लूका 15

लुक्‍की दी भेडे कथ्या

(मोत्ती 18:12-14)

1ईशू सेटा लै एछा तै कई कारै गराहणै आल़ै अर पापी मणछ तेऊए शिक्षा शूणैं। 2पर फरीसी अर धर्म शास्त्री लागै इहअ बोल्दै, “एऊए संगत आसा पापी मणछा संघै अर तिन्‍नां संघै खाआ-पिआ बी तिन्‍नां ई संघै।”

3तेखअ खोज़ी ईशू तिन्‍नां का एक होर कथ्या, 4“तम्हां मांझ़ै इहअ कुंण मणछ आसा कि ज़सरी शौ भेडा होए, तिन्‍नां मांझ़ै एक लुक्‍की दी होए अर सह रहा नडिनुंऐं भेडा छ़ाडी तैहा लुक्‍की दी भेडा लोल़अ तेभै तैणीं लागी, ज़ेभै तैणीं सह भेड़ भेटी निं जाए?#एज. 34:11-12,16

5 “तेखअ ज़ांऊं सह भेड़ तेऊ भेटी जाए, तेखअ फिरनअ तेऊ बडअ खुशी-खुशी तैहा भेडा कान्हा च़की। 6आपणैं घअरै पुजी खोज़ा तेखअ सह सोभी साथी-संघी कठा करी इहअ ‘बेघै खास्सी खुशीए गल्‍ल हुई, मेरी ती भेड़ लुक्‍की दी अर सह गई मुंह भेटी।’

7 “हुंह बोला तम्हां का इहअ कि ठीक इहअ ई करै पापो प्राश्त करनै आल़ै पापी मणछे बारै बी हआ स्वर्गै एही ई खुशी, ज़ेतरअ कि तम्हां ज़िहै नडिनुंऐं धर्मीं मणछे बारै निं हंदी, ज़ुंण ऐबै पाप निं करदै!

शोठुऐ दै सिक्‍कै

8 “या एही कुंण बेटल़ी होए कि ज़हा का दस सिक्‍कै होए, अर तेता मांझ़ा का एक शोठिए, अर सह दीअ ज़ाल़ी झाल़ी-ठुल़्हकी करै ज़ेभै तैणीं सह नांईं भेटे, तेभै तैणीं रहा सह लोल़ी लागी। 9तेखअ ज़ांऊं सह भेटी जाआ, सह खोज़ा सोभी साथी-संघी का हाक्‍का लाई, ‘बडी खुशीए गल्‍ल हुई मेरअ त सिक्‍कअ शोठुअ द, ऐबै गअ मुंह सह भेटी।’

10 “हुंह खोज़ा तम्हां का कि परमेशरे स्वर्ग दूता सम्हनै हआ स्वर्गै एही ई खुशी नंद ज़ेभै एक मणछ आपणैं पापो प्राश्त करी परमेशरा बाखा लै फिरा।”

बाधू शोहरूए कथ्या

11तेखअ बोलअ ईशू इहअ, “एकी मणछे तै दूई शोहरू। 12तिन्‍नां मांझ़ै बोलअ कान्हैं शोहरू आपणैं बाबा का इहअ कि बाबा, मुल्है दै एभी मेरी बांड ओर्ही। तेखअ दैनी तेऊ तिन्‍नां दुही शोहरू लै सारी ज़ैदात बांडी। 13खास्सै धैल़ै बी नांईं तै हुऐ कि होछ़अ शोहरू डेऊअ सोभ गल्‍ला कठा करी परदेसा लै अर तिधी किई तेऊ आपणीं सारी ज़ैदात दिला-मन्‍नें साबै ज़िन्दगी ज़िऊंणां लै कदुष्ट कामां दी खतम।#15:13 सैणीं. 29:3

14 “ज़ांऊं सह सोभ किछ़ छेभी मुक्‍कअ, तेऊ देशै पल़अ नकाल़ अर सह हुअ गरीब। 15तेखअ रहअ सह तेऊ देशै एकी मणछे घअरै दास। तेऊ डाहअ सह आपणैं खेचै सुंगरा च़राऊंदअ लाई। 16तेऊ देशै निं तेऊ शोहरू लै कोह किछ़ दैंदअ त, सह च़ाहा त भुखै तिन्‍नां ई शिम्मीं खाई आपणअ पेट रज़ैऊंणअ ज़ेता तिंयां सुंगर खाआ तै।

