निखल़ै दै? 53हुंह ता हर धैल़ै तम्हां संघा परमेशरे भबनै शिक्षा दैआ त! तेभै किल्है निं तम्हैं हुंह ढाकअ? पर अह आसा थारअ बगत अर न्हैरै दी काम करनै आल़ै राख्सो हक।”
पतरास हुधूअ
(मोत्ती 26:57,58,59-75; मार्कुस 14:53,54,66-72; जोहन्ना 18:12-18,25-27)
54तिन्नैं किअ ईशू कैद संघा निंयं तिन्नैं सह माहा प्रोहते घअरा लै। पतरास बी डेऊअ तिन्नां पिछ़ू-पिछ़ू। 55माहा प्रोहते भबना आजू ताटी तै लोग आग ज़ाल़ी फेर बेठै दै अर पतरास बी बेठअ तिन्नां जैंदरी आगी नैथदअ। 56एकी दासी भाल़अ सह आगीए प्रैश्शै दी बेठअ द सह लागी तेऊ बाखा राम्बल़ै करै भाल़ी संघा बोलअ तैहा इहअ, “अह बी, तेऊ संघै त।”
57पतरास हुधूअ इहअ बोली, “हे ज़नानी, हुंह निं तेऊ बछ़ैणदअ बी आथी।”
58थोल़ी घल़ी बाद बोलअ एकी होरी तेऊ लै, “तुबी, तिन्नों साथी आसा भाल़ी?” पतरास हुधूअ भिई अर तेऊ बोलअ, “तूह कै मणछ आसा, हुंह निं आथी सह।”
59कोई थोल़ी घल़ी बाद बोलअ एकी होरी मणछै सह राम्बल़अ बछ़ैणीं, “अह भाल़अ सच्च़ी मंऐं तिन्नां संघै किल्हैकि अह आसा गलील मुल्खा का।” 60पर पतरास लागअ इहअ बोल्दअ, “आरा भाई थोघ निं तूह कै गल्ल बोला?” पतरास त बोल्दअ ई लागअ द कि तेभी बाशअ मुर्गअ।
61तेखअ भाल़अ प्रभू पतरासा बाखा संघा फिरी पतरासा ईशूए सह गल्ल आद, “आझ़ मुर्गै दुजी बारी बाशणैं का आजी हुधणअ ताह मेरै बारै चिई बारी।” 62सह डेऊअ तिधा का बागै संघा लागअ सह हिंह करै लेरा लांदअ।
ईशूओ फिरी एछणअ
(मोत्ती 26:67,68; मार्कुस 14:65)
63ज़ुंणी मणछै ईशू ढाकी त डाहअ द, तिंयां लागै ईशूए सुहांगा करदै अर तेऊ च़िक्कदै। 64तेखअ ढोपी तिन्नैं ईशूए आछी संघा लागै इहअ बोल्दै, “ऐहा गल्ला कर प्रगट कि ताल्है कुंणी बाही।” 65संघा लागै तिंयां तेऊ लै बूरी-बूरी गल्ला बोल्दै अर तेऊए निंदा करदै।
माहा सभा दी ईशू
(मोत्ती 26:59-66; मार्कुस 14:55-64; जोहन्ना 18:19-24)
66ज़ांऊं राच भैई, लोगे सैणैं, बडै प्रोहत, शास्त्री हुऐ कठा अर तिन्नैं निंयं ईशू आपणीं माहा सभा दी अर पुछ़अ, 67“ज़ै तूह मसीहा आसा, तै बोल हाम्हां का।”
ईशू बोलअ तिन्नां लै, “ज़ै हुंह तम्हां का बोलूं तै निं तम्हां विश्वास करनअ। 68ज़ै हुंह पुछ़ूं, तै निं तम्हां ज़बाब दैणअ। 69#मार्क. 14:62; भज. 110:1 पर एभा पोर्ही रहणअ हुंह मणछो पूत सर्वशक्तिमान परमेशरे दैहणीं बाखा बेशी।”
70ऐहा गल्ला शूणीं तिन्नैं सोभी ईशू लै बोलअ, “तेरअ कै मतलब, तूह परमेशरो पूत आसा?”
ईशू बोलअ, “तम्हैं आसा लागै दै आप्पू बोल्दै, किल्हैकि हुंह आसा।” 71तेखअ बोलअ तिन्नैं सोभी, “ऐबै निं हाम्हां कोही शाजते ज़रुरत आथी, किल्हैकि हाम्हैं शूणअ आपणैं कानै एऊए मुंहां का।”
Currently Selected:
लूका 22: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