17 “ज़ांऊं तेऊ सोर समझ़ आई, तेखअ लागअ सह आप्पू इहअ सोठदअ, ‘मेरै बाबे बेठू बी भेटा पेट भरी खाणां लै रज्ज़ी रोटी अर तेता का लाऊआ बच़ा तिन्‍नां का बतेर्हअ। 18मुंह डेऊणअ ऐबै आपणैं बाब सेटा लै बापस फिरी अर मुंह बोल़णअ आपणैं बाब लै इहअ कि बाबा, मंऐं किअ तेरी आछी दी अर तेऊ परमेशरे खलाफ पाप ज़ुंण स्वर्गै आसा।#भज. 51:4 19ऐबै निं हुंह एता जोगी आथी कि तूह मुल्है आपणअ शोहरू बोले, मुंह डाह इधी आप्पू सेटा बेठू ज़िहअ।’

20 “इहअ सोठी डेऊअ सह तिधा का आपणैं बाब सेटा लै। ज़ांऊं सह आपणैं घअरा नेल़ पुजअ, तेऊए बाबै हेरअ सह भाल़ी अर सह तेऊ फिरी तेऊ शोहरू भाल़ी झींण अर ठुर्हअ तेऊ सेटा लै संघा दैनी तेऊ लै पिड्डी मल़्हैची तेखअ लागअ तेऊ लै मल़्हैची दैंदअ। 21तेखअ बोलअ तेऊ शोहरू, ‘बाब, मंऐं किअ तेरी आछी अर तेऊ परमेशरे खलाफ पाप ज़ुंण स्वर्गै आसा। ऐबै निं हुंह एता जोगी आथी कि तूह मुल्है आपणअ शोहरू बोली सके।’

22 “पर तेऊए बाब शादै आपणैं दास संघा बोलअ तिन्‍नां लै, ‘ओर्ही आणा छ़ेक्‍कै सोभी का बधिया नऊंऐं झिकल़ै बन्हैऊंआं एऊ लै, हाथै बन्हैऊंआं एऊए सुन्‍नें मुंदल़ी अर खूरा लै दैआ नऊंऐं पोलल़ै। 23खुढै ढाकअ द बडअ गाभू काटी खैऊआ सोभी लै खुशीए धाम। 24किल्हैकि मेरअ अह शोहरू गअ त मुल्है मेरै बराबर हई, अह त लुक्‍कअ द अर ऐबै गअ अह भेटी। अह हुअ मरी करै ज़िऊंदै हणैं बराबर भिई ज़िऊंदअ।’ तिंयां लागै सोभ खुशी मनाऊंदै।

25 “पर तेऊओ ज़ेठअ शोहरू त खेचा लै डेऊअ द अर ज़ांऊं सह बापस घअरा नेल़ पुजअ, तेऊ का शुण्हनअ गाज़ै-बाज़ै अर नाच़दै लोगे छ़ेल़। 26तेऊ पुछ़अ एकी दासा का कि एथ किज़ै हुअ? 27तेऊ दास बोलअ, ‘तेरअ होछ़अ भाऊ आअ घअरा लै फिरी अर तेरै बाब काटअ तेऊए राज्ज़ी-राम्बल़ै फिरी एछणें खुशी दी खुढै धाचअ द बडअ गाभू। किल्हैकि तेऊ भेटअ सह राज्ज़ी राम्बल़अ बापस।’

28 “इहअ शूणीं आई तेऊ बडै शोहरू बेघै खास्सी रोश्शै अर तेऊओ निं भितरा लै डेऊणेओ मन्‍न बी किअ पर तेऊओ बाब आअ बागा लै अर सह लागअ तेऊ मनैऊंदअ। 29तेखअ बोलअ तेऊ आपणैं बाब का, ‘भाल़, एतरी साला ओर्ही आसा हुंह तेरी च़ाकरी करदअ लागअ द। मंऐं मनी तेरी सोभै गल्‍ला, तंऐं निं कधि मेरी तैणीं बाकरीओ होछ़अ ज़िहअ बच्च़अ बी दैनअ कि आपणैं साथी-भाई संघै खुशी मनाऊं! 30पर ज़ांऊं अह तेरअ शोहरू ज़ुंणी तेरी सारी ज़ैदात कदुष्ट कामां पिछ़ू खतम किई अर एभै आअ अह सोभ किछ़ बरैबाद करी घअरा लै अर तंऐं काटअ एऊ लै खुंढी धाचअ द बडअ गाभू!’

31 “तेऊए बाब बोलअ तेऊ लै, ‘ओ शोहरूआ, तूह हआ धैल़ मुंह संघै अर ज़ुंण बी मेरअ आसा सह आसा तेरअ ई। 32पर एभै लोल़ी ती तंऐं बी खुशी मनाऊंईं, भाल़, तेरअ भाऊ गअ त मरी अर अह हुअ ऐबै भिई ज़िऊंदअ, अह त लुक्‍कअ द अर ऐबै भेटअ अह भिई।’”

Currently Selected:

लूका 15: OSJ

Highlight

Copy

Compare